Mako 9

1Ipapo Jesu kabadwa kati, “Ndolebesa ndoti, bayapo bamile ipapa banowobona bushe gwe Ndzimu gozha nge masimba, basathu bakafa.”

Kushanduka mbumbiko

(Matewu 17:1-13; Luke 9:28-36)

2 # 2 Pita 1:17, 18 Shule kwe mazhuba ali matathatu, Jesu kadana Pita na Jakubo na Johani, katatha nabo dombo lefu lefu pasina nthu, ngono kashanduka mbumbiko mbeli kwabo. 3Zwiambalo zwizwe zwikangadzima, zwili zwitjena kwazo, kusina nsuki ungazwitjenesa sa ikoko mu shango. 4Elija na Mushe bakazha bakalebeleka na Jesu. 5Pita kati kuna Jesu, “N'diyi, kwaka naka kwazo kuti tibe tilipano. Dzene tingabaka mishasha mitatu, mmwe uli wenyu, mmwe uli wa Mushe, mmwe uli wa Elija.” 6Wakabe eleba ikoku, ngobe wakabe asingazibe kuti ungalebani, ngoti bakabe bapalukamoyo kwazo.

7 # Matewu 3:17; Mako 1:11; Luke 3:22 Kukati ipapo gole likabafukidza, ngono hwi likalebeleka lidwa mu gole liti, “Oyu ndiye Nkololo wangu unodika, munhwilile.” 8Tjinyolotjo bakati belinganya, bakasitjabone mmwe anabo, kuzhe kwa Jesu ega.

9Kukati bedeluka mu dombo, Jesu kabalaya akasimisa kuti kushete wababudza tjababona, kudzina iye Nkololo we Nthu emusiwa mu bafi.

10Ndizo kukasibe ne wababudza, koga bebhuzwana beti, “Kumuka mu bafi kolebani.” 11#Malaki 4:5; Matewu 11:14Bakambhuzwa bakati, “Ini Badiyi be nlayo beti Elija wakafanilo zha kutanga?”

12Ngono kati ku bali, “Elija unozha kutanga kuwolulwamisa zwithu zose, ngono ini kwakakwagwa ngekwe Nkololo we Nthu kuyi unowodziyidzika kalengudziwa? 13Koga ndomudwa nditi, Elija wakazha, ngono bakathama tjimwe ne tjimwe tjabada munli sekwa kwakakwagwa.”

Jesu unopodza mbisana una meya mbi

(Matewu 17:14-20; Luke 9:37-43a)

14Bakati beswika ku bamwe badiyiwa, bakawana kuna mbunga we bathu ne Badiyi be nlayo benyanyayidzana ne badiyiwa ba Jesu. 15Ipapo mbunga wose ukati ubona Jesu ukatjenama kwazo, ndizo ukantizhilila ukan'dumilisa. 16Jesu kabhuzwa badiyiwa babe kati, “Molebani nabo?”

17Mmwe nthu mu mbunga kanshandula eti, “N'diyi, ndazhisa nkololo wangu kumuli, ngobe una meya inonkonedza lebeleka. 18Ha yammukila inonlashila pasi esiza mafulo etafuna meno ne mbili uwe uwomelela wose. Ngono ndakumbila badiyiwa benyu kuti baiduse, koga bakong'wa.”

19Jesu kabadwa kati, “Tjizekugwana tjisina kugalamoyo ndimwi, ndowobe namwi tjibaka tjingapani kene? Ndowobe ne moyonlefu namwi kuswikila lini kene? Munzhise kundili.” 20Bakayisa mbisana kuna Jesu, ngono meya ikati ibona Jesu ikadzipikanya mbisana iwoyo ikanligila pasi, kabumbuluka esiza mafulo. 21Jesu kabhuzwa tate be mbisana kati, “Gwala ikoku kwakantangisa lini?”

Bakanshandula beti, “Kudwila mu butukununu. 22Ndikanjinji inligila mu moto nenge mu vula ishaka kumbulaya, koga ha mutubula kuthama tjimwe, mutihwile ngoni mutibhatshe.”

23Jesu kati kunli, “Ukati, ha mutubula? Zwithu zose zotubuka mu nthu unogalamoyo.”

24Ipapo tate be mbisana bakalebeleka bakati, “Ndogalamoyo, ngono bhatshani kusagalamoyo kwangu.”

25Jesu kati ebona bathu bezha bakalabuka bose katjemela meya mbi kati, “Meya we mbebebe ne bhubuzebe ndiwe, bhuda munli, usitongo buya ukabgwilila munli kakale.”

26Meya ikatjema ikazunguza mbisana iwoyo kwazo, ikabhuda munli, kasala enga itumbu, bunji gwabo gukati, “Wafa.” 27Koga Jesu kambhata nge luboko kammilidza, kamuka kama nge makumbo.

28Jesu kangina mu ng'umba, ngono badiyiwa babe bakambhuzwa bali boga beti, “Ini iswi takong'wa kudusa meya iyeyi?”

29Ngono kati, “Inonga iyeyi inodusiwa koga nge ntembezelo.”#9:29 ntembezelo: Dzimwe hwalo dza ntolo dze Bhaibhili dzopaphidza dziti, “nenge kuzwinyima zojiwa.”

Jesu unolebeleka kakale ngekwe lufu gugwe

(Matewu 17:22-23; Luke 9:43b-45)

30Kudwa ipapo bakayendila mbeli bakapalama Galili. Jesu wakabe asingashake kuti kuzibgwe kwaayako. 31Ngoti wakabe ediya badiyiwa babe eti ku bali, “Iye Nkololo we Nthu unowobhakhwa kalongwa mu maboko e bathu, ngono banowombulaya, koga unowoti abulawa, shule kwe mazhuba matatu unowomuka.”

32Koga bakabe basingahwisise ndebo iyeyi, ngono bakatja kumbhuzwisisa.

Nkulu tjose ndiani?

(Matewu 18:1-5; Luke 9:46-48)

33Bakaswika ku Kapenaume, ngono kati ali mu ng'umba kababhuzwa kati, “Mabe mulebeleka ngekweni mu zila?”

34 # Luke 22:24 Koga bakanyalala, ngoti bakabe bati mu zila bakalebeleka ngekwe kuti, nkulu tjose ndiani? 35#Matewu 20:26, 27; 23:11; Mako 10:43, 44; Luke 22:26Ndizo Jesu kagala pasi, kabadana bali gumi lina babili kabadwa kati, “Ha kuli kuti kuna unowobe nkulu, ngaabe iye ntukununu muna bose, kakale abe nlanda wa bose.” 36Katola mwana ntukununu kambiga pakati kwabo, ngono kati entola engumbatila nge maboko kabadwa kati, 37#Matewu 10:40; Luke 10:16; Johani 13:20“Iye unoamutjila mwana unonga iwoyu nge zina langu, unoamutjila imi, ngono na iye unoamutjila imi, aatoamutjila imi koga, ngono unoamutjila iye wakandituma.”

Iye usingalambane naswi umile naswi

(Luke 9:49-50)

38Johani kan'dwa kati, “N'diyi, takabona mmwe nlume edusa meya mibi nge zina lenyu, tikan'dzibila, ngobe wakabe asi mmwe wedu.”

39Koga Jesu kati, “Musin'dzibile, ngoti akuna unoshinga nshingo unolakidza simba nge zina langu ungati tjinyolotjo kudwapo kaleba bubi nge kwangu. 40#Matewu 12:30; Luke 11:23Iye usingalambane naswi nge wedu. 41#Matewu 10:42Ndolebesa ndoti kumuli, iye unomupa nkombe we vula kuti mung'we, ngobe mudang'wa nge zina la Kirisiti, aangalashikigwe nge mbhayilo uwe.

Kuwongegwa mu tjibi

(Matewu 18:6-9; Luke 17:1-2)

42“Koga iye unothama mmwe wa ibaba batukununu banogalamoyo mundili kuti bathame tjibi, koyita ha angasungiligwa gwiyo gulu mu ntshibha kalashigwa mu gungwa. 43#Matewu 5:30Ndizo ha luboko gugo gukuyita kuti utjinye, uguthubule. Koyita ha ungangina mu butjilo gusingapele uli tjilema, pana kuti ube ne maboko wose koga ube ulashigwa mu moto unongunguma.#9:43: Dzimwe hwalo dza ntolo dze Bhaibhili dzina ndimana 44: “Iko kuna hwonyana dzisingafe ne moto usingadzime.” 45Gumbo lilo ha likuyita kuti utjinye, ulithubule. Koyita ha ungangina mu butjilo uli tjilema, pana kuti ube una makumbo mabili, ngono uposegwe mu moto usingadzime.#9:45: Dzimwe hwalo dza ntolo dze Bhaibhili dzina ndimana 46: “Iko kuna hwonyana dzisingafe ne moto usingadzimike.” 47#Matewu 5:29Kakale ha zhisho lilo likuyita kuti utjinye, ulikonyombole uliduse, ngobe koyita ha ungangina mu bushe gwe Ndzimu una zhisho ling'ompela, pana kuti ube ne mesho mabili ulashigwe mu moto usingadzime. 48#Isaya 66:24‘Iko kuna hwonyana dzisingafe ne moto usingadzimwe.’

49“Mmwe ne mmwe unowotjenesiwa nge moto, se mwenyu utjenesa tjibhayilo.

50 # Matewu 5:13; Luke 14:34, 35 “Mwenyu wakalulwama, koga ha washuluka, ungathamwa tjini kuti ube ne njo kakale kene?

“Ibeni ne mwenyu, mube ne mbakiso pakati kwenyu.”

Currently Selected:

Mako 9: KBTP

Highlight

Copy