Kutangisa 49

Matama e bupelo a Jakubo

1Jakubo kadana bakololo babe kati ku bali, “Kubunganani kuti ndimubudze tjinowoshingikala mu mazhuba anozha.

2“Kubunganani mubhulutane,

imwi bakololo ba Jakubo,

hwililani tate benyu Iziraela.

3“Rubheni, iwe u mbano yangu,

u simba langu ne ntjelo we kuzwihwa kwangu

unopinda bose nge mamo ne simba.

4Unokubhungana se vula,

autowobe utji nkulu,

ngoti wakatatha bulawo gwa tate babo,

ukatemapadza malalo angu.

5“Simiyoni na Levi bana be nkadzi,

mathumo abo zwibhayano zwe phipiti.

6Ngandisiwanike mu nlangano wabo,

meya yangu usishangane ne gubungano labo,

ngoti mu kugwadza moyo kwabo bakabulaya bathu,

bakathubula ngabe makanyu besudza.

7Kugwadza moyo kwabo ngakube bhiso, ngoti kotjisa,

ne bushongola gwabo, ngoti gwakabipa.

Ndowobakobanya muna Jakubo,

abapaladza mu Iziraela.

8“Juda, bana ba tate babo banowokukudza,

tjiazha tjitjo tjowobe pa hwulo dze zwita zwizo,

bana ba tate babo banowokuthigamila.

9 # Mbalo 24:9; Zumbunulo 5:5 Juda i shumbana,

unoshandukila ku guwu lilo wabulaya.

Unolala pasi, kazwitambunudza se shumba.

Unonga shumbakadzi, ndiani ungammusa kene?

10Ludozo gwe bushe agutowobhuda muna Juda,

ne swimbo ye bushe aingabhude pakati kwe bana babe,

kuswikila wakagulingisana ezha,

njudzi dzose dzowonteedza.

11Unosungilila donkana iye pa nzhambi,

donkana e isungilila pa nzhambi washalugwa.

Unosuka zwiambalo zwizwe nge nkumbi,

jasi lile unolisuka nge nkumbi nshaba se malopa.

12Mesho awe mashabashaba ngo laladzisa,

meno awe matjena ngo ng'wisa nkaka.

13“Zebuluni unowogala mu tjekelo dze gungwa,

unowobe maswikilo e zwikepe,

n'gathu uwe unowobe ku Sidoni.

14“Isakari i donki yakasima,

ilele pakati kwe matanga.

15Wakabona kuti magalo e kunyaluluka mabuya,

ne kuti shango yakanaka,

ndizo kaduma kupika ntolo

kabe nlanda unoshingisiwa zwakasima.

16“Dani unowosumikilisa bathu babe,

se tjimwe tje itjaba tje Iziraela.

17Dani unowobe nyoka i pa hwunde ye zila,

ipakupaku tji mu zijana,

tjinoluma mbizi mu itshitshino,

ntathi wayo kawila pasi.

18“Ndakalindila jidzo lenyu, Yahwe.

19“Gadi unowonginiligwa nge gupo le batoleli,

koga unowobalonda kabanginilila.

20“Asheri unowobe ne zojiwa zwi pezhugwi,

unowobe ne zojiwa zwakafanila mambo.

21“Nafutali i phala hadzi yakasununguka,

inozwala phalana dzakanaka.

22“Josefa lutabi gunozwala,

lutabi gunozwala gupa nsenya,

thabi dzidze dzotatha guma.

23Babhayani nge misebe bakan'nginilila kunotjisa,

bakamposa bakammanikidza.

24Koga dati lile likasitongozunguzika,

ne maboko awe akathamiwa majatu,

nge maboko a Masimbawose wa Jakubo,

nge zina le Nlisi, Shongwe ye Iziraela.

25Ndzimu wa botate benyu unomubhatsha,

Masimbawose banowomukombolela,

nge makombolelo e vula kudwa kudzimu,

nenge makombolelo nge vula i pasi,

nge makombolelo e zwithuwo ne bana.

26Makombolelo a tate babo makulu

pa makombolelo e matombo agelile tjose,

kupinda bubuya gose gwe matuthu amile nge kusingapele,

atshene angabe makombolelo a Josefa,

iye wakathamiwa ntungamili we bakulu babe.

27“Bhenjamini i phele inopalulanya,

mu mangwanana inoja tjayabhata,

madekwana inokoba tjaatolela.”

28Bose ibaba i njudzi dzili gumi lina mbili dze Iziraela. Matama iyawa ndiwo akalebgwa ndi tate babo tjibaka tjabakabe bebakombolela, bekombolela mmwe ne mmwe nge tjakanlingisana.

Lufu ne mbiganyo ya Jakubo

29Ipapo kabalaya eti, “Ndabe pejo ngofa. Mundibiganye pakabiganyiwa botate bangu mu guwu li mu nnda wa Efuroni we Nhiti, 30#Kutangisa 23:3-20mu guwu li mu nnda ku Makipela, pejo ne Mamure mu shango ye Kanana, mu ntuthu wakatengwa ndi Abhurahama kuna Efuroni we Nhiti kube zwikumbu. 31#Kutangisa 25:9, 10; Kutangisa 35:29Abhurahama ne nkadzikulu uwe Sara bakabiganyiwako, Isaki ne nkadzikulu uwe bakabiganyiwako Ribeka wakabiganyiwako, nami ndakabiganya Liya ko. 32Ntuthu iwoyo ne guwu li imomo zwakatengwa mu Bahiti.” 33#Mishingo 7:15Kwakati Jakubo epedza kulaya bakololo babe kalala pa bulawo kafema gwe bupelo ngono kafa.

Currently Selected:

Kutangisa 49: KBTP

Highlight

Copy