MARKUS 10

Za a ne tyam aluk

(Mt 19:1-9; Lk 16:18)

1Eyoñ a kôlôya vôm ate, ane a nga ke e si ya Yudé, e kindiʼi Yordane ya yat. Ane jama bôt a nga beta zu mane tôkane nye bebé. A nga beta yeʼele be, aval ane a mbe a boʼok. 2E nde Befarizieñ be nga zu na be lame nye a sili nye na: Ye fam é ne foʼo ngule ya suu minga wé? 3Ane a nga yalane be na: Môze a nga ve mia atiñ aya? 4E nde be nga jô na: Môze a nga ve ngule na be tili kalate ya suu minga, éyoñ éte nje ba suu nye. 5Ane Yésus a nga yalane be na: Kʼamu ayete minlem denan, e nde a nga tili mia atiñe te. 6Ve atataʼa ya ntéane ba biômô, Zambe a nga kômône be nnôm baa nga. 7Ajô te nde ñhe fam ja ye liʼi ésaa baa nyia, a ke lat a ngale wé, 8a ba ye bo nsône wua bebaane. Be nji fe bo bôte bebaé, be ntoo nsône wua. 9Ajô te, e jôme Zambe a maneya lat, môt a boʼo teke kandé je. 10Eyoñe be nga ke kui e nda , e nde beyéʼé be nga beta sili nye minsili, mi tinaʼan a ajô te. 11Ane a nga jô be na: Nge môt a suu nga a luʼu minga mfe, a bo mejian a minga ate. 12Nge minga ki a kôlô e be nnôm a ke luʼu fame fe, nye fe a bo mejian .

Yésus baa bʼayôme bongô

(Mt 19:13-15; Lk 18:15-17)

13Ane be nga zuu nye ayôme bongô na, a nambe de. E nde beyéʼé be nga viane bame be. 14Ayene Yésus a nga yene nalé, ane a nga yaa be a jô be na: Jôkaʼan ayômô bongô e zu be ma, te kamane de, amu éjôé Zambe é ne jôm avale bôte dap. 15Ma bele foʼo ane ma jô mia na, e môt ase a bo teke nyoñ ayoñe Zambe ane mone mongô, a ye bo teke nyiin été. 16Ane a nga nyoñe be a beʼe be e mo yôp, a botane be, a beté be mo.

Yésus baa nkukum môt

(Mt 19:16-30; Lk 18:18-30)

17Valé Yésus a ndôme foʼo téé dulu, e nde môt éziñ a zu ke so mbil ôsu, a kute meboñe si, a sili nye na: A Mba Ñyeʼele, ma yiane bo jé ane me ne nyoñ ényiñ ya melu mese? 18Ane Yésus a nga jô nye na: Wo loone me mbamba môt amu jé? Teke môt éziñ a ne mbamba môt, sesale ve Zambe étam. 19Ke wo yeme metiñe mese: Te wo wôé, te wo bo mejian , te wo wup, te wo bo ngaa minsos; te wo wôs éza biôm; ô seméʼé ésoo baa nyua. 20E nde nye kʼa nga yalane na: A Ñyeʼele bôt, e mam mese ma, ma baʼale me aso mongô. 21Yésus a nga fombô nye ne tooñ, a nyeʼe nye; e nde a jô nye na: Jam daada e liʼiya e jembaʼane wo: kelek, e biôme bise ô bili, kuʼane bie, a ve bie minzôzoé, nalé wo ye bi akum e yôp, éyoñe te ô zu wo tôñe ma. 22E nde ôtat ô nga bo nye asu a nkobô ôte, ane a nga ke ôlun ôlun, amu a nga bili akum abui. 23Ane Yésus a nga lôbô mbômaʼane, a jô beyéʼé bé na: Etua ayaé foʼo na e bôte be bili akum abui be nyiin ayoñe Zambe! 24E nde beyéʼé be nga siʼan a vembe bifia bié bite. Ane Yésus a nga beta jô be na: A bon , e ne foʼo étua ayaé ya nyiin ayoñe Zambe! 25Da dañe tyiʼibi na kamel a tulan abé ndôndo alôte na nkukume môt wo nyiin ayoñe Zambe. 26Ane be nga beta dañe dañe semé, ba ke ba jô e zañe jab na: Eyoñe éte za foʼo e nye a ye bi ényiñ? 27E nde Yésus a nga fombô be ne toñ, a jô na: E be bôt, jame te e se ngul ya boban, ve sa ke be Zambe; amu e be Zambe, mam mese me ne ngul ya boban. 28Ane Pierre a nga nyoñe ñhe nkobô a jô nye na: Tame yen, bi maneya liʼi biôme bise a zu tôñe wo! 29Yésus a nga yalane nye na: Ma kate foʼo mia bebela na, e môt éziñ a ye liʼi nda , nge bobenyañ, nge beka, nge nyia, nge ésaa, nge bon , nge ke mefub amu ajô dam a ajô Mbamba Foé, 30a se ngule ya bo te nyoñe biôm bite ntet biôm tañe jôme jia éyoñ ébien ji, a taté menda a kui bobenyañ, a beka, a benyia, a bon , a mefup, a fulane bikpweʼele, a ényiñ ya nnôm éto mfaʼa ya biyoñ bia zu. 31Abui ya ba be ne ôsu, da ye tebe e mvus, e ba ya mvuse ki ba ye tebe ôsu.

Eyoñe lale Yésus a kate na a ye wu a beta wômô

(Mt 20:17-19; Lk 18:31-34)

32Be ntoo zene zañe valé, be betek a ke Yérusalém, Yésus a tele be ôsu, minleme mi ntyele be yôp, e bôte ki be mbe be zaʼa ba tôñe be, be ko woñ. Ane a nga beta nyoñe Beyéʼé awôm a bebaé, a nga kate be mame ma yiane tôbane nye. 33Nye na: Bia ñhe bia bet a ke Yérusalém ba, a Mone Môt, a ye vebane e mo Betuni Benen a Beyeme-bekalate, ba ye tyiʼi na a wu a ve nye bikuu, 34ba ye kpweʼele nye a tui nye menden, ba ye bibi nye minkasa a wôé nye, ve e mvuse melu mebaé, e môse lale a ye wômô.

Yésus baa bone be Zébédé

(Mt 20:20-28; Lk 22:25-27)

35Ane Yakob baa Yôanes, bone be Zébédé, be nga zu tôbane Yésus a jô nye na: A Ñyeʼele bia yi na, e jam bia ye sili wo, ô bo bia de. 36E nde a nga jô be na: Jé nje mia yi na me bo mia? 37Ane be nga yalane nye na: Vaʼa bia ngule ya zu tabe étôtoʼo jôé été, môte wua e mbo nnôm, nyô mboʼo kik e mbo nga. 38E nde Yésus a nga jô be na: Mi nji tuʼa yem e jôm mia sili! ye mi bili ngule ya nyu élaé mamien ma ye nyu? Nge dubane kik e nduan mamiene ma ye duban? 39Ane be nga jô na: Bi bili ngu. Yésus nyee be na: E élaé mamiene ma ye nyu, mia ye nyu je, a nduan mamiene ma ye duban, mia ye dubane wô, 40ve mfaʼa ya bito ya mbo nnôm nge mbo ngale wom, sake ma ma ve bie, bi ne nkôman asu bôt be nee bie. 41Eyoñ awôm beyéʼé avok e wôʼôya nalé, ane be nga yaa Yakob baa Yôanes. 42Ane Yésus a nga loone be a jô be na: Mia yeme na e bôte mia yene be bili éjôé ya meyoñ , be titi meyoñ mete yôb a ngul, e nde fe beta be bôt, ba tibili meyoñ . 43Ve avale te e nji bo e be mia. Ve nge môt éziñ a kômbô bo beta môt e zañe jenan, a ye bo mbo ésaé wônan; 44a nge môt éziñ a kômbô bo môt ôsu ya be mia, a ye bo mon ôlo asu bôte bese. 45Ajô te ñhe Mone Môt nye a nji ke so amu na bôt be saane nye, ve na a saane bôt, a ve ényiñ jé ntañ bôt abui.

Yésus a saé ndindim Bartimé

(Mt 20:29-34; Lk 18:35-43)

46Ane be nga kui Yérikô. Eyoñ a kôlôʼô e Yérikô valé, baa beyéʼé bé a ébeʼebeʼe nsamba bôt, nde Bartimé, mone Timé, a mbe ndindim, nye kʼa too si e fefele zen , a jakéʼé bôte biôm. 47Awôʼô a nga wôʼô na a ne Yésus ya Nazarét, a taté ñhe na a yôtan e yôb été a jôʼô na: A Yésus, mone David, ko mʼéngôngo! 48Bôte bevoʼo abui be nga bamé nye na a ku évô. Nye kʼa nga dañedañe bete tyiñ e yôb été na: A mone David, ko mʼéngôngo! 49Ane Yésus a nga tebe, nye na: Loʼone nye! ane be nga loone ndindim wu, a jô wô na: Volôʼô nlem , kôlôʼô si, a loone wo! 50E nde foʼo a nga sôʼô kôte jé, a jiʼa nyokan tetele, a ke e be Yésus. 51E nde Yésus a nga nyoñ nkobô a jô nye na: Wo kômbô na me bo wo jé? Ane ndindim ô nga yalane na: A Rabbuni, ma yi ve na me yen. 52E nde Yésus a jô nye na: Kelek, mbunane wôé ô nyiiya wo. Ane fe a nga yen été été, a nga ke a tôñe nye e zenezen.

Currently Selected:

MARKUS 10: BULU09

Highlight

Copy