2 ZA GOŊE 22

Ɓǝ Josias tǝkine ɓǝ ɗerewol Ɓǝ Lai

(2 KeeƁ 34:1-2)

1Ne cok Josias mo kaa goŋ, ka joŋ syii ɓo nama. Kaa goŋ yaŋ Jerusalem syii jemma sai tǝtǝl vaŋno. A ɗii mah ah ne Jedida mǝlaŋ Adaija ma Boskat yo.#Jer 3:6 2Joŋ fan masãh ah pel Dǝɓlii, ɓaŋ tǝɓal pamlii David, cak gin gŋ ge lal nǝjokǝsãh koo nǝjokǝlǝɓai ya.

3Ka Josias kaa goŋ ɓo syii jemma tǝtǝl nama, pee Safan we Asalia, we Mesulam pa ŋwǝǝ fan ka ga pǝ yaŋ Masǝŋ, faa nyi ko: 4Mo ge wo pa joŋzahsyiŋ Hilkiija, mo faa nyi ko ka mo keeko lak mai za ma byak zahfah yaŋ Masǝŋ mo nyiŋra ɓo jol zana. 5Ka mo nyiko nyi za kapita mai moo joŋra yeɓ ɓǝr yaŋ Masǝŋ ka mo soora za ma joŋra yeɓ ɓǝr yaŋ Masǝŋ mai mo tǝ zyeɓra cok mai mo ɓeɓ ɓo ɓǝr yaŋ Masǝŋ ne ko. 6Zan ah ye za zyeɓ kpuu, za yeɓɓe, tǝkine za ma vuu yaŋ. Ka kapita mo so leara kpuu, ne tǝsal ma zyezyeɓ ah mor ka zyeɓ yaŋ ah ne ko ta. 7Amma ka mo so keera ɓǝ lak mai mo nyira ɓo nyi ra joŋ yeɓ ɓo naino kao, mor tǝ joŋra yeɓ ah pǝsãhe.#2 ZaG 12:16

8Pa joŋzahsyiŋ Hilkiija faa nyi Safan pa ŋwǝǝ fanne: Me lwaa ɗerewol Ɓǝ Lai ɓo ɓǝr yaŋ Masǝŋ nyeeko. So Hilkiija ɓaŋ ɗerewol ah nyi nyi Safan kee. 9Safan kal ge wo goŋe, kee ɓǝ nyi ko faa: Za yeɓ ɓo woora lak mai mo no ɓǝr yaŋ Dǝɓlii, nyira nyi za kapita mai mo tǝ joŋra yeɓ ɓǝr yaŋ ah ɓe. 10So Safan faa nyi goŋe: Pa joŋzahsyiŋ Hilkiija nyi ɗerewol ki ɓo nyi me. So Safan kee ɗerewol ah nyi goŋe.

11Ne cok goŋ mo laa ɓǝ ma pǝ ɗerewol Ɓǝ Lai naiko, ŋgǝ̃ǝ mbǝro wo suu ahe. 12Goŋ faa nyi pa joŋzahsyiŋ Hilkiija ne Ahikam we Safan, ne Akbor we Mika ne Safan tǝkine Asaja dǝɓ yeɓ goŋe: 13We ge fii Dǝɓlii mor ɓe, tǝkine mor za Yuda daŋ tǝ ɓǝ ɗerewol mai mo lwaara ɓo, mor Dǝɓlii ɓaŋ kpãh ɓo tǝtǝl man pǝ'manne, mor pa man lii ra zyii nyiŋra ɓǝ ɗerewol mai ya, joŋra fan tǝgbana mai ɓǝ ah mo ŋwǝǝ ɓo tǝtǝl man gŋ ya.

14So pa joŋzahsyiŋ Hilkiija ne Ahikam, ne Akbor ne Safan tǝkine Asaja kalra ge wo profeto Masǝŋ madǝwin ma ɗii ne Hulda, mawin Sallum we Tikva we Harkas, pa byak cok rǝk mbǝro goŋe. Profeto madǝwin ah kaa ɓo dahgbil Jerusalem patǝ gwa ahe. Ge faara ɓǝ ne ki. 15Ako faa nyi ra: Dǝɓlii Masǝŋ Israel faa: We ge faa nyi dǝɓ mai mo pee we ge: 16Dǝɓlii faa sye: Me ga pee bone ge pǝ cok mai tǝkine tǝ za ma kaara gŋ tǝgbana ɓǝ pǝ ɗerewol mai daŋ goŋ Yuda mo kee ɓo. 17Mor soɓra me ɓoo, so kalra ge tǝǝ ɓǝrdi wo masǝŋ ki ra, mor ka ɓeɓra zahzyil nyi me ne yeɓ ma joŋ ne jol ɓǝǝra. Me ɓaŋ kpãh ɓo tǝ cok mai pǝ'manne, kpãh ah laŋ ka ga wuu ya. 18Amma we ge faa nyi goŋ Yuda mai mo pee we ge ka fii Dǝɓlii: Dǝɓlii Masǝŋ Israel faa sye: Mo laa ɓǝ ma pǝ ɗerewol mai mo kee, 19zahzyil nǝǝ mo tǝ ɓǝ ahe, so mo wonsuu ɓo pel ɓe ne cok mo laa ɓǝ mai me faa ɓo tǝ cok maiko, tǝkine tǝ za ma kaara gŋ, cok ah ga ciŋ gboŋni, zahyee ga yea tǝl ahe, mo so ŋgǝ̃ǝ mbǝro wo suu ɓo, mo yeyee pel ɓe, ame laŋ me laa ɓe. 20Mor ahe, me ga tai mo ne pa ɓo lii ra, mo ga wǝ jam, nahnǝn ɓo ka ga kwo bone mai mee ga pee gin tǝ cok mai ya.

So kalra ge wo goŋ ne zah pee ahe.

Currently Selected:

2 ZA GOŊE 22: MUAR

Highlight

Copy