2 ZA GOŊE 23

Josias zyeɓ fahlii syee mor Dǝɓlii

(2 KeeƁ 34:3-7,29-33)

1Fahfal ah goŋ pepee tai zaluu yaŋ Jerusalem ne ma sǝr Yuda daŋ ge pel ahe. 2So goŋ kal ge ɓǝr yaŋ Masǝŋ ne za sǝr Yuda tǝkine za ma kaara yaŋ Jerusalem ne za joŋzahsyiŋ ne profetoen tǝkine za daŋ daga zaluu ne wee nyee daŋ. So kee ɗerewol gbanzah mai mo lwaara ɓǝr yaŋ Masǝŋ pel za daŋ. 3Goŋ uu wo waddǝǝ pǝ yaŋ Masǝŋ, gbǝ zah gŋ pel Dǝɓlii mor ka syee mor Dǝɓlii tǝkine syee mor ɓǝ faa ah ne ɓǝ lai ah ne zahzyil ne mazwãhsuu daŋ, mor ka baa ɓǝ gbanzah mai mo ŋwǝǝ ɓo pǝ ɗerewol ahe. Za daŋ gbǝra zah ne ɓǝ ah ta.

4So goŋ faa nyi pa joŋzahsyiŋ Hilkiija ne za joŋzahsyiŋ ma fahfal ahe, tǝkine za ma byak zahfahe, ka mo woora fan mai mo zyeɓra mor Ba'al ne Astarte tǝkine fan ma mor ŋwǝǝmǝŋgai sǝŋ daŋ ɓǝr yaŋ Masǝŋ ge lalle. Ge ɓaara wii nyi fan ah ra fahfal yaŋ Jerusalem lal pǝ 'wah kah el Kedron. So faa ka mo woora sãh ah ge yaŋ Betel ne ko.#2 ZaG 21:3; 2 KeeƁ 33:3 5Ik za joŋzahsyiŋ masǝŋ ki ra mai za goŋ Yuda mo rǝkra ra ka tǝǝ ɓǝrdi pǝ cok joŋ syiŋ ma tǝgee ah ra pǝ yaŋ sǝr Yuda maluu ah ra mai mo kah Jerusalem daŋ ge lalle. So ik za ma tǝǝ ɓǝrdi wo Ba'al, ne comme, ne fĩi ne ŋwǝǝmǝŋgai maluuri, tǝkine fan ma coksǝŋ daŋ ge lalle. 6Nǝǝ foto Astarte gin ɓǝr yaŋ Masǝŋ kal ge fahfal yaŋ Jerusalem lal ne ko pǝ 'wah kah el Kedron. Ɓoo wii tǝl ah kah el Kedron, so laŋ bilbil ciŋ tǝgbana sãhe, so woo myah ge tǝ pal za makol ah ra. 7Dah yaŋ za tǝkoi mai mo no ɓǝr yaŋ Dǝɓlii ge lalle, ŋwǝǝ a kaŋra zyim ɓǝr yaŋ ah ra mor Astarte.

8So ɗii za joŋzahsyiŋ daga pǝ yaŋ maluu sǝr Yuda daŋ ka mo gera. Ɓeɓ cok ma joŋ syiŋ tǝgee ah mai za joŋzahsyiŋ mo yea tǝ tǝǝra ɓǝrdi gŋ ge lalle, tǝŋ daga Geba ŋhaa ge dai yaŋ Beerseba. So dah cok joŋ syiŋ ma tǝgee mai mo kah zahfah yaŋ Joswa dǝɓlii yaŋ ah ge lalle. Dǝɓ mo tǝ ga yaŋ ɓe, cok ah a kah zahfah nǝjokǝsãhe. 9Amma za joŋzahsyiŋ ma joŋ syiŋ pǝ cok ma tǝgee sǝŋ ah ka ga joŋra syiŋ pǝ cok joŋ syiŋ Dǝɓlii pǝ yaŋ Masǝŋ ya, amma a renra farel ma bai fan mbǝ̃ǝ kǝsyil wee pa ɓǝǝra.

10Goŋ ɓeɓ cok joŋ syiŋ Tofet mai mo pǝ cok tǝforoŋ Hinnom ta, mor ka koo zune mo joŋ syiŋ suŋwii ne wel ah mawor koo ne mawin ah wo masǝŋ Molok gŋ ka.#Lew 18:21; Jer 7:31; 19:1-6; 32:25 11Dah foto pǝr ne muŋta pǝr mai za goŋ Yuda mo nyira ɓo nyi masǝŋ comme. Foto ah ra kan ɓo kah zahfah ma dan ga yaŋ Masǝŋ, kah yaŋ Natan-Melek dǝɓ syẽe mai yaŋ ah mo mgbãa yaŋ Masǝŋ ɓo. 12Goŋ Josias so dah cok joŋ syiŋ mai mo tǝ yaŋ zahdǝǝ Akas sǝŋ mai za goŋ Yuda mo yea zyeɓra ɓo gŋ, tǝkine cok joŋ syiŋ mai Manasse mo vuu ɓǝr pedǝǝ matǝ gwa mo ɓǝr yaŋ Dǝɓlii gwa daŋ ge lalle, so woo sǝr ah myah ge pǝ el Kedron.#2 ZaG 21:5; 2 KeeƁ 33:5 13Goŋ dah cok joŋ syiŋ ma tǝgee mai mo fah tǝ kǝsǝŋ yaŋ Jerusalem nǝfah morkǝsǝŋ waa Ma Ne Tǝbaakãm ge lalle. Fakol Astarte mǝ Sidonien mai Salomo goŋ Israel mo vuu mor ahe, ne mai mo vuu mor Kemos mǝ Moabien ne Molok mǝ wee Ammon, goŋ dah ge lal daŋ.#1 ZaG 11:7 14Dah foto ra ge lalle, cee Astarte ra ge lalle, so woo woiŋ dǝfuu baa ge pǝ cok ɓǝǝra#23:14 Woiŋ dǝfuu a joŋ ka cok joŋ syiŋ mo yea daŋdaŋ ka..

15Dah cok joŋ syiŋ ma tǝgee ma yaŋ Betel mai Jeroboam we Nebat mo vuu mo kǝǝ za Israel joŋ faɓe' gŋ ge lal ta, ɓoo wii tǝl ahe, so laŋ ciŋ tǝgbana sãhe. Ɓoo wii nyi Astarte ta.#1 ZaG 12:33 16Ne cok goŋ Josias mo tǝ ẽe cokki, kwo pal ki ra no tǝ waare, so pepee ka mo ge woora woiŋ pǝ pal ah ra ge ne ko. So ge ɓoo wii nyi pǝ cok joŋ syiŋrĩ, ɓeɓ cok ah ne ko. Fan ah joŋ tǝgbana ɓǝ faa Dǝɓlii mai dǝɓ Masǝŋ mo faa a ga joŋ.#1 ZaG 13:2 17Goŋ so fifii faa: Fan mai mo vuura ɓo me tǝ kwan mafẽe ah ye ne? Za yaŋ ah zyiira zah ah faa: Pal dǝɓ Masǝŋ mai mo gee sǝr Yuda ge yo, dǝɓ ah ge faa ɓǝ tǝ fan mai mo tǝ joŋ cok joŋ syiŋ yaŋ Betel zǝzǝ̃ǝko.#1 ZaG 13:30-32 18Josias faa: We soɓ ko nooko, dǝɓ mo juu woiŋ ah ka. Soɓra woiŋ dǝɓ ah ne woiŋ profeto Masǝŋ maki ah mai mo gee Samaria ge nooko.

19Josias dah cok joŋ syiŋ ma tǝgee mai za goŋ Israel mo vuura ɓo kǝsyil yaŋ Samaria ka ɓeɓ zahzyil nyi Dǝɓlii ne ko ge lalle. Joŋ ne cok ah ra tǝgbana mai mo joŋ ne ma yaŋ Betel ta. 20Ŋgom sol za joŋzahsyiŋ ma joŋ yeɓ pǝ cok joŋ syiŋ ma tǝgee ra daŋ tǝ cok joŋ syiŋrĩ, ɓoo wii nyi woiŋ dǝfuu tǝl ahe. So pii soo kal ge yaŋ Jerusalem.

Fĩi Paska

(2 KeeƁ 35:1-19)

21So goŋ faa nyi za daŋ: We joŋ fĩi Paska mor Dǝɓlii Masǝŋ ɓii tǝgbana mai ɓǝ ah mo ŋwǝǝ ɓo pǝ ɗerewol gbanzah maino. 22Fĩi Paska ma na mai joŋ taa ya. Daga ne cok zah'nan zaluu mai moo zyeɓra ɓǝ za Israel, tǝkine zah'nan za goŋ Israel ne za goŋ Yuda daŋ fĩi Paska ma na mai joŋ taa ya. 23Joŋra fĩi Paska mai yaŋ Jerusalem mor Dǝɓlii ka Josias kaa goŋ ɓo syii jemma tǝtǝl nama.

In zah goŋ Josias

24So Josias cak ɓǝ za ma faa ɓǝ ne wulli, ne za ma ẽe ciŋ, ne ɓǝ masǝŋ ki ma zyeɓ rǝk yaŋ ne masǝŋ maki ah ra, tǝkine ɓǝ fan kol mai mo pǝ sǝr Yuda ne yaŋ Jerusalem daŋ, mor ka baa ɓǝ mai mo ŋwǝǝ ɓo pǝ ɗerewol Ɓǝ Lai mai pa joŋzahsyiŋ Hilkiija mo lwaa ɓǝr yaŋ Dǝɓlii.

25Koo kǝpel Josias, goŋ ma na ko mai mo pii soo ge wo Dǝɓlii ne zahzyil vaŋno ne mazwãhsuu ah ne swah suu ah daŋ tǝgbana mai ɓǝ lai Mosus mo faa ɓo kǝka, koo fahfal ah laŋ kǝka. 26Amma Dǝɓlii soɓ ɓaŋ kpãh ah malii mai mo ɓaŋ ɓo tǝ Yuda ya, mor ɓeɓ zahzyil mai Manasse mo ɓeɓ ɓo nyi. 27Dǝɓlii faa: Me ga ɓaŋ Yuda pel ɓe ga lal tǝgbana me ɓaŋ Israel pel ɓe ge lalle. Me ga ɓoo Jerusalem yaŋ malii mai me nǝǝ ɓo me faa tǝɗii ɓe ga yea gŋ ga lalle.

Wul Josias

(2 KeeƁ 35:20–36:1)

28Tǝcoŋ ɓǝ Josias ŋwǝǝ ɓo pǝ ɗerewol Ɓǝ Za Goŋ Yuda.#2 KeeƁ 35:20–36:4 29Ne zah'nan goŋ ahe, Farao-Neko goŋ sǝr Egiɓ pǝ̃ǝ ka ruu sal ne goŋ Asiria kah el Efrat. Goŋ Josias ge zyaŋ tǝl ah ne salle. Amma ne cok Neko mo ge kwo ko, i ko pǝ wul Megiddo. 30Za yeɓ ah ɓaŋra wul ah ne muŋta pǝr daga Megiddo kal ge yaŋ Jerusalem ne ko. Ge ciira ko pǝ pal ahe. Za sǝr ah ɓaŋra Joakas we Josias syee nǝm tǝl ah kan goŋ ne pǝ cok pah ahe.

Joakas kaa goŋ Yuda

(2 KeeƁ 36:2-4)

31Ne cok Joakas mo kaa goŋ, ka joŋ syii ɓo jemma gwa tǝtǝl sai, kaa goŋ yaŋ Jerusalem fĩi sai, a ɗii mah ah ne Hamutal, mǝlaŋ Jeremias ma yaŋ Libna yo. 32Joakas joŋ fan maɓe' ah pel Dǝɓlii ryakryak tǝgbana pamlii ra mo joŋra. 33Farao-Neko gbǝ ko gaa ne ŋgǝyam yaŋ Ribla pǝ sǝr Hamat, mor ka mo so kaako goŋ yaŋ Jerusalem kao. So cuu gǝraama nyi za sǝr ah ka mo soora vãm solai kilo 3.000 ne vãm kaŋnyeeri kilo 30. 34Farao-Neko ɓaŋ Eliakim we Josias kan goŋ ne pǝ cok pah ah Josias. So fer tǝɗii ah ɗii ne Jojakim. Amma ɓaŋ Joakas kal ge sǝr Egiɓ ne ge wǝ gŋ ŋhaako.#Jer 22:11-12 35Jojakim a nyi vãm solai ne vãm kaŋnyeeri nyi Farao. Amma kan gǝraama tǝ za sǝr ah mor ka nyi lak ah na mai Farao mo cuu ɓo. A woo vãm solai ne vãm kaŋnyeeri jol za sǝr ahe, zune daŋ a soo tǝgbana mai mo cuuko ɓo nyi, mor ka nyi nyi Farao-Neko.

Jojakim kaa goŋ Yuda

(2 KeeƁ 36:5-8)

36Ne cok Jojakim mo kaa goŋ, ka joŋ syii ɓo jemma gwa tǝtǝl dappe, kaa goŋ yaŋ Jerusalem syii jemma tǝtǝl vaŋno. A ɗii mah ah ne Zebuda mǝlaŋ Pedaja ma Ruuma yo.#Jer 22:18-19; 26:1-6; 35:1-19 37Joŋ fan maɓe' ah pel Dǝɓlii ryakryak tǝgbana pamlii ra mo joŋra.

Currently Selected:

2 ZA GOŊE 23: MUAR

Highlight

Copy