2 ZA GOŊE 5

Nooman laɓ ɓe

1Nooman dǝɓlii sal goŋ Siria yo, dǝɓ mabǝ̃ǝ ah ye pel dǝɓlii ahe, a pǝyǝk mor Dǝɓlii nyi swah nyi Sirien ne jol ahe. Dǝɓ ruu sal maswah ah ye ko, amma tǝkpiŋr o.#Lu 4:27 2Ka comki kul sooje Sirien pǝ̃ǝra salle, gbǝra mǝlaŋ ki pǝ sǝr Israel ge ɓo no ne ko. Mǝlaŋ ah a joŋ yeɓ nyi mawin Nooman. 3Mǝlaŋ faa nyi mah yaŋ ahe: Kǝnah dǝɓlii ɓe wor ɓo mo no wo profeto Masǝŋ yaŋ Samaria ɓe, profeto ga laɓ syem tǝkpiŋ ahe. 4Nooman kal ge wo dǝɓlii ah goŋ, kee ɓǝ ah nyi ko: Mǝlaŋ ki daga sǝr Israel faa ɓǝ nai sye nai sye.

5Goŋ faa nyi ko: Mo ge yaŋ Samaria, me ga pee leetǝr ga nyi goŋ Israel. Nooman urri, ɓaŋ vãm solai nǝn kilo temere sai, ne vãm kaŋnyeeri nǝn kilo jemma yea tǝkine mbǝro sol jemma kal ne ko. 6Ɓaŋ leetǝr ah mor jol kal ge nyi goŋ Israel ne ko. Ɓǝ ŋwǝǝ ɓo pǝ leetǝr ah faa: Ne cok leetǝr mai mo ge dai mo ɓe, me pee dǝɓ yeɓ ɓe Nooman wo ɓo mor ka mo laɓ syem tǝkpiŋ ah sa. 7Ne cok goŋ Israel mo kee leetǝr ahe, so ŋgǝ̃ǝ mbǝro wo suu ah faa: Ame Masǝŋ ko me in dǝɓ pǝ wulli, wala soɓ dǝɓ yea ne cee ne? So pepee ge wo ɓe ka me laɓ syem tǝkpiŋ dǝɓɓi! We foo ne suu ɓii ɗao, mai tǝ kyeɓ bal ye gin ne me.

8Ne cok Elisa mo laa goŋ Israel ŋgǝ̃ǝ mbǝro wo suu ah ɓo, pepee kal ge wol ah faa: Mo ŋgǝ̃ǝ mbǝro ɓo mor fẽene? Mo soɓ ko ge wo ɓe, a ga tǝ, profeto Masǝŋ no kǝsyil za Israel. 9So Nooman ge ne pǝr ah ne muŋta sal ahe, ge uu zahfah yaŋ Elisa. 10Elisa pee dǝɓ ge wol ah faa nyi ko: Mo ge er bii pǝ el Yordan zahlǝŋ rǝŋ, suu ɓo ga ge na matãa. 11Amma Nooman ɓaŋ kpãh ur kal ne faa: Me lǝŋ me ge ɓe, a pǝ̃ǝ ge wo ɓe, a gin uu a ɗii tǝɗii Dǝɓlii Masǝŋ ahe, a so kan jol ah ga pǝ cok mai syem mo gŋ a laɓ syem ah ne. 12Bii el Abana ne Parpar ma Damaskus kal bii Israel daŋ ne sãh ya ne? Me ka gak er bii gŋ ka me laɓ ya ne? So pii soo kal ne kpãh kpǝ.

13Za yeɓ ah gera wol ah faara nyi ko: Pa ɓuuru, kǝnah profeto Masǝŋ mo cuu fan magaɓ ɓo nyi mo ka mo joŋ ɓe, mo ka joŋ ya ne? Soko mai mo faa ɓo nyi mo, mo ge er bii mo ga laɓ ne? 14Nooman ɗǝr kal ge pǝ bii Yordan, rǝŋ bii zahlǝŋ rǝŋ, tǝgbana mai dǝɓ Masǝŋ mo faa. Laɓ ɓe, so suu ah ge tǝgbana welaŋne.

15So pii soo ge wo dǝɓ Masǝŋ ne za mai mo gera ɓo ne ki daŋ, ge wol ah gwari faa: Zǝzǝ̃ǝko me tǝ ɓe, wo sǝr ne lii ah daŋ Masǝŋ maki ah kǝka, sai kǝsyil za Israel to. Oseni, mo nyiŋ fan jol ɓe nyẽe ɗao. 16Amma Elisa zyii faa: Me haa zah ne tǝɗii Dǝɓlii mai me tǝ joŋ yeɓ ah me ka nyiŋ ya. Nooman pǝǝ ko pǝlli ka mo nyiŋko, amma zyii ya. 17So Nooman faa: Ko amo zyii yao, amma oseni mo soɓ me fõo sǝr mai nǝn cel korro gwa ɗao. Mor me ka fǝ̃ǝ joŋ syiŋ suŋwii tǝkine ŋgoŋ fan joŋ syiŋ ne wo masǝŋ ki ra yao, sai wo Dǝɓlii to o. 18Amma fan mai me tǝ pǝǝ Dǝɓlii ka mo rõmko me tǝ ɓǝ ahe: ne cok goŋ Siria mo ge yaŋ Rimmon masǝŋ sǝr Siria ka juupel gŋ ɓe, a kea ga sǝŋ tǝ jol ɓe, ame laŋ me kea ga sǝŋ juupel gŋ ta. Ne cok me ge kea sǝŋ yaŋ Rimmon ɓe, ka Dǝɓlii Masǝŋ mo rõm me ne ɓǝ ahe. 19Elisa faa nyi ko: Mo ge jam o.

Gehazi joŋ faɓe'

Ne cok Nooman mo ur gin wo Elisa kalle, ɗǝǝ ne ki pǝɗǝk nje, 20Gehazi dǝɓ yeɓ Elisa foo pǝ zahzyil ah faa: Mo ẽe dǝɓlii ɓe soɓ Nooman Siriyo kal ɓe, nyiŋ fan mai mo ge ne ko jol ah ya. Pǝram me ga foo mor ah ga zǝzǝ̃ǝko, me ga nyiŋ fan nyẽe jol ahe. 21Gehazi hǝǝ foo mor Nooman kalle. Ne cok Nooman mo kwo mo tǝ foo mor ah ginni, ɗǝr gin tǝ muŋta sal ah ge sǝŋ, syee ge zyaŋ ne ki, fii ko faa: Jam ye ne? 22Gehazi zyii zah ah faa: Jam yo. So faa: Dǝɓlii ɓe ye pee me ge, faa: Wee tǝbanna ma kǝsyil profetoen ma tǝ waa Efraim gera ɓo wo ɓe zǝzǝ̃ǝko. Mo nyi vãm solai nǝn kilo jemma sai ne mbǝro sol gwa nyi me, ka me nyi ra sa. 23Nooman faa: Pǝram mo nyiŋ vãm solai nǝn dah jemma yea. Pǝǝ ko pǝlli, so woo vãm solai ma nen kilo jemma yea pǝ dah camcam gwa, ne mbǝro sol gwa ta, nyi nyi za yeɓ ah gwa, ɓaŋra pel Gehazi kal ne ko. 24Amma ne cok Gehazi mo ge dai zahgee maki ahe, nyiŋ fan ah jol ɓǝǝra, kal ge kan ɓǝr yaŋ, so nyi fahlii nyi ra kalle.

25Amma Gehazi so dan kal ge wo dǝɓlii ah Elisa ɓǝr yaŋ. Elisa fii ko: Mo yea kal ge ɓo kẽne Gehazi? Zyii faa: Dǝɓ yeɓ ɓo ge cok ki ɗǝ ya. 26Amma Elisa faa nyi ko: Ne cok Nooman mo ɗǝr gin tǝ muŋta sal ah ka gin zyaŋ ne mo, me tǝ ɓǝ ah ya ne? Amma cok mai ka dǝɓ mo nyiŋ mbǝro sol ne vãm solai mor ka lee 'wah kpuu tǝbaakãm ne 'wah kpuu vin ne dǝǝ, ne faɓal manyee tǝkine za yeɓ mawǝǝ ne maŋwǝǝ ye ka ba. 27Tǝkpiŋ Nooman a so jin ga wo ɓo ne morsǝ̃ǝ ɓo ga lii.

Gehazi pǝ̃ǝ gin pel Elisa, tǝkpiŋ fãi suu nyi ko kaŋkaŋ na lok mbǝro.

Currently Selected:

2 ZA GOŊE 5: MUAR

Highlight

Copy