Luke 13

Shandukilani ku Ndzimu, kene lobani

1Kwakabe kulipo bamwe bathu tjibaka itjetjo, bakabudza Jesu ngekwe Bagalili Pilato baakabulaya batjapa Ndzimu zwibhayilo. 2Jesu kabadabila eti, “Mokumbula kuti Bagalili ibabo bakabe bali batjinyi bakulu kupinda Bagalili bamwe bose ngobe bakafa sa ikoko kene? 3Aa, ndomubudza nditi koga kuzhe kwe kuti mushandukile ku Ndzimu, namwibo mowoloba mose saibo. 4Kene ibabo bali gumi lina bali zhanakadzi (18) bakafa, bawigwa nge thungamakole mu Siloame, mokumbula kuti bakabe bana nlandu kupinda bamwe bose bakabe begala mu Jerusalema kene? 5Aa, ndomubudza nditi koga kuzhe kwe kuti mushandukile ku Ndzimu namwibo mowoloba mose saibo.”

Tjifaniso tje mpaya usingazwale

6Ipapo kaleba tjifaniso etji kati, “Mmwe nthu wakabe ana mpaya wakadzwagwa mu nnda uwe we mizhambi, ngono kayenda kunoshola mitjelo muuli, koga kasiwane tjimwe. 7Ndizo kati ku ntjengeti we nnda we nzhambi, ‘Bona, kwabe makole matatu ndizha kuwoshola mitjelo mu mpaya iwoyu, koga ndisingawane tjimwe. Uuteme uulige! Unozanisilani mavu?’ 8Ntjengeti we nnda iwoyo kashandula eti, ‘Tetshi wangu, muuletjedze gole ileli ndiulimile ndiulonge nthudze. 9Ha ungazwala mitjelo gole linozha, kowobe kwakalulwama! Ha usingazwale, ipapo muuteme muulige.’ ”

Jesu unopodza nkadzi we tjilema nge nsi we Sabata

10Jesu wakabe ediya mu imwe ng'umba ye mitembezelo nge zhuba le Sabata ngono kukabe kuliyapo 11mmwe nkadzi wakabe akalemadziwa nge meya mbi makole ali gumi lina makole ali zhanakadzi (18). Wakabe akagongonyala, asingatubule kuzwitambunudza. 12Ngono Jesu kati embona kan'dana kan'dwa kati, “Nkadzi, wasunungugwa mu bulema gugo.” 13Ipapo kambiga maboko tjinyolotjo nkadzi iwoyo katambunuka, kakudza Ndzimu.

14 # Kufuluka 20:9, 10; Matama 5:13, 14 Ngono ntungamili we ng'umba ye mitembezelo kazhala bushongola, ngobe Jesu apodza nkadzi nge nsi we Sabata, kati ku bathu, “Kuna mazhuba matathatu e kushinga. Ndizo izhani muwopodziwa mu mazhuba iyawo, kusimu nsi we Sabata.”

15She kan'dabila eti, “Batjengedzi ndimwi! Apa mmwe ne mmwe wenyu aatoti mu nsi we Sabata kasunungula ng'ombe iye kene donki iye mu danga kaitakulila kuzhe kanoing'wisa kene? 16Ngono apa nkadzi iwoyu, tjizekugwana tja Abhurahama, wetjinga wakasungwa ndi Satani makole ali gumi lina makole ali zhanakadzi, asisunungugwe mu nsi we Sabata muna tjakabe tjakansunga kene?” 17Kati eleba ikoku zwita zwizwe zose zwikabhakhwa nge shoni, koga bathu bakashathiswa nge zwithu zose zwinotjenamisa zwaakabe eyita.

Tjifaniso tje mbewu tukununu

(Matewu 13:31-32; Mako 4:30-32)

18Ipapo Jesu kabhuzwa kati, “Bushe gwe Ndzimu gongani kene? Ndowogufanidzanya ngeni? 19Gonga mbewu tukununu ye lusaba, yakati nthu kaitola kaidzwala mu nnda uwe. Ngono ikakula ikabe denje, ngono nyuni dzinowuluka dzikabaka mashaka mu thabi dzalo.”

Tjifaniso tje mbidzo

(Matewu 13:33)

20Kapapha kati, “Ndowofanidzanya bushe gwe Ndzimu ngeni? 21Gonga mbidzo yakatogwa nge nkadzi kaishanganya ne bgwisa bunjinji gwe tjiwunga, bhelelo bgwisa gose gukabila.”

Nkoba wakamanikana

(Matewu 7:13-14, 21-23)

22Ipapo Jesu kapalama mizi ne mizana ediya ali mu zila iye eyenda ku Jerusalema. 23Mmwe kambhuzwa kati, “She, apa kowotjidziwa bathu bashomanana koga kene?”

Ngono kati ku bali, 24“Gwisani tjose kungina nge nkoba wakamanikana, ngobe ndomubudza nditi, banji banowogwisa kungina, koga abatowotubula. 25Kowoti koga mweni we ng'umba amilika azhalila nkoba, mowoma kuzhe mukokodza muti, ‘She, mutizhulile,’ koga unowodabila eti, ‘Anditoziba kuti modwa ngayi.’ 26Ipapo mowoti, ‘Takaja tikang'wa namwi, kakale makadiya mu zila dzedu.’ 27#Njimbo 6:8Koga unowodabila eti, ‘Ndomubudza, anditoziba kuti modwa ngayi. Idwani pandili, bashingi be mbipo ndimwi.’ 28#Matewu 22:13; 25:30#Matewu 8:11, 12Ipapo mowolila mukalobanya meno nge kugwadziwa kukulu, mubona Abhurahama na Isaki na Jakubo na bose balebesambeli, bali mu bushe gwe Ndzimu koga imwi malashigwa kuzhe. 29Bathu banowozha bedwa ku bhezhuba ne ku golombedzo ne ku bunandzwa ne ku burwa, ngono banowogala pasi bakaja zojiwa mu bushe gwe Ndzimu. 30#Matewu 19:30; 20:16; Mako 10:31Ngono bonani, bamwe bashule banowobe bambeli ne bamwe bambeli banowobe bashule.”

Buyendasi gwa Jesu ngekwe Jerusalema

(Matewu 23:37-39)

31Nge tjibaka itjetjo, bamwe Bafarasi bakazha kuna Jesu bakati kunli, “Bhuda ipapa uyende ntome ngobe Herode unoshaka kukubulaya.”

32Jesu kadabila kati, “Yendani munobudza phungubgwe iyeyije kuti, ‘Ndowodusa meya mibi, apodza bathu nasi na mangwana, ngono mu zhuba le butatu ndowowidza nshingo wangu.’ 33Nekwakajalo, ndakafanila yenda nasi na mangwana na nn'gwani, ngobe dumbu, akuzofanila kuti nlebesambeli ungafila kuzhe kwe Jerusalema.

34“Jerusalema! Jerusalema wee! Iwe unobulaya balebesambeli ukakikithidza nge mabgwe batumiwa ku kuli, ndikangana ndiyemula kukubunganya bana babo, se hwuku ibubatila hwukwana, koga ulamba? 35#Njimbo 118:26Bonani, ng'umba yenyu yabe dongo. Ndomubudza, amutowondibona kakale, kudzina muti, ‘Wakakombolegwa iye unozha nge zina la She!’ ”

Currently Selected:

Luke 13: KBTP

Highlight

Copy