Mako 8
8
Jesu unojisa bathu bali zwiwulu zwinna (4 000)
(Matewu 15:32-39)
1Mu mazhuba iyawo, kwakati mbunga nkulu we bathu wakubungana kakale, koga basina tjabangaja, Jesu kadana badiyiwa babe kati ku bali, 2“Ndohwila bathu ibaba zogwadza, ngobe babe ne mazhuba matatu banami, koga basina tjabanoja. 3Ha ndibapaladza kuti bayende ku mizi yabo bana zhala, banowokonegwa mu zila, ngobe bamwe babo bakadwa kule kule.”
4Badiyiwa babe bakadabila beti, “Apa ndiponi mu tjilambanyika itjetji, kungati nthu kawana tjiwunga tjingalizana kubajisa?”
5Jesu kababhuzwa kati, “Muna zwiwunga zwingana?” Bakadabila beti, “Zwili kutendeka.”
6Kadwa mbunga we bathu kati ugale pasi. Katola zwiwunga zwili kutendeka, kati aboka kazwipemula, kazwipa badiyiwa babe kuti bazwikobele bathu, ngono bakathama sa ikoko. 7Bakabe bana hwobe tukununu shomanana. Ngono wakati adzibokela, kadwa badiyiwa babe kati bakobele bathu. 8Bathu bakaja bakaguta. Kudwapo badiyiwa bakanunga mamburumburu, bakazhadza seme dzili kutendeka. 9Kwakabe kuna bathu bali zwiwulu zwinna. Kati abapaladza, 10kangina mu n'goro ne badiyiwa babe kayenda ku ntuthu we Dalimanuta.
Bafarasi banokumbila kuti Jesu abathamile tjilakidzo
(Matewu 12:38-42; 16:1-4)
11 Bafarasi bakatangisa kukangazhana na Jesu, bakanteya nge kunkumbila kuti athame tjilakidzo tjinodwa kudzimu. 12#Matewu 12:39; Luke 11:29Kafemela pezhugwi kwazo kati, “Ini tjizekugwana itjetji tjishaka tjilakidzo kene? Ndolebesa ndoti kumuli, akuna tjilakidzo tjinowopiwa tjizekugwana itjetji.”
13Ipapo kabasiya kangina mu n'goro kakale, ngono katjulukila seli.
Mbidzo ye Bafarasi ne ya Herode
(Matewu 16:5-12)
14Badiyiwa bakabe bakangang'wa kusenga zwiwunga kuzhe kwe tjing'ompela tjabakabe banatjo mu n'goro. 15#Luke 12:1Jesu kabatjenjedza kati, “Lingani mube ne njele ngekwe mbidzo ye Bafarasi ne ya Herode.”
16Bakalebeleka tje kwabo beti, “Unolebesiwa ngoti atina tjiwunga.”
17Jesu kaziba tjabanoalakana, ndizo kababhuzwa kati, “Ini mulebeleka ngekwe kuti amuna tjiwunga? Apa amuthu mukabonesesa, kakale mukahwisisa zwenyu kene? Mimoyo yenyu yakakukutala kene? 18#Jeremiya 5:21; Ezekiele 12:2; Mako 4:12Apa muna mesho koga mokong'wa bona, ne zebe munadzo koga mokong'wa hwa kene? Makangang'wa kene? 19Ndakati ndipemulila bathu bali zwiwulu zwishanu (5 000) zwiwunga zwishanu, makanunga mamburumburu mukazhadza seme ngana?”
Bakadabila beti, “Gumi lina mbili.”
20“Eke ndipemulila bali zwiwulu zwinna (4 000) zwiwunga zwili kutendeka, makanunga mamburumburu mukazhadza seme ngana?”
Bakadabila beti, “Dzili kutendeka.”
21Kati ku bali, “Amuthu mukahwisisa zwenyu kene?”
Jesu unopodza bhofu ku Bhetisaida
22Bakayenda ku Bhetisaida, bamwe bathu bakazhisa bhofu kuna Jesu, bakakumbila kuti alibhate. 23Wakabhata bhofu nge luboko, ngono kalikwebela kuzhe kwe nzi, kati athwila bhofu ilelo mate mu mesho, kakale alibiga maboko kalibhuzwa kati, “Kuna tjaunobona kene?”
24Nlume we bhofu kamilidza mesho, ngono kati, “Ndobona bathu, banonga miti inoyenda.”
25Jesu kabiga maboko awe kakale mu mesho e bhofu. Ipapo nlume we bhofu kalinga zubuyanana apodziwa, ngono kabona tjimwe ne tjimwe kwakatjena. 26Jesu kati ayende ku ng'umba iye, kapapha kati kunli, “Usitongo ngina mu mizi.”
Pita edabila kuti Jesu ndiani
(Matewu 16:13-20; Luke 9:18-21)
27Jesu ne badiyiwa babe bakapindila ku mizi imu ntuthu we Sizariya Filipi, kukati mu zila Jesu kababhuzwa kati, “Bathu banoti ndimi ani?”
28 #
Mako 6:14, 15; Luke 9:7, 8 Bakan'dabila beti, “Bamwe banoti ndimwi Johani we N'dubiki, koga bamwe bakati ndimwi Elija, bamwe banoti mu mmwe we balebesambeli.”
29 #
Johani 6:68, 69 Jesu kati ku bali, “Koga imwi moti ndimi ani?”
Pita kadabila kati, “Ndimwi Mesiya.”
30Jesu kabadwa kati bashete wabanobudza nge kukwe.
Jesu unolebeleka ngekwe kudziyila nenge lufu gugwe
(Matewu 16:21-28; Luke 9:22-27)
31Wakatangisa kubadiya eti, “Iye Nkololo we Nthu wakafanila kudziyidziwa nge zwithu zwinjinji alambiwe nge bakulu* nenge bapirisiti ne badiyi be nlayo ne kuti wakafanilo bulawa, ngono shule kwe mazhuba matatu, amuke kakale.” 32Wakalebeleka akatambunuka ngekwa ikoku. Ndizo Pita kankwebela ntome, ngono kantjemela. 33Koga Jesu kati eshanduka elinga ku badiyiwa babe katjemela Pita kati, “Idwa pandili Satani, ngobe aute uli ku lubizho gwe Ndzimu, koga ukuna gwe bathu.”
34 #
Matewu 10:38; Luke 14:27 Ipapo kadana mbunga we bathu kose ne badiyiwa babe, ngono kati ku bali, “Iye ungazha kundili ngaazwilandule, asenge tjileyanyo tjitje anditobele. 35#Matewu 10:39; Luke 17:33; Johani 12:25Iye unoshaka kuzwitjidza, butjilo gugwe gowonlashikila, koga iye unolashikigwa nge butjilo gugwe nge kwangu nenge Ndebo mbuya, unowogutjengeta. 36Kobuzilani kuti nthu athuwe shango yose, koga ebe elashikigwa nge butjilo gugwe kene? 37Ini nthu tjaangatenganya nge butjilo gugwe kene? 38Iye unobhakhwa nge shoni nge kwangu nenge matama angu mu bathu bangwenu basingagagwebgwe, kakale bali batjinyi, Nkololo we Nthu na iye unowombhatigwa nge shoni, ha ezha nge gudzo la Tate babe, ana batumwa be kudzimu bakayengemala.”
Currently Selected:
Mako 8: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
