YOANES 21

Yésus a yené e be beyéʼé zamgbwa

1Mvuse éte, ane Yésus a nga zu beta liti beyéʼé nyôle jé e mañe ya Tibériade. A nga liti be nyôl avale di: 2Be mbe vôma wua, Simon Pierre, baa Thomas ba loone na Didimi, a Natanaél a soʼo Kana ya Galilé, a bone be Zébédé, a beyéʼé befe bebaé. 3E nde Simon Pierre a zu jô be na: Ma tame ke yob kos. Ane be nga jô nye na: Bia be wo bia ke. E nde ñhe be nga dañ éfunga été. Ve da alu te be nji ke bi jôm éziñ. 4Esala tyé, Yésus a ntele e kindiʼi mañ, ve beyéʼé teke yeme na a ne Yésus. 5Ane Yésus a nga jô be na: A bon , ye mi bili foʼo jôme ya di? E nde be nga yalane nye na: Tekeʼe jôm. 6Ane a nga jô be na: Tameka yaan avot mfaʼa éfunga ya mbo nnôm, wôna mia ye bi. E nde be nga ya de, be nga kate dutu avot, amu kos é dañeya abui. 7Eyoñe te ñyeʼé Yésus a mbe a nyekeʼe a nga jô Pierre na: Nti le! Awôʼô Simon Pierre a nga wôʼô na, a ne Nti, e nde a nga tiñeti éyé angeteñ, amu a mbe soé, a wua émiene e mañ été, 8beyéʼé bevoʼo be nga zu éfunga été, amu kindik é nji ke fe bo be ôyap, ve bebé tañ menyiʼi me mo mintete mibaé, be zaʼa ba dutu avot kos. 9Eyoñe be maneya sis e kindik, be nga yene maʼa me nduane nkôban, kos a belet bi bete été yôp. 10E nde Yésus a nga jô be na: Zaʼane kos éziñe ya nyô mi ndôme bi. 11Ane Simon Pierre a nga dañ éfunga été a mane dutu avot e kindik, njalan a beta be kos tañe ntet a mewôm metan a éla. Ve akôsabo abim abui te, avote teke nyaé. 12E nde Yésus a zu jô be na: Zaka dian! Tekeʼe môt éziñ ya nsamba beyéʼé a nga zômbô sili nye na: O ne za? Amu be nga yeme na a ne Nti. 13Ane Yésus a nga zu nyoñe belet a ve be je, avale te fe kos. 14Eyoñe lale le a nga liti beyéʼé bé nyôl, e mvuse ñwômane soñ a kôlôʼô miñwuan.

Yésus baa Simon Pierre

15Eyoñe be maneya di e nde Yésus a nga jô Simon Pierre na: A Simon mone Yôanes, ye wo nyeʼe ma ô dañe bôte ba? Simon nyee nye na: Owé, a Nti, wo yeme na ma nyeʼe wo. Ane Yésus a nga jô nye na: Baʼaleʼe bone mintômba bam. 16Ane a nga jô nye éyoñe baa na: A Simon mone Yôanes, ye wo nyeʼe ma? Simon nyee nye na: Owé, a Nti, wo yeme na ma nyeʼe wo. E nde Yésus a nga jô nye na: Baʼaleʼe mintômba miam. 17Ane a nga beta jô nye éyoñe lale na: A Simon mone Yôanes, ye wo nyeʼe ma? Valé ñhe Pierre a nga wôʼô ôlun, amu a nga jô nye éyoñ lale na: Ye wo nyeʼe ma? E nde a nga jô nye na: A Nti, wo wo yeme mame mese, ke womien wo kôme fe yeme na ma nyeʼe wo. Ane Yésus a nga jô nye na: Baʼaleʼe mintômba miam. 18Bebela, bebela foʼo nye ma kate wo na, éyoñ ô mbe ésoé ndôman, ô tiñetiʼi womiene kandé, ô kele mulu môé mfaʼa ôse wo kômbô. Eyoñe ke wo ye bo nnôm, wo ye bo ô same ve mo, môte mfe nye a nga tiñeti wo kandé angeteñ, a kee wo e mfaʼa ô nji kômbô. 19A nga kobô nalé a liti aval awu avé Pierre a ye vee de Zambe duma. Eyoñ a maneya kobô nalé, ane a nga jô nye na: Tôñe ma.

Yésus baa ñyeʼé a nga nyeʼe

20E nde Pierre a nga kôñelan a yene ñyeʼé Yésus a mbe a nyekeʼe a zaʼak, e môt a nga yeʼebe Yésus e tôé, be jaʼak, a sili nye na: A Nti, za nye a koñe wo? 21Ayene Pierre a nga yene nye, ane a nga jô Yésus na: A Nti, nyuna nye a ye bo aya? 22E nde Yésus a nga jô nye na: Nge ma kômbô na a tabee akekui ma ye so, ô nee za ajôô été? Wô tôñe ma. 23Foé é ke ñhe jimbi a mialan e be bobenyañe na ñyeʼé ate a ye bo te wu. Ve Yésus ki, nye a nji jô nye na a ye bo te wu, ve na: Nge ma kômbô na a tabee akekui ma ye so, ô nee za ajôô été? 24Nyeʼé ate e nye a kañete mame ma a tili me, a bia yeme na nkañetane wé ô ne bebela.

25Mam mefe Yésus a nga bo me ne abui abui, nge be nga ye tili me mese daa daa a anyenyame mam yʼété, ma buni na, jaʼane si ndôn ébiene nyô, é nga ye bo te bi vôm a ne yiane bekalate be nga ye tiliban.

Currently Selected:

YOANES 21: BULU09

Highlight

Copy