Luke 15

Tjifaniso tje pkhwizi yakamila

(Matewu 18:12-14)

1 # Luke 5:29, 30 Bakhethisi ne batjinyi bakabe besedzela bose panli kun'hwilila. 2Koga Bafarasi ne badiyi be nlayo bakang'ong'ola beti, “Nlume iwoyu unoamutjila batjinyi, kakale kaja nabo.” 3Ndizo Jesu kababudza tjifaniso, eti:

4“Ndiupi nlume pakati kwenyu, ungati ana pkhwizi dzili zana ling'ompela (100) ebe elashikigwa nge ing'ompela yadzo, kasisiye dzili makumi ali zhanalume ana dzili zhanalume (99) mu shango, kanoshaka pkhwizi iyeyo yalashika kudzina eibona kene? 5Ngono ha aibona, unoipika nge kushatha. 6Ha eswika kanyi, unodana bazwalani babe ne babakidzani naye, kabakubunganya kati ku bali, ‘Shathani nami, ngobe pkhwizana yangu yakabe yamila ndaibona.’ 7Koga saikoko ndomubudza nditi, kowobe ne kushatha kudzimu, ha ntjinyi ng'ompela eshandukila matjinyo awe, kupinda balulwami bali makumi ali zhanalume ana bali zhanalume (99) basingashetane ngokushanduka.”

Tjifaniso tje mari e loso akamila

8“Kene ndiupi nkadzi una maloso e siliva#15:8 siliva: siliva ling'ompela lakabe lakalizana ndipo ye zhuba ling'ompela. e mazhuba ali gumi, unoti alashikigwa nge limwe lawo kasibhatidze luvone, katshwayila ng'umba, kalishaka nge njele kudzina elibona kene? 9Ngono ha alibona unodana bazwalani babe be tjikadzi ne babakidzani naye, ebakubunganya eti ku bali, ‘Shathani nami, ngobe loso langu le siliva lakabe lamila ndalibona.’ 10Koga sa ikoko, ndomubudza nditi, batumwa be Ndzimu banoshatha ha ntjinyi nng'ompela eshandukila matjinyo awe.”

Tjifaniso tje bakololo bakamila

11Jesu kapapha kati, “Kwakabe kuna mmwe nlume ana bakololo bali babili. 12Ntjetjana kati kuna tate babe, ‘Tate, mundipeni langu gobe mu thundu yenyu lakalingisana nami.’ Ndizo tate babo bakabakobanya thundu yabo. 13Shule kwe mazhuba mashomanana, nkololo ntjetjana kakubunganya thundu iye yose katola gwendo, kayenda ku shango ikule kule, ngono ikoko kazanisa fumwa iye mu butjilo gusingashathise. 14Ndizo kati azanisa kose kwaakabe anako, kukabe ne bhamba gulu mu shango iyeyo, katangisa kudziyila. 15Ngono wakamilika kazwiyisa ku mmwe nlume we shango iyeyo, wakantumila ku nnda uwe kunopa hwotji dzidze zojiwa. 16Kayemula kuja zojiwa zwinojiwa ne hwotji, koga akuna wakampa tjimwe. 17Koga kati ekumbula kati, ‘Bangana balanda ba tate bangu banoja zojiwa zwikasala, koga imi pano ndofa nge zhala! 18Ndowomilika ayenda kuna tate bangu, ngono ati ku bali, Tate, ndakatjinyila kudzimu kose namwi. 19Andizotjafanila dang'wa nkololo wenyu mundibhate se mmwe we bashingi benyu.’ 20Ndizo kamilika kayenda kuna tate babe.

“Koga kukati atji thambo, tate babe bakambona, ngono bakanhwila ngoni kwazo. Bakatizhilila nkololo wabo, bakan'gumbatila bakamputa. 21Nkololo kati kuna tate babe, ‘Tate, ndakatjinyila kudzimu kose namwi. Andizotjafanila kudang'wa nkololo wenyu.’ 22Koga tate babe bakati ku bashingi babo ‘Libilidzani! Zhisani tjiambalo tjakanaka kupinda zose mun'ambadze itjo. Mun'ambadze ring'i ne khwebana. 23Zhisani gondolo lakakola mulibhaye. Ngatijeni tishathe. 24Ngobe nkololo wangu iwoyu, wakabe afa koga unotjila kakale, wakabe amila koga wabong'wa.’ Ndizo bakatangisa nzano.

25“Nge tjibaka itjetjo nkololo hwola wakabe ali ku minda. Kati ezha pejo ne nzi, kahwa kumbiwa kuzang'wa. 26Ndizo kadana mmwe we balanda kambhuzwa kuti koshingikalani. 27Ngono nlanda kan'dabila eti, ‘Nnung'una uwo wabuya, ngono tate babo mbhayila gondolo lakakola, ngobe wabuya etjila kakale ezwihwa.’

28“Nkuluwe kagwadzamoyo kalamba ngina mu nzi, ndizo tate babe bakabhuda bakanonteta. 29Koga kadabila tate babe eti, ‘Lingani! Makole wose iyawa ndakabe ndimushingila kakale andithu atongo tjuluka milayo yenyu. Koga amuthu mukatongo ndipa kene tjili tjibudzana kuti ndithamile bakwinya bangu zojiwa. 30Koga nkololo wenyu iwoyu wakazanisa thundu yenyu nge fukula dzinozwitengesa unoti eswika mu nzi mukambulayila gondolo lakakola!’ 31Tate babe bakadabila beti, ‘Nkololo wangu, iwe unami misi yose, na zose zwandinazo nge zwizo. 32Ndizo kuzana ne kushatha kofanila, ngobe nnung'una uwo iwoyu, wakabe afa koga wotjila kakale, wakabe amila koga wabong'wa.’ ”

Currently Selected:

Luke 15: KBTP

Highlight

Copy