YOANES 19

1Ane Pilat a nga bendé na be nyoñe Yésus a ke bibi nye minkasa. 2Eyoñe te bezimbi be nga lôñe ékate biyo a jalé nye je nlô, be nyoñe fe évele alôʼô be jalé nye, 3be ve subu nye bebé a jô na: Mbôlô ñhe, a njô Beyude Be nga bibi fe nye mebaé. 4E nde Pilat a nga beta kui atan a jô be na: Mi lôô, ma zu mia nye liti atane mu mi yeme na me nji yen toʼo ajô éziñ da ve nye mekua. 5E nde Yésus a nga ke e nseñ, a beʼe ékate biyo a njombo évele alôʼô wu. Ane Pilat a nga jô be na: Mi lôô môt ate! 6Eyoñe minlô betuni a bebaʼale bap be nga yene nye, ane be nga yôtane yôb été a ngule na: Bômôlôʼô nye krôa , bômôlôʼô nye krôa ! Ane Pilat a nga jô be na: Mia bebien nyoñane nye mi ke bômôlô nye krôa . Amu mfaʼa wom, me me nji yene nye ajô éziñ. 7E nde Beyude be nga yalane nye na: Bia bebien bi bili atiñ , a njôane ya atiñe te, a yiane wu, amu a nga bo émien mone Zambe. 8Eyoñe Pilat a wôʼôya nkobô te, woñ ô nga viane bi nye, 9ane a nga bulane ke nda été a jô Yésus na: Wo so so vé? Yésus teke foʼo ve nye éyalan éziñ. 10Ane Pilat a nga jô nye na: Wo ku ma évôl a? Ye ô nji yeme na me bili ngule ya suu wo, me bili fe ngule ya bo na be bômôlô wo krôa ? 11E nde Yésus a nga yalane nye na: O nji ke ye bi mone ngul éziñ e be ma, nge é nji bo mveane ya yôp. Ajô te, e môt a nga kee me wo, e nye a beʼe nseme wo beta dañ anen. 12Ataté éyoñ éte Pilat a nga jeñe mezene ya suu nye. Ane Beyude be nga yôtane yôb été na: Nge wo suu nye, wôna ô nji bo mvôé Kaiza. E môt ase a telé émien njô bôt a wosane Kaiza. 13Awôʼô Pilat a nga wôʼô be kobôʼô nalé, ane a nga kee Yésus e nseñ, a tabe éto ntyiʼane mejô vôm ba loone na Lithôstérôtôs, e nkobô Hébre ke na Gabatha. 14A mbe éyoñe ngômesan Pak, bebé awolo samane. E nde ñhe Pilat a nga jô Beyude na: Mi lôô njôô wônan, e nye ñhe nyô. 15Ve be ki be nga viane yôtane e yôb été na: Ayiane wu, kelee nye, bômôlôʼô nye krôa ! Ane Pilat a nga jô be na: E njô wônan, ye me tyelé nye krôa ? E nde minlô betuni mi nga yalane na: Bi nji bi njôô, mfe foʼo ve Kaiza. 16Ane a nga nyoñe ñhe nye a ve be nye na be ke tyelé nye e krôa .

Ba tyelé Yésus e krôa

(Mt 27:32-44; Mk 15:21-32; Lk 23:26-43)

E nde ñhe be nga nyoñe Yésus a ke nye. 17Ane émien a nga beʼe krôa jé a ke vôm a ne jôé na Ekôkoé nlô, e nkobô Hébre ki na Gôlgôta. 18E ne be nga tyelé nye krôa valé, baa be bôte befe bebaé, nyôna li, nyôna ke li, Yésus ki ézezañ. 19Ane Pilat a nga tili mon abam na be ke baʼaé nye de e krôa yôp, ntilan ô mbe été na:

Yésus ya Nazarét, njôô Beyude

20Beyude abui be nga lañe mon abam ate, amu e vôme be nga tyelé Yésus e krôa a mbe foʼo bebé a tison. Ntilane te ô mbe e nkobô Hébre, nkobô Lateñ, a nkobô Grék. 21E nde minlô betuni ya Beyude be nga jô Pilat na: Te wo tili na: Njôô Beyude; tiliʼi na: Emien a nga jô na me ne njôô Beyude. 22Ane Pilat ki a nga yalane na: Avale me tiliya, e nde me tiliya. 23Bezimbi ki, éyoñe be maneya bômôlô Yésus e krôa , ane be nga nyoñe mengômesane mé, a kabe me mengab menyiin, mone bezimbi ase ngab jia. Beta éwoman wé a mbe fe, éwomane te teke nlokoʼo, ntiñane ngumba ngumba aso yôp akui si. 24E nde ñhe be bebien be nga jô na: E mboʼan te nyab éwomane ji, bia zu viane do je abia bi yeme môt a ye nyoñe je. Nalé Ntilan ô nga tôéban ô jôô na:

be nga kabane mengômesane mam;

a éwomane jam, be nga do je abia.

Mam bezimbi be nga bo mme ñhe le.

25Bebé a krôa Yésus, e nyia wé a nga tele, a monyañe nyia; Marie nga Keléôpas a Marie ya Magdala. 26Eyoñe ñhe Yésus a yeneya nyia wé a ñyeʼé a mbe a nyekeʼe a tele nye fefel, e nde a nga jô nyia na: A minga ô lôô, mone wôé le. 27Ane a nga jô fe ñyeʼé ate na: O lôô nyia wôé le. Ataté éyoñ éte, nyeʼé ate a nga nyoñe nye e nda jé.

Awu Yésus

(Mt 27:45-56; Mk 15:33-41; Lk 23:44-49)

28E mvuse te, ayene Yésus a nga yene na mam mese me maneya, a na ntilan ô tôébaneya, ane a nga jô na: Ma wôʼô évé. 29Viek ô mbe ô tele valé, njalan a sañe woon. Ane be nga dub abusa e sañe woone été, be fane de ôlelé hisôp, be kele de Yésus anyu. 30Eyoñe Yésus a nyoñeya sañe woon éte, e nde a nga jô na: E maneya, ane a nga jomé nlô wé a suu nsisim wé.

Ba jii Yésus akoñ e mvaé

31Beyude ki, mbôl ngômesan Pak é mbe, a mfaʼa ya na mimbim mi bo te langan e krôa yôb e môs Sabat ôte, amu môse Sabat ô mbe beta môs , ane be nga yeʼelane Pilat na be buʼu be mebo a suu be si. 32E nde bezimbi be nga ke, be mane buʼu môt ôsu mebo, a môte mbok baa be be nga tyele Yésus e krôa . 33Eyoñe be keya kui be Yésus, mbôl be nga yen a wuya, ane be nga bo teke buʼu nye mebo; 34ve mone bezimbi wua a nga jii nye akoñ e mvaé, ane metyi a mendim bi nga kui été été. 35E môt a nga yen e nye a nga kañete, a jam a kañete e ne bebela, a môt ate a yeme na e ne foʼo bebela, aval ya na mia bebiene fe mi buniʼi. 36Mam mete me nga boban a tôéjalé ntilan ô ne na: Tekeʼe éves jé jia ja ye buʼi. 37A ntilan ôfe wo jô fe na: Ba ye fombô e môt be nga jii akoñ.

Ejamembime Yésus

(Mt 27:57-61; Mk 15:42-47; Lk 23:50-56)

38E mvuse ya valé, ane Yôsep ya Arimaté, mbôl a mbe ñyeʼé Yésus, ve asoé amu a nga ko Beyude woñ, a nga yeʼelane Pilat na a ke nyoñe mbime Yésus. Ane Pilat a nga ve ngu. E nde a nga ke, a nyoñe mbim. 39Ane Nikôdém, e môt a nga tame ke be Yésus alu éziñ, nye fe a nga ke soo mbundaʼane mfuʼane mbone mire baa alôés, tañe kili mewôm mela. 40E nde ñhe be nga nyoñe mbime Yésus, be mane diñe wô a bibab biyé mmiaman a mimbone menyum, aval ane tume njamane mimbim Beyude é né. 41Afôla be nga bômôlô Yésus e krôa , afub e mbe valé, nalé fe mfefé soñ, afube te été, be ngenane te jam môt éziñ été! 42Ane be nga jame Yésus valé, amu ngômesane abôʼô Beyude, a soñ éte ki é to bebé.

Currently Selected:

YOANES 19: BULU09

Highlight

Copy