Luke 12

Jesu unotjemelela bathu bupitipiti

(Matewu 10:26-27)

1 # Matewu 16:6; Mako 8:15 Kukati kutjakajalo zwiwulu zwinjinji zwe bathu, zwatjikubungana zotshambana, Jesu katangisa kulebeleka ne badiyiwa babe kutanga eti, “Muyele njele mbidzo* ye Bafarasi butjengedzi. 2#Mako 4:22; Luke 8:17Akuna tjakazwimbiwa tjisingawozumbunugwa, kene tjakasumbikika tjisingawozibgwa. 3Ndizo tjamaleba mu zhalima tjowohwika mu tjedza ne tjamunoleba munyebezela mu ng'umba, tjowoandamisiwa.”

Iye wamakafanila kutja

(Matewu 10:28-31)

4“Ndomubudza bazwalani bangu nditi, musitje ibabo banobulaya mbili, koga shule kwa ipapo kusina tjabangadwilila bakatjithama. 5Koga ndowomutjenjedza kuti wamakafanilo tja ndiupi. Itjani iye unoti shule kwe kubulaya kabe ne simba lekuposela mu moto usingadzime. Ee, ndomubudza, muntje.

6“Apa zhazho shanu adzitotengesiwa nge mapeni mabili kene? Koga akuna ne ing'ompela yadzo inokanganika mbeli kwe Ndzimu. 7Nenge mavudzi e misholo yenyu na iwobo akabagwa. Ndizo musitje ngobe themba yenyu inopida themba ye zhazho njinji.”

Kuma na Kirisiti ne kunzwilandula

(Matewu 10:32-33; 12:32; 10:19-20)

8“Ndomubudza nditi, iye unoleba kuti unami mbeli kwe bathu, Nkololo we Nthu unoleba kuti unaye mbeli kwe batumwa be Ndzimu. 9Koga iye unondizwilandula mbeli kwe bathu unowozwilandugwa mbeli kwe batumwa be Ndzimu.

10 # Matewu 12:32; Mako 3:29 “Ngono mmwe ne mmwe unoleba dama lakabipa ngekwe Nkololo we Nthu unowozwiibhatigwa, koga iye unoleba kwakabipa ngekwe Meya yakayengemala aatowozwiibhatigwa.

11 # Matewu 10:19, 20; Mako 13:11; Luke 21:14, 15 “Ha bemuzhisa kumusekesa mbeli kwe ng'umba dze mitembezelo ne mbeli kwe balauli na mbeli kwa boshe, musidziyidzike ngekwe kuti mowodabila muitini kene kuti mowolebani, 12ngobe Meya yakayengemala inowomudiya tjamunowoleba nge tjibaka itjetjo.”

Tjifaniso tje nfumi we tjilengwe

13Mmwe nlume mu mbunga kati kuna Jesu, “N'diyi, budzani nkulu wangu akobane nami lukata.”

14Koga Jesu kan'dabila eti, “Nlume ndiwe, ndiani wakandipa fanilo dze kusumikilisa kene kukoba lukata pakati kwenyu!” 15Ipapo kati ku bali, “Lingani! Muzwilise mu bugovu gose, butjilo gwe nthu ate guli mu bunji gwe thundu iye.”

16Ngono kababudza tjifaniso kati, “Nnda we mmwe nfumi wakadusa zojiwa zwinjinji. 17Nfumi iwoyo kakumbula eti, ‘Ndowothamani kene? Andina pathu pandingabiganya zojiwa zwangu.’ 18Ipapo kati, ‘Tjandinowothama ndi etji: Ndowokolomola matula angu, ngono abaka makulu, muali ndowobiganya mathunde angu wose ne thundu yangu yose. 19Ndizo ndowozwidwa nditi ndina thundu njinji mbuya dzakabigigwa makole manjinji. Anditowodziyidzika, ndowoja ang'wa ashatha.’ 20Koga Ndzimu ukati kunli, ‘Tjilengwe ndiwe, busiku gwa nasi butjilo gugo gowotogwa. Thundu iyo inowobe yani kene?’ 21Oku ndiko sekwa kunowobe iko ku mmwe ne mmwe unozwibiganyila thundu koga asakafuma muna zwe Ndzimu.”

Musidziyidzike

(Matewu 6:25-34)

22Ipapo Jesu kati ku badiyiwa babe, “Ndizo ndomubudza nditi, musidziyidzike ngekwe butjilo gwenyu, kuti mowojani kene ngekwe mibili yenyu, kuti mowoambalani. 23Butjilo gopinda zojiwa ne mbili unopinda zwiambalo. 24Kumbulani makungubo, aatodzwala kakale aatovuna, aana matula koga Ndzimu unoajisa. Imwi ngono mopinda nyuni kungapani kene! 25Ndiani wenyu ungati ngodziyidzika nge moyo, kapaphidza kuli kutukununu bulefu gwe butjilo gugwe kene? 26Se musingake mukashinga ikoku kuthu kutukununu, modziyidzikilani ngekwa zose zwimwe kene? 27#1 Bomambo 10:4-7; 2 Zwiyitikalo 9:3-6Kumbulani maluba sekwa anokula. Aatoshinga kene kuli luka. Koga ndomubudza kuti, na iye Solomoni mu bubuya gugwe gose, aazobe akaambala se ling'ompela lawo. 28Ha kuli iko Ndzimu sekwa unoambadza bushwa gwe shango, guyapo nasi ngono mangwana gulashigwa mu moto, unowomuambadza kukulu kungapani kene, imwi bathu be kugalamoyo kutukununu!

29“Ndizo musigale muti mowojani kene mowong'wani kene kuli kudziyidzika mu meya mushaka tjamunowoja ne tjamonowong'wa. Musidziyidzike mu mimoyo ndiko. 30Zwitjaba zose zwe shango zotizhilila izwezwi zwakajali, koga Tate benyu banoziba kuti mozwishaka. 31Mu bumo gwa ikoku shakani bushe gwabo, ngono zwithu izwezwi zowobe zwenyu naizobo.”

Fumwa kudzimu

(Matewu 6:19-21)

32“Musitje, imwi ngubi tukununu ngobe hwuda kwa Tate benyu kumupa bushe. 33Tengesani thundu dzenyu, ngono mukobele bashayi. Muzwishakile zwikwama zwisingawoshakala ne fumwa kudzimu isingawopela, pasingasedzele mbava kakale sola paisingaje. 34Ipapo pana fumwa yenyu, ndipo panowobe ne mimoyo yenyubo.

Kulinda

35 # Matewu 25:1-13 “Ambalani mupelele, muzwilulwamisile kushinga ne mavone enyu agale ethuta, 36#Mako 13:34-36se balanda bakalindila tetshi wabo kudwa ku nzano we bukwe, kuti ndizo ati ezha ekokodza, banzhulile nkoba tjinyolotjo. 37Bakakombolegwa balanda ibabo banowowang'wa ndi tetshi wabo ha ebuya bakalinga. Ndolebesa ndoti kumuli, unowozwilulwamisa kabapakulila, kabagadza pa tafuli, kabapa zojiwa. 38Bakakombolegwa balanda ibabo banowoti tetshi wabo kabawana bakazwilulwamisa, kene angaswika pakati kwe busiku kene mazhokuyedza. 39#Matewu 24:43, 44Koga zibani woku, ha mweni we ng'umba akabe aziba tjibaka mbava tjainowozha nditjo, unobe asakaletja ng'umba ipkhwanyiwa. 40Ndizo namwibo galani makazwilulwamisa, ngobe Nkololo we Nthu unowozha nge tjibaka tjamusakankumbula.”

Nlanda unogalikabgwe ne nlanda usingagalikebgwe

(Matewu 24:45-51)

41Pita kabhuzwa kati, “She, apa mobudza iswi koga tjifaniso itjetji, kene mmwe ne mmwe?”

42She kashandula eti, “Ndiupi ntjengeti wakatjenjela unogalikabgwe, unoti tetshi kampa simba mu balanda bamwe kupa balanda gobe labo le zojiwa nge tjibaka tjakalingisana? 43Wakakombolegwa nlanda iwoyo unowowang'wa ndi tetshi uwe eshinga sa ikoko. 44Ndomubudza malebeswa, nditi, unowompa masimba mu zwithu zose zwaanazo. 45Koga ha nlanda iwoyu angazwidwa eti, ‘Tetshi wangu unononoka kuzha,’ ngono ipapo ekowotangisa kuloba balandalume ne balandakadzi, eja eng'wa edakwa, 46tetshi we nlanda iwoyo unowozha mu zhuba laasakankumbula nenge tjibaka tjaasingazibe. Unowonloba kunogwadza kan'gadza ne basingagalemoyo.

47“Iwoyo nlanda unoziba kuda kwa tetshi uwe koga asingathame tjinoshakwa ndi tetshi uwe, unowolobgwa shamu njinji. 48Koga iye usingazibe ngono ethama zwithu zwaakafanila hwisigwa zogwadza, unowolobgwa shamu shomanana. Muna iye wakapiwa kunji, kowoshakwa kunji, kakale muna iye unotjengeteswa kunji, kunji kwazo kowoshakwa munli.”

Jesu unozhisa kuthubukana

(Matewu 10:34-36)

49“Ndakazhisa moto mu shango, ngono ndoyemula seni kuti ungabe wabhatidziwa kale! 50#Mako 10:38Koga ndina kudubikiwa kwe kudziyidzika kwandakafanila dubikiwa, ndizo ndi mu buyendasi gungapani kuswikila kuwila! 51Apa mokumbula kuti ndazhisa mbakiso mu shango kene? Aa, ndomubudza, ndazhisa kuthubukana. 52Kudwila ngwenu nsha we bathu bashanu unowothubukana, batatu begwisana ne babili ne babili begwisana ne batatu. 53#Mika 7:6Banowothubukana, tatayi begwisana ne nkololo ne nkololo egwisana na tatayi, mayi begwisana ne nkololokadzi ne nkololokadzi egwisana na mayi, mmezwale begwisana ne nlongo ne nlongo egwisana na mmezwale.”

Kuhwisisa misi

(Matewu 16:2-3)

54Kati ku mbunga we bathu, “Moti mubona gole limilika kunomila zhuba, tjinyolotjo mukati, ‘Vula inowona,’ ngono ikana. 55Kakale phepo ye Burwa ha ihwuhwudza, moti kowopisa kwazo, ngono kukabe iko. 56Batjengedzi ndimwi! Mohwisisa kulingika kwe shango ne nge kwa pezhugwi. Ini musingahwisise kuti misi ino inodwani kene?”

Uzwigadzanye ne tjita tjitjo

(Matewu 5:25-26)

57“Ini musingatubule kuzwizibigwa tjakalulwama? 58Uti ha ukwebegwa ku nlayo nge wakutilika nlandu, gwisa kwazo kudumana naye mu zila, kuti ungadwa ekukwebela ku nsumikilisi, ngono nsumikilisi kakuyisa ku mbhati, mbhati kakuyisa ku ng'umba ye busungwa. 59Ndokubudza malebeswa, autowobhuda mukati kudzina walipa mari wose.”

Currently Selected:

Luke 12: KBTP

Highlight

Copy