2 ZA GOŊE 24

1Pǝ zah'nan goŋ Jojakim, Nebukanezar goŋ sǝr Babilon ge ɗaŋ yaŋ Jerusalem ne ko. Jojakim joŋ yeɓ mor ah syii sai. Fahfal ah so fer ŋwookyaŋ ne ki.#Jer 25:1-38; Dan 1:1-2 2Dǝɓlii pee za sal Babilonien ne mǝ Sirien ne Moabien tǝkine mǝ Ammonien ge tǝ sǝr Yuda mor ka muŋ zan ah tǝgbana mai Dǝɓlii mo faa ɓǝ ah ne zah za yeɓ ah profetoen. 3Fan ah ge joŋ tǝ Yuda ryakryak tǝgbana mai Dǝɓlii mo faa ɓo, faa: Zye ga ɓaŋ ra pel 'min ga lalle, mor faɓe' mai Manasse mo joŋko ɓo daŋ, 4tǝkine mor ɓǝɓe' syim za ma bai ɓǝɓe' mai mo ɗuuko baa yaŋ Jerusalem ne ko. Dǝɓlii zyii rõm ɓǝ ah ya.

5Tǝcoŋ ɓǝ Jojakim ne yeɓ ah ŋwǝǝ ɓo pǝ ɗerewol Ɓǝ Za Goŋ Yuda. 6Jojakim ge wuu, wel ah Jojakin kaa goŋ pǝ cok ahe.

7Amma goŋ sǝr Egiɓ fǝ̃ǝ ka pǝ̃ǝ gin sǝr ah ga cok ki yao, mor goŋ sǝr Babilon re fan goŋ sǝr Egiɓ ɓo daŋ, tǝŋ daga kah el sǝr Egiɓ ŋhaa ge dai el Efrat.

Jojakin kaa goŋ Yuda

(2 KeeƁ 36:9-10)

8Ne cok Jojakin mo kaa goŋ, ka joŋ syii ɓo jemma tǝtǝl nama, kaa goŋ yaŋ Jerusalem fĩi sai. A ɗii mah ah ne Nahusta, mǝlaŋ Elnatan ma yaŋ Jerusalem yo.#2 KeeƁ 36:9-10 9Jojakin joŋ fan maɓe' ah pel Dǝɓlii ryakryak tǝgbana pah ah mo joŋni.

10Ne cok ah za yeɓ Nebukanezar goŋ sǝr Babilon pǝ̃ǝ sal ge zah Jerusalem, ryaŋra yaŋ ahe. 11Nebukanezar ge dai gŋ ka za sal ah tǝ ryaŋra yaŋ ah ryaŋ ba. 12So Jojakin goŋ Yuda pǝ̃ǝ kal ge wo goŋ Babilon, ako ne mah ahe, ne za yeɓ ah ra ne zaluu ah ra tǝkine syẽe ah ra. Nebukanezar gbǝ ko gaa ka Nebukanezar kaa goŋ ɓo syii nama.#Jer 22:24-30; 24:1-10; 29:1-2

13Goŋ Babilon woo fan mayǝk ah mai mo ɓǝr yaŋ Masǝŋ ne ma ɓǝr yaŋ goŋ daŋ kal ne ko. Dah fan ma joŋ ne vãm kaŋnyeeri mai Salomo goŋ Israel mo joŋ ɓo ɓǝr yaŋ Masǝŋ ge lal tǝgbana ɓǝ mai Dǝɓlii mo faa. 14Woo zaluu ma yaŋ Jerusalem ne zaluu sooje ahe, ne za cwak tǝkine za ma tan zah yeɓ camcam daŋ joŋ ujenere jemma kal ge pǝ byak ne ra, sai soɓ za syak ma pǝ sǝr ah to. 15Kal ge sǝr Babilon ne Jojakin ne mah goŋ ne ŋwǝǝ goŋe, ne syẽe yaŋ goŋ ra, tǝkine zaluu sǝr ah daŋ woo ra daga yaŋ Jerusalem kal ge pǝ byak sǝr Babilon ne ko.#Eze 17:12 16Sooje maswah ujenere rǝŋ, za cwak ne za ma tan zah yeɓ camcam ara ujenere, ara ye za ma tan ruu sal daŋ, goŋ Babilon woo ra kal ge pǝ byak sǝr ah ne ko.

17Goŋ Babilon ɓaŋ Mattania naa pah Jojakin kan goŋ ne pǝ cok ahe. So fer tǝɗii ah ɗii ne Sedekias.#Jer 37:1; Eze 17:13

Sedekias kaa goŋ Yuda

(2 KeeƁ 36:11-12; Jer 52:1-3)

18Ne cok Sedekias mo kaa goŋ, ka joŋ syii ɓo jemma gwa tǝtǝl vaŋno. Kaa goŋ yaŋ Jerusalem syii jemma tǝtǝl vaŋno. A ɗii mah ah ne Hamutal, mǝlaŋ Jeremias ma Libna yo.#Jer 27:1-22; 28:1-17#2 KeeƁ 36:11-12; Jer 52:1-3 19Sedekias joŋ fan maɓe' ah pel Dǝɓlii ryakryak tǝgbana Jojakim mo joŋni. 20Mor ah Dǝɓlii ɓaŋ kpãh tǝ sǝr Yuda ne yaŋ Jerusalem, ŋhaa ɓaŋ ra pel ah ɓoo ge lalle. Sedekias ŋwookyaŋ ne goŋ Babilon.#Eze 17:15

Currently Selected:

2 ZA GOŊE 24: MUAR

Highlight

Copy