Kutangisa 50

1Josefa kazwilashila pezhugwi kwa tate babe kabalilila, kabaputa. 2Josefa kadwa ng'anga dzakabe dzili pasi kukwe kuti dziwomese itumbu tja tate babe. Ndizo ng'anga dzikawomesa Jakubo. 3Bakatola mazhuba ali makumi manna ngoti tjili itjo tjibaka tjakalizana kuwomesa itumbu. Baegipiti bakatola mazhuba ali makumi ali kutendeka belilila Jakubo.

4Kukati mazhuba e kunlilila apela, Josefa kalebeleka ne be ng'umba ya Faro eti, “Ha mundihwila ngoni ndomukumbila kuti mundikumbilile kuna Faro muti, 5#Kutangisa 47:29-31‘Tate bangu bakati babe pejo ngofa, bakathama kuti nditune kudumana ngekuti ndowobabiganya mu ikumbu tjabakazwitshila mu shango ye Kanana. Ndizo mundiletje ndiyende ndinobiganya tate ndikobuya zwangu.’ ”

6Faro kadabila eti, “Yenda unobiganya tate babo sekwa wakatuna kuti unowothama.”

7Ndizo Josefa kayenda kunobiganya tate babe. Hadzasha dza Faro dzose dzikayenda naye ne makombgwa e ng'umba iye ne bakulu bose be shango ye Egipiti. 8Nsha wa Josefa na iwo ukayenda wose ne bakulu babe ne ng'umba ya tate babe yose. Kwakasala bana koga ne zwithuwo mu shango ye Gosheni. 9Koloyi dze ngwa ne babhayani bakatatha mbizi bakayenda naye. Lakabe lili goko gulu gulu.

10Bakati beswika pa lutombo gwe Atadi pa hwunde ye Jorodani bakalila kunogwadza ngono Josefa kagala nabo ipapo mazhuba ali kutendeka elilila tate babe. 11Kwakati bagali be Kanana bebona tjililo itjetjo pa lutombo bakati, “Etji tjililo tjinohwisa zogwadza tje Baegipiti.” Ndizo bakatumila magalo iyawo beti Abelemizirayimu. Magalo iyawa apa hwunde ye Jorodani.

12Ndizo bana ba Jakubo bakanthamila sekwa akabadwa. 13#Mishingo 7:16Bakansengela ku shango ye Kanana bakambiganya mu guwu limu nnda ku Makipela pejo ne Mamure, wakatengwa ndi Abhurahama muna Efuroni we Nhiti kube zwikumbu. 14Josefa kabgwilila ku Egipiti ne bakulu babe na bose bakabe bayenda naye kunobiganya tate babe.

Josefa unozwiibhatigwa bakulu babe

15Bakulu ba Josefa bakati be bona tate babo bafa bakalebesana beti, “Towotini ha ili kuti pamwe Josefa utjakatibhata nge moyo ngono ebe etibgwilizila mbipo yatakanthamila?” 16Ndizo bakayenda kuna Josefa bakati kunli, “Tate babo bakafa besiya bati, 17tidwe Josefa titi: ‘Ndokukumbila, uzwiibhatigwe bakulu babo nlandu ne mbipo yabakakuthama.’ Ndizo ngwenu wali tokumbila, uzwiibhatigwe balanda be Ndzimu wa tate babo.” Bakati ipapo belebeleka na Josefa kalila.

18Bakulu babe bakathigama mbeli kukwe, ngono bakati kunli, “Iswi ti balanda benyu.”

19Koga Josefa kati ku bali, “Musitje. Apa imi ndi mu tjimo tje Ndzimu kene? 20Nenguba makabe mazwimisila kundithama tjakabipa, Ndzimu wakathama kuti tjibe tjakanaka kutjidza bathu banjinji sekwa unothama sangwenu. 21Ndizo musitje, imi ndowomutjengeta imwi ne bana benyu.” Josefa kabanyaladza nge matama iyawa, elebeleka nabo nge buthu.

Lufu gwa Josefa

22Josefa kagala mu Egipiti ne ng'umba ya tate babe ngono katjila makole ali zana lina makole ali gumi (110). 23Josefa katjila kabona tjizekugwana tje butatu tje bana ba Ifureimi. Kabona ne bana ba Makiri nkololo wa Manase.

24Josefa kadwa bakulu babe kati, “Imi ndabe pejo ngofa, koga Ndzimu unowomubhatsha ukamudusa mu shango iyeyi kumuyisa ku shango yawakagadzabgwe Abhurahama na Isaki na Jakubo.” 25#Kufuluka 13:19; Joshuwa 24:32; Bahebheru 11:22Ndizo Josefa kadwa Baiziraela kati tunani kuti, “Ndzimu unowoti umudusa mu shango iyeyi, mukasenga mafupa angu mukayenda nawo.” 26Josefa kafa ana makole ali zana lina makole ali gumi (110). Wakawomisiwa kalongwa mu bhokisi mu Egipiti.

Currently Selected:

Kutangisa 50: KBTP

Highlight

Copy