YOANES 20

Ñwômane Yésus

(Mt 28:1-10; Mk 16:1-8; Lk 24:1-12)

1E môs ôsu ya sondô, e nde Marie ya Magdala a nga téé ésala tyé, dibi e ngenan, a ke kui e soñ a yene na akoʼo e vaseya soñ. 2Ane a nga ke mbil a ke yene Simon Pierre baa ñyeʼé mbok, e nyô Yésus a mbe a nyekeʼe, a kate be na: Be vaaya Nti e soñ, a bi nji yem e vôme be keya nye. 3E nde Pierre a nga téé baa ñyeʼé mboʼo ate, a ke e soñ. 4Be mbe be kele mbi, bese bebaane; ve ñyeʼé mbok a nga ke mbil avô a dañe Pierre, a taté ke kui e soñ; 5e nde a nga lumbu si a yene bibab biyé bi bôô, ve da nye teke nyiin. 6Eyoñe Simon Pierre a nga zu a tôñe nye mvus nye fe a kuiya, ane a nga nyiin e soñ été, a yene fe bibab biyé bi bôô, 7a ndombo be nga vul Yésus e nlô é bôô mvulan ngume vôm étam, baa bibab biyé teke bômbô vôma wua. 8Eyoñe te ñhe ñyeʼé mboʼo a nga taté ke kui soñ, nye fe a nga nyiin. Ane a nga yen, ane a nga buni. 9Amu valé be ngenan teke yem ntilan wo jô na: A yiane wômô a kôlôʼô miñwuan. 10E nde beyéʼé be nga bulane menda map.

Yésus a yené e be Marie ya Magdala

(Mk 16:9-11)

11Ve Marie a nga liʼi a tele fefele soñe atan, a yiik. E ñyône zañe valé, ane a nga lumbu si a bôt e soñ été. 12E nde a nga yene bʼéngele bebaé be beʼe bifumulu biyé, be too si vôm mbim Yésus ô nga bôô, wua e mfaʼa ya nlô, nyô mbok e mfaʼa ya mebo. 13Ane be nga jô nye na: A minga, wo yône jé? E nde nye kʼa nga yalane be na: Amu be zuya vaa Nti wom, a me nji yem vôm be keya bôé nye. 14Aman a nga mane kobô nalé, ane a nga buʼu tyiñ a fombô mvus a yene Yésus a tele, ve nye teke yeme na Yésus le. 15E nde Yésus a jô nye na: A minga, wo yône jé? Wo jeñe za? Mbôl a nga siʼa ko na a ne mbo ésaé ya afup, ane a nga jô nye na: A monti, nge wo wo te toʼé nye, kate ma vôm wo te ke bôé nye, mamien ma ye ke beʼe nye. 16Ane Yésus a nga jô nye na: A Marie! E nde nye kʼa nga kôñelan a jô nye e nkobô Hébre na: A Rabbuni (e ne na, a ñyeʼele). 17E nde Yésus a nga jô nye na: Te nambe ma! Amu me ngenan te bet be Tate. Kele ñhe yene bobenyoñ ô kate be na ma bet a ke be Esaa wom a Esaa wônan, e be Zambe wom a Zambe wônan. 18Ane Marie ya Magdala a nge ke, a kate beyéʼé na: Me yeneya Nti, a kate fe be mam a nga jô nye.

Yésus a yené e be Beyéʼé

(Mt 28:16-20; Mk 16:14-18; Lk 24:36-49)

19Môs ôte ôbien, éyoñe ngôʼé é boya, e môs ôsu ya sondô te, mimbé mi too mimfetan e vôme beyéʼé be mbe, amu be nga ko Beyude woñ, ane a nga so, a ntele be zañ a jô be na: Mvoʼé é boʼo a mia! 20Ane a nga mane jô nalé, a nga liti be mo a mvaé. Beyéʼé be nga vak, amu ñyenane ba yene Nti. 21E nde a nga beta jô be na: Mvoʼé é boʼo a mia! Aval Tate a nga lôme ma, ma fe ma lôme mia. 22Akobô a nga mane kobôô be nalé, ane a nga kute be mvebe e nyôl a jô na: Nyoñan Mfufub Nsisim. 23E bote bese mia ye jamé mam abé , mam mete me jambaneya, e ba ki mia bo te jamé, a baʼale minsem miab, mia tabe mbaʼalan.

Yésus baa Thomas

24Thomas, wua ya nsamba beyéʼé awôm a bebaé, nyô ba loone na Didimi, nye a nji tabe a ba bevok éyoñe Yésus a nga so. 25E nde ñhe Beyéʼé bevok be nga jô nye na: Bi yeneya Nti. Ane nye kʼa nga jô be na: Nge me te kôme yen bifele mesen e mo mé été, me me beme fe ônyu wom e bifel mesen été, me kôme fe nyiñili wo wom e mvaé jé été, me teke yebe. 26E mvuse melu muam, beyéʼé be too e nda été, Thomas a too fe a be. E nde Yésus a nga so, mimbé mimfetan, a ntele be ézezañ, a jô na: Mvoʼé é boʼo a mia! 27E nde a jô Thomas na: Zaʼak a ônyu wôé va, fombôʼô mo mam, same fe wo wôé a beté akule wo dôé e mvaé jam, te bo bisô, ve buni. 28Ane Thomas a nga yalane nye na: A Nti wom, a Zambe wom. 29E nde Yésus a nga jô nye na: Amu ô yeneya ma, e nde ô buniya! Ebotan a bôte be nji yen ve buni.

Nlô éfia ya Kalate Yôanes

30Yésus a nga bo fe bitua bi mam bife abui e mise beyéʼé bé, ve me nji bo ntilan e kalate nyuna été. 31Ve mana me ne ntilan amu mi bunii na Yésus a ne Krist, Mone Zambe, a na ane mi buni, mi bi ényiñ amu jôé dé.

Currently Selected:

YOANES 20: BULU09

Highlight

Copy