YOANES 18

Nkoñan a mbiane Yésus

(Mt 26:47-56; Mk 14:43-50; Lk 22:47-53)

1Eyoñe Yésus a maneya kobô mejô mete, ane a nga téé, baa beyéʼé bé, a dañ ôtôñ Kédroñ, afub e mbe vôm ate, Yésus baa beyéʼé bé be nga nyin été. 2E Yudas a nga koñe nye a mbe fe a yeme vôm ate, amu Yésus baa beyéʼé bé be mbe be kele wé biyoñ biyoñ. 3E nde ñhe Yudas a nga nyoñe nsamba bezimbi a bekeminlôman be soʼo be minlô Betuni a Befarizieñ, a kele be wé, be bili ngôé é yônôk, a belambe a bikpwelé mewosan. 4Amu Yésus a nga yeme mam mete mese ma ye kui be nye, ane a nga ke tôbane be a jô be na: Mia jeñ za? 5Ane be nga yalane na: Yésus ya Nazarét. E nde a jô be na: Ma te nyô. E Yudas a nga koñe nye a nga tele fe valé baa be be. 6Eyoñe ñhe a jôya be na: Me nyô, ane be nga bulan mvumvua, be nga ke ba ku si si. 7Ane a nga baʼalane sili be na: Mia jeñ za? E nde be nga jô na: Yésus ya Nazarét. 8Ane Yésus a nga yalane na, ke me jôya mia na, me nyô. Nge ma foʼo mia jeñ, jôkaʼane ñhe bôte ba, be be ke. 9A nga jô nalé, ndemben njôan a nga jô wo ye tôéban na: E bôt ô nga ve ma me nji jañele ve wuwua ya été. 10Mbôl Simon Pierre a nga bili nkpwaté mekôn, ane a nga té wô a bibi mbo bisaé nlô Ntuni, a tyiʼi nye alo ya mbo nnôm. Mbo bisaé ate a to jôé na Malkus. 11Ane Yésus a nga jô Pierre na: Some nkpwaté mekôn wôé abam. E kob Tate a nga ve ma, ye me bo te nyu je? 12E nde ñhe nsamba bezimbi wu a njôô wob a bekeminlôman ya Beyude be nga bi Yésus, a mane kaʼa nye ngataʼa.

Yésus asu Anne nlô betuni

(Mt 26:57-58; Mk 14:53-54; Lk 22:54)

13Ane be nga taté kee Yésus e be Anne. Amu Anne a mbe ntyi fam Kayif, a to fe nlô betuni ya mbu ôte. 14E nde fe Kayif nye a nga leb Beyude na e ne mvaé na môte wuwua nye a wu asu ngum ayoñ.

Pierre a kate Yésus

(Mt 26:69-70; Mk 14:66-69; Lk 22:55-57)

15Simon Pierre a nga ke a tôñe Yésus baa ñyeʼé mfe. Mbôl nlô ntuni a mbe a yeme nyeʼé ate, e nde a nga nyiin e nseñ ya nda nlô ntuni été baa Yésus, 16Pierre ki a liʼi a tele mbé yôp, mfaʼa yʼatan. Ane ñyeʼé mboʼo nlô ntuni a mbe a yeme nyô a nga ke mane kobô minga a baʼale mbé na, a nyiñili Pierre élum été. 17E nde minga a baʼale mbé a zu jô Pierre na: Ye ô nji bo wua ya beyéʼé be môte nyô? Ane Pierre a nga jô na: Me nji bo été. 18Bebo bisaé a bebaʼale nda be nga kôbane di, be nga woban nduan, amu avep; Pierre a ntele ñhe valé baa be be be wobaʼane nduan.

Nlô betuni a sili Yésus minsili

(Mt 26:59-66; Mk 14:55-64; Lk 22:66-71)

19E nde nlô ntuni a nga sili Yésus ajô ya beyéʼé bé a miñyeʼelane mié. 20Ane Yésus a nga yalane nye na: Me nga kobô bôte bese éngengeñ, a mamien me nga yeʼele éyoñ ése aba Zambe a Nda Zambe, e vôme Beyude bese ba zu tôkan, a me nji kobô jam éziñ asoé. 21Jé foʼo wo sili ma? Siliʼi bôte be nga vôʼôlô na be nga jô be aya? Ke bebiene ba yem e mam me mbe me kobôʼô. 22Nnéé ane a nga suu nkobô, ane môte wua ya bebaʼale a nga tele valé a nga bibi Yésus abaé a jô na: Ye aval di e nde wo yalan nlô ntuni ? 23Ane Yésus a nga yalane nye na: Nge me kobôya abé , litiʼi jôm é ne abé; nge ma kobô ki mvoʼé , wo bibi ma amu jé? 24E nde Anne a nga lôme nye a tii ngataʼa e be Kayif nlô Ntuni.

Pierre a beta kate Yésus

Mt 26:71-75; Mk 14:69-72; Lk 22:58-62

25Simon Pierre nye a tele a wobaʼane nduan. Ane be nga jô nye na: Ye wo fe ô nji bo wua ya beyéʼé be môt ate? Ane a nga kat a jô na: Me nji bo été. 26E nde mbo bisaé wua éziñ ya be nlô Ntuni, a vumane môte Pierre a nga tyiʼi alo, a zu jô na: Ye me nji yene wo afub li mia be nye? 27Ane Pierre a nga baʼalane beta kat, nnôm kub ki a nga sôane loñ été été.

Yésus asu be Pilat

(Mt 27:1-2,11-14; Mk 15:1-5; Lk 23:1-5)

28E nde be nga kôlô Yésus be Kayif a kee nye nda be njô bôt, a ésala mametyé. Bebien be nga bo teke nyiin e nda be njô bôt, be za kôb nsem éziñ, be kele di Pak. 29Ane Pilat a nga ke yene be nseñe a jô na: Ajô avé mia boʼolô môte nyô? 30Nde be nga nyoñe nkobô a yalane nye na: Nge môte nyô a nji ye bo mbo abé , ve bi nga ye bo te zu ve wo nye. 31Ane Pilate ki a nga jô be na: Mia bebien nyoñane nye, mi ke tyiʼi ajô dé a metiñe menan. E nde Beyude be nga jô nye na: Mfaʼa wongan, bi nji bi ngul éziñ ya tyiʼi ajô ya wôé môt. 32Ane ajô Yésus a nga tôéban ane a nga liti aval awu avé a ye wu. 33E nde Pilat a nga beta nyiin, a loone Yésus a jô nye na: Ye wo ô ne njôô Beyude? 34Ane Yésus a nga yalane na: Ye na womien wo jô ajô te, ye na bôte befe be nga kate wo de ajô dam? 35Pilate a nga yalane na: Ye me ke me mone Yude? Ke ayoñe dôé ebien, a minlô betuni e mbe be nga soo wo be zu me wo ve; ô nga bo jé? 36Ane Yésus a nga yalane na: Ejôé é ne énjam é nji bo ji ya si ndône mu; nge éjôé jam é too ji ya si ndône mu, ve nge bebo bisaé ya éjôé jam ba ye wosan na me bo te veban e mo Beyude. E nde ñhe éjôé jam é nji bo ji ya bi ne va. 37Ane Pilate a nga jô nye na: Ke ô ne ñhe njô bôt? Yésus ki nyee nye na: Womiene wo jô le na me ne njô-bôt. Ajô te nde me nga bialé de, ajô te nde fe me nga soo de si ndôn mu na, me zu boʼolô ajô ya bebela. A môt ase a ne môt ya bebela nye a wôʼô tyiñe jam. 38Pilat a nga jô nye na: Jé é ne bebela?

Ba ve Yésus mekua ya wu

(Mt 27:15-31; Mk 15:6-20; Lk 23:13-25)

Eyoñ a jôya nalé, ane a nga bulane ke yene Beyude a jô be na: Me me nji yen toʼo ajô éziñ e be môte ate. 39Ve mbôl mi bili tum na ma suu mia môte wua asu Pak, ye mia kômbô na me suu njôô Beyude? 40Ane be ki be nga jô a yôtane yôb été a ngule na: Sake môte nyô, suʼu bia Barabas. Barabas ki a mbe nkañ ze mimfaka.

Currently Selected:

YOANES 18: BULU09

Highlight

Copy