Luke 14
14
Jesu epodza nge nsi we Sabata
1Nge mmwe nsi we Sabata, Jesu wakayenda kunoja ku ng'umba ye mmwe nlauli wakabe ali Nfarasi nkulu, ngono bathu bakabe bakanlinga nge njele. 2Ipapo mbeli kukwe kwakabe kuna nlume wakabe egwala bugwele gwe kuzwimba makumbo. 3Jesu kabhuzwa Bafarasi ne badiyi be nlayo kati, “Apa kumu nlayo kupodza nge nsi we Sabata, kene aa?”
4Koga bakanyalala, ndizo katola nlume iwoyo kampodza, kanletja kayenda. 5#Matewu 12:11Ipapo kababhuzwa kati, “Ndiupi wenyu ungati ana mwana uwe kene ng'ombe iye yawila mu tshime nge nsi we Sabata, kasiyiduse tjinyolotjo kene?”
6Koga bakasinshandule.
Kuzwiyisa pasi kwe nkokiwa ne buthu gwe nkoki
7Kukati Jesu ebona bakokiwa sekwa banotizhilila magalo apezhugwi kababudza tjifaniso, kati, 8#Makungulupeswa 25:6, 7“Ha mmwe angamukoka ku nzano we bukwe, musitongo tizhilila magalo apezhugwi, pamwe mmwe nkulu pakuli ungabe akokiwabo. 9Ha kwakajalo, nkoki iye wakamukoka mose, unowozha kati ku kuli, ‘Ipa nlume iwoyu tjigalo tjitjo.’ Ipapo, unowotangisa utola tjigalo tjipasi pasi wakabhakhwa nge shoni. 10Koga ha wakokiwa, gala mu tjigalo tjipasi, ndizo kowoti nkoki uwo ezha, unowoti ku kuli, ‘Nzwalani, tathila ku tjigalo tjipezhugwi.’ Ipapo, unowokudziwa mu mesho abose banoja nawe. 11#Matewu 23:12; Luke 18:14Nge kuti mmwe ne mmwe unozwikudza unowoyisiwa pasi, koga unozwiyisa pasi unowokudziwa.”
12Ipapo Jesu kati ku nkoki uwe, “Ha wathama nzano we zojiwa, kene zwe madekwana, usikoke bazwalani babo, kene bana ba tate babo, kene makamu awo kene babakidzani nawe bakafuma, ha ungathama ikoku, banowokukokabo, ngono ukabe walipiwa. 13Koga ha uthama nzano we zojiwa, koka bashayi ne zwilema ne mapofu. 14Ndizo unowokombolegwa, ngobe abangatubule kukulipa. Unowolipiwa pa kumuka kwe balulwami.”
Tjifaniso tje nzano nkulu we zojiwa
(Matewu 22:1-10)
15Kukati mmwe wa ibabo bakabe beja naye ku nzano be hwa ikoku, kati kuna Jesu, “Wakakombolegwa iye nthu unowoja tjiwunga mu bushe gwe Ndzimu.”
16Koga Jesu kan'dabila eti, “Mmwe nlume wakalulwamisila nzano nkulu we zojiwa, ngono kakoka bathu banjinji. 17Kukati nge tjibaka tje nzano katuma nlanda uwe kubudza ibabo bakabe bakokiwa kabadwa eti ‘Izhani, ngobe tjimwe ne tjimwe tjatjilulwama.’ 18Koga bose bakatangisa kukumbila mazwiibhatigo e kuti abangazhe. We kutanga kati, ‘Ndatenga nnda, ngono ndakafanila bhuda ndinoubona. Ndokumbila kuti undizwiibhatigwe.’ 19Mmwe kati, ‘Ndatenga ngabe dzili gumi, ngono ndimu zila kunodzibona. Ndokumbila kuti undizwiibhatigwe.’ 20Kakale mmwe kati, ‘Ndalobola nkadzi, ndizo andingazhe!’
21“Ndizo nlanda kabuya, kabikila tetshi uwe ikoku. Ipapo mweni we ng'umba kagwadzamoyo katuma nlanda uwe kati, ‘Yenda ulibilidza ku zila ne zijana dze nzi, uzhise ngeno bashayi ne zwilema ne mapofu.’ 22Nlanda kati abuya kadwa tetshi uwe kati, ‘Tate, tjamaleba tjayitiwa, koga kutjina magalo zwako.’ 23Ipapo tetshi kadwa nlanda uwe kati, ‘Yenda kuzhe ku zila hwulu ne ku zijana ne mu matjokotjoko uzhise bathu mu ng'umba yangu kuti izhale. 24Ndokubudza, akuna mmwe wa ibabo bathu bakakokiwa kutanga unowolabila zojiwa zwe nzano wangu.’ ”
Kodwani kube n'diyiwa wa Jesu
(Matewu 10:37-38)
25Mibunga minji yakabe iyenda na Jesu, katendebuka kati, 26#Matewu 10:37“Ha mmwe ezha kundili, ngono asingandide kupinda tate babe, na mmeyabe ne nkadzi uwe ne bana babe ne azwadzi dzidze kene gugwe butjilo dumbu, aangabe n'diyiwa wangu. 27#Matewu 10:38; 16:24; Mako 8:34; Luke 9:23Iye usingasenge tjileyanyo tjitje kanditobela, aangabe n'diyiwa wangu.
28“Ndiani wenyu ungati eshaka baka thungamakole, kasigale pasi kutanga kulingisisa themba, kubona kuti kene una mari e kuipedza kene? 29Ha angatangisa kuibaka koga kasiyipedze, bose banoibona banowonseka. 30Beti, ‘Iwoyu nthu wakatangisa kubaka, koga kasitubule kupedza.’
31“Kene ndiupi mambo, unonobhayana ne mmwe mambo, usingawogala pasi kutanga, kakumbula kuti kene unowotubula, ana babhayani bali zwiwulu zwili gumi (10 000), kulingisana ne unon'nginilila ana babhayani bali zwiwulu zwili makumi mabili (20 000) kene? 32Ha asingatubule kuzwigwila, unowotuma bamilili babe ipapo ku tjita tjitje tjitjikule, kakumbila mbakiso. 33Sa ikoko, aungabe n'diyiwa wangu, usasiya kose kwaunako.”
Mwenyu wakashuluka
(Matewu 5:13; Mako 9:50)
34“Mwenyu wakalulwama, koga ha ungashuluka ungabgwilizigwa njo wawo tjini kene? 35Aungaulonge mu minda, kene kuli kuushanganya ne nthudze. Bathu banoulasha. Iye una zebe dze kuhwa, ngaahwe.”
Currently Selected:
Luke 14: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
