MARKUS 9

1E nde a nga kate fe be na: Ma bele foʼo ane ma jô mia na, e bôt be tele vana ba, bevoʼo yʼété ba ye bo teke wu, akekui be tameya yen ane Ejôé Zambe ja so a ngu.

Yésus a veñesan a faé ane éfufup

(Mt 17:1-9; Lk 9:28-36)

2E mvuse melu mesaman, e nde Yésus a nyoñe Pierre baa Yakob a Yôanes, a kee ve be étam avie, e beta nkôle yôp. Ane a nga mane tyendé nyôl e mise mab été. 3Mengômesane mé me nga ngemban a bo angôndô éfumulu, avale woseman éziñ ya si nyô a se ngul ya bo na éndelé é fum nalé. 4Ane Elie baa Môze be nga yené be mis, baa be Yésus be laʼane minlañ. 5E nde Pierre a nga nyoñ nkobô a jô Yésus na: A Rabbi, e ne mvaé na bi tabe vana. Nlôñane bibem bilaa, wô jia, Môze jia, Elie ke jia. 6A nji ke foʼo yem e jôm a jô, amu be mbe be fôʼôbaʼan a woñ. 7E nde nkut ô nga zu buti be yôp. Ane tyiñ é nga so e nkut été na: Nyuna a ne mone wom ma dañe nyeʼe, vôʼôlaʼan nye. 8Atemetem na, éyoñ be nga ke ba fombô mbômaʼane, be teke fe beta yene môt éziñ mfe, ve Yésus étam baa be nye. 9Eyoñ be nga siliki be susuk e nkôle si, e nde a nga ve be abendé na, be bo te kañete môt éziñ e mam ba te yen, ve akekui éyoñ Mone Môt a wômôya, a soʼo miñwuan. 10E nde be nga baʼale abendé te, ve ba ke ba silan e zañe jab bebien-bebien jôm é ne na, e wômô a so miñwuan.

Nsili beyéʼé ajô Elie

(Mt 17:10-13)

11Ane beyéʼé be nga sili Yésus nsili a jô na: Amu jé Beyeme-bekalate ba jô na Elie a yiane taté so? 12E nde a nga yalane be a jô na: Elie a yiane foʼo taté so a kôme mam mese. Ve amu jé e ne ntilan ajô Mone Môt na, a ye bi mintaé abui a tôban ébiasé? 13Ajô te ma kate mia na Elie a soya, ane be nga bo nye aval ese be nga kômbô, aval ane e ne ntilan ajô dé.

Yésus a vaa mongô mbia nsisim

(Mt 17:14-21; Lk 9:37-43)

14Eyoñe be zuya koone beyéʼé bevok, e nde be nga yen étua abui bizuʼu bi bôt, be too be mbômaʼane, a Beyeme-bekalate, baa be be be sañetaʼan. 15Eyoñe nkunda bôt ôse wu ô yemelaneya nye avôl-avô, ane angônda woñ a nga taté bi be, be bumu ñhe mimbi a ke wubane nye. 16E nde a nga sili be na: Jé mia be be mia sañetan? 17Ane môte wua ya ékoone bôt jina a nga nyoñe nkobô, nye na: A Ñyeʼele, ma te zuu mona fame wome nyuna be wo, a bili nsisime mvuk. 18E vôm ase nsisime ôte wo bi nye, wo dum nye e si, avul e nga kui nye anyu, a nga wôté mesôñ, a mane yemele. Me jôya beyéʼé bôé na be titane nsisime ôte, ve be tekeʼe ngu. 19Ane Yésus a nga yalane be a jô na: A mvoñe bôt é ne teke mbunane nyuna, ntaa vé ma ye tabe a mia, ntaa vé ma ye jibi mia? zaʼane me nye bebé vana! 20E nde be nga zuu nye mongô. Ayene nsisim ô nga yene Yésus, été été, ane ô nga bo mongô na a kpwemetan. Ane a nga ku e si a nga ke a biʼiti, avul ve kui nye anyu. 21E nde Yésus a zu sili ésaa na: Eyoñ évé jame te e nga taté nye? Ane a nga yalane na: Aso mongô. 22Biyoñ abui, nsisim wo wua nye, nge sa e nduan, wôna e mendim, na ô wôé nye. Ajô te, nge ô ne foʼo ngule ya bo jam éziñ, volôʼô bia, ko bia éngôngo. 23Ane Yésus a nga jô nye na: Nge ô ne ngule ya bo a! ke mame mese me ne ngule ya boban e be môt a bili mbunan. 24Eté été, ane ésaa mongô a nga yôtan a jô na: Ma buni, volôʼô ma e vôm: Me ngenan te buni. 25Ayene Yésus a nga yene na jama bôt a nga mane tôkan vôm ate, e nde a nga bame mbia nsisim a jôʼô na: A nsisime mvuk a ndok, ma ma jô wo na: Kôlôʼô be nye, ô bo teke beta nyiin e be nye! 26Ane nsisim ô nga bôé ñyôn a minkpwemetan, a vam atan. E nde mongô a nga bo ane mbim, bôte bese be nga jô na: Ke a wuya! 27Ane Yésus a nga bi nye e wo, a bete nye e si, ane a nga tebe tetele. 28Abulan a nga bulan e nda jé, ane beyéʼé bé be nga sili nye, baa be nye be to étam na: Amu jé, bi bia te kate titane mbia nsisime ate? 29Ane a nga yalane be na: Mvoñ minsisim éte é se ngul ya kôlô a zen éziñ fe, foʼo ve a meyeʼelan.

Yésus a beta kate foé awu dé a ñwômane wé

(Mt 17:22-23; Lk 9:43-45)

30Nkôlan ya valé ane be nga tyii e Galilé, ve da Yésus teke kômbô na môt éziñ a yem nalé.

31Ane ñhe a nga ke a yeʼele beyéʼé bé, a jôʼô be na: Ba ye koñe Mone Môt, na bôt be bi nye. Ba ye wôé nye. Ve da, éyoñ a wuya, e mvuse môs mila a ye wômô. 32Mfaʼa wop, be nji ke tuʼa wôk ajô te, ve da be ko woñe ya sili nye minsili.

Za nye a dañ?

(Mt 18:1-5; Lk 9:46-48)

33Ane be nga ke e Kapernawum. Eyoñ a nto e nda été, e nde a sili be na: Jé mia te zu mia sañetan e zenezen? 34Ane be nga ku bivô, amu be mbe be sañetaʼan e zenezen na be yem za nye a dañ? 35Atabe a nga tabe e si, ane a nga loone Beyéʼé awôm a bebaé, a jô be na: Nge môt éziñ a kômbô bo môt ôsu, a boʼo ntebe mvus ya bôte bese, a mbo bisaé asu bôte bese. 36E nde ñhe a nyoñ mone mongô a tele nye e zañe bôt ane a nga beʼe nye e mo yôb a jô na: 37E môt a ye nyoñe ôyôme mongô wua avale di e jôé dam, mamiene le a nyoñ. E nde fe môt a nyoñe ma, sake ma a nyoñ, a nyoñe Nyô a nga lôme ma.

E môt a nji bo e ngame yat, a ne ngame jangan

(Lk 9:49-50)

38Yôanes a nga jô nye na: A Ñyeʼele, bia te yene môt éziñ a titaʼan mimbia minsisim e jôé dôé, e nde bia te jeñe zen ya kame nye na a bo teke bo de, amu a nji zu a tôñe bia e nsamba wongan. 39Ane Yésus a nga jô na: Te kamane nye, amu na teke môt éziñ a bo étua jam e jôé dam, a ne jiʼa beta kobô ma abé été été. 40E nde ñhe, e nyô a nji tebe bia e ngame yat, nye a ne ngam jangan. 41Ajô te, e môt ase a ye nyuu mia ékpwase mendim amu na mi ne bôt be Krist, ma kate mia bebela na, a se ngul ya jañele maʼane mé.

Meleb ajô nkolan ôbak a bibuʼa biangan

(Mt 18:6-9; Lk 17:1-2)

42E môt ase a ye dutu wua ya ayôme bongô da buni ma dina na a ku abé été, jam da dañ mvaé mfaʼa wé e ne na, be fañe nye akoʼo nnen ba koʼo de bidi tyiñ , a wua nye e mañ été. 43Ajô te, nge wo wôé éziñ wo tindi wo e nsem, tyiʼi wô. E ne mvoʼé na ô ke nyiin ényiñ, étune wo, alôte na ô ke nduane kom ô bili mo mebaé, 44e vôme nsoñ wob ô ne te wu, nduan ke te dim. 45Nge abo dôé éziñ e nde da dutu wo na ô ku, seme de; e ne wo mvaé na ô nyiin ényiñ été étun abo, alôte na ba wua wo ébé nduane kom ô bili mebo mebaé, 46e vôme nsoñ wob ô ne te wu, nduane ke te dim. 47A nge dise dôé éziñ e nde da dutu wo na ô kolé a ku abé été, fôndéʼé de. E ne wo mvaé na ô ke nyiin ayoñe Zambe a dise da, alôte na be ke wua wo ébé nduane kom ô bili mise mebaé, 48e vôme nsoñ wob ô ne te wu, a nduan ke te dim. 49Amu na môt ase a ye wôk ésôbôk nku e nduan été. 50Nku ô ne mbamba jôm. Ve da, nge nku ô mane same zam , mia ye beta ve wô zam a za jômô? Biane nku e be miabebien été, tabaʼane fe mvoʼé wua a nyô mbok.

Currently Selected:

MARKUS 9: BULU09

Highlight

Copy