Bahebheru 3

Jesu nkulu pana Mushe

1Ndizo wali zwikamu zwangu zwakayengemala, imwi makadang'wabo nge Ndzimu, kumbulani Jesu, iye ntumwa kakale ali Ntungamili we bapirisiti we kugalamoyo kwedu. 2#Mbalo 12:7Wakabe egagwabgwe nge wakambiga mu mamo iyawa, koga sa Mushe akabe eshinga nshingo uwe mu ng'umba ye Ndzimu nge kugalikabgwe. 3Ngobe Jesu wakawanika efanigwa nge gudzo gulu kupinda Mushe koga se mbumbi we ng'umba ana gudzo kupinda ng'umba yaakabumba. Ndizo Jesu wakawanika akalizana kulumbidziwa kupinda Mushe. 4Ngobe ng'umba imwe ne imwe ina wakaibumba, koga mbumbi we zwithu zose Ndzimu. 5Mushe wakabe egalikabgwe mu ng'umba ye Ndzimu ali nlanda, kutendeka ngekwe zwithu zwakabe zwitjowolebgwa shule. 6Koga Kirisiti se ali Nkololo wakabe egalikabgwe mu ng'umba yose. Iswi ti ng'umba iye ha tibhata tisimisa kukulumbidzika kwedu ne kuzwiloba ifuba mu kugalabgwe kwedu.

Kutjenjedza ngekwe kusagalamoyo

7 # Njimbo 95:7-11 Ndizo wali, se Meya yakayengemala iti,

“Nasi ha muhwa hwi lawo,

8musikukutadze mimoyo yenyu, se pa bupanduki,

mu zhuba le kulikiwa mu tjilambanyika,

9pakati bobatategulu benyu bakandilika,

ngono bakabona mishingo yangu makole ali makumi manna.

10Ngekwa ikoko ndakagwadzilamoyo tjizekugwana itjetjo ngono ati,

‘Banogala bepambuka mu mimoyo yabo.

Abathu bakaziba zila yangu.’

11Sekwandakatuna mu kugwadzamoyo kwangu nditi,

‘Abatowongina mu kunyaluluka kwangu!’ ”

12Yelani njele zwikamu kuti kusidwe kukabe kuna mbipo mu mmwe wenyu, asingagale moyo, emutungamilila mu zila inomudusa mu Ndzimu unotjila. 13Koga kulumbidzanani mazhuba wose akutjayi “Nasi” kuyita kuti kusibe ne wenyu unokukutadziwa nge butjengedzi gwe jinyo. 14Ngobe tina gobe muna Kirisiti ha tibhata tisimisa kunoti kubupelo mu bugalimoyo gwedu gwatakabe nago kutanga.

15 # Njimbo 95:7, 8 Sekwa kwakalebgwa kuyi,

“Nasi ha muhwa hwi lawo,

musikukutadze mimoyo yenyu se pa bupanduki.”

16 # Mbalo 14:1-35 Apa ndiboani bakahwa ngono bakaupandukila kene? Apa ate ibabo bose bakadwa mu Egipiti bakatungamigwa ndi Mushe kene? 17Apa ndiboani Ndzimu bawakagwadzilamoyo makole ali makumi manna kene? Ate ibabo bakatjinya bakaloba mu tjilambanyika kene? 18Ndzimu wakatunila boani kuti abatowongina mu kunyaluluka kwawo, ha isi ibabo basakauhwa kene? 19Ndizo tobona kuti abazotubula ngina mu kunyaluluka, ngobe bakabe basagalamoyo.

Currently Selected:

Bahebheru 3: KBTP

Highlight

Copy