Bahebheru 4

Kunyaluluka kwe bathu be Ndzimu

1Ndizo ngakuti kugadziwabgwe mukungina mu kunyaluluka kutjiyapo, tiyeleni njele, kuti kusibe ne mmwe wenyu unowowang'wa akong'wa kunoswika mu kunyaluluka ikoko. 2Ngobe ndebo mbuya yakazhabo ku tili koga se ku bali, koga dama labakahwa alizobabhatsha nge tjimwe, ngobe lakasheta kugalamoyo mu bahwi balo. 3#Njimbo 95:11Ndizo iswi takagalamoyo tongina mu kunyaluluka ikoko sekwa wakati,

“Sekwa ndakatuna mu kugwadzamoyo,

‘Abatowongina mu kunyaluluka kwangu,’ ”

nenguba mishingo yawo yakafidziwa pa kubumbiwa kwe shango. 4#Kutangisa 2:2Ngobe una pawakaleba ngekwe zhuba le kutendeka uti, “Ndzimu wakanyaluluka mu zhuba le butendeka mu mishingo yawo yose.” 5#Njimbo 95:11Kakale ipapa ukati, “Abatowongina mu kunyaluluka kwangu.” 6Ndizo kutjina bakasalila kungina mu kunyaluluka ikoku zwako ne bakahwa ndebo mbuya kutanga abazotubula kungina, kuli nge kusahwa, 7#Njimbo 95:7, 8ndizo Ndzimu unobiga limwe zhuba, linoyi “Nasi.” Wakalileba shule kwe makole manjinji etuma Dafite sekwa kalebgwa kuyi,

“Nasi, ha muhwa hwi lawo,

musikukutadze mimoyo yenyu.”

8 # Matama 31:7; Joshuwa 22:4 Ngobe Joshuwa ha akabe abapa kunyaluluka, Ndzimu unobe usakati shule ukaleba ngekwe limwe zhuba. 9Ndizo wali kunyaluluka nge Sabata kutjakasalila bathu be Ndzimu; 10#Kutangisa 2:2ngobe iye unowongina mu kunyaluluka kwe Ndzimu, unowobe enyaluluka mu mishingo iye, se Ndzimu wakanyalulukabo muna yawo. 11Ngatigwiseni tjose kuti tingine mu kunyaluluka ikoko, kuti kusibe ne mmwe wedu unowokonedziwa nge zila yakajalo ye kusahwa.

12Ngobe dama le Ndzimu lotjila, kakale loshinga, lopitsha kupinda bukanu guna ntha dzinotema mbili, lobhaya likathubukanya meya ne butjilo, mongo ne malunganilo. Losumikilisa njemulo ne mikumbulo ye moyo we nthu. 13Akuna tjakasumbikala ku Ndzimu, tjimwe ne tjimwe mu lubumbo gose tjakaambuka, tjipatjena mu mesho awo, iwo watakafanila kuzwileba mbeli kwawo.

Jesu ndiye mpirisiti nkulu

14Ndizo setina mpirisiti nkulu kwazo wakapinda epalama zhuzhugwi, iye Jesu Nkololo we Ndzimu, ngati bhatilileni mu kugalamoyo kwatinoleba titi tinako. 15Ngobe atina mpirisiti nkulu usingatubule kuhwisisa kusasima kwedu, koga tina wakalikiwabo saswi, koga kabe usina tjibi. 16Ngatisedzeleni ngono ku tjigalo tje bushe gwe ngoni, nge kugalamoyo kuti tiamutjile mahwilozogwadza ne ngoni mu tjibaka tjatinowobe tishaka bhatsho.

Currently Selected:

Bahebheru 4: KBTP

Highlight

Copy