YOANES 17

Beta meyeʼelan me Yésus

(Rm 8:34; Hé 7:24-28)

1Eyoñe Yésus a maneya kobô mejô mete, ane a nga bete mis e yôp a jô na: A Tat, awolo e kpwaneya. Wumuluʼu Mone wôé, Nyômone ki a wumulu wo; 2aval ô nga ve nye ngule ya jôô bôte, e nde te bôte bese, ô nga ve nye a ve be ényiñ ya melu mese. 3Enyiñe ya melu mese ki é ne na bôt be yeme wo na wo étam ô ne nya Zambee, be yeme fe nyôô nga lôm, nye a ne Yésus Krist. 4Me nga ve wo duma e si nyô, amu me maneya sondô ésaé ô nga ve me na me bo. 5Ve éyoñe jina ki, a Tat, womien wumuluʼu ma a duma me nga tame bi be wo valé si nyô é ngenan te bo. 6Me nga bo na e bôte ô nga ve ma e si ndône mu be yeme jôé dôé. Be mbe émbôé, e nde ô nga ve me be, ane be nga baʼale ajô dôé. 7Eyoñe ji be yemeya na mam mese ô nga ve ma ma so foʼo be wo. 8Amu na mejô ô nga kalane ma me nga kalane be me, ane be fe be nga nyoñe me a yeme bebela na mamien me nga so be wo, a be nga buni fe na wo foʼo ô nga lôme ma. 9Ma yeʼelan asu dap, me nji yeʼelan asu si ndôn, foʼo ve asu bôt ô nga ve ma, amu be ne émbôé, 10a biôme biam bi ne émbiôé, a émbiôé bi ne émbiam, a ma nyoñe duma e be bôte bete. 11Mfaʼa wom, me nji fe bo e si ndône mu, ve be be ne e si ndôn, amu ma zu be wo. A Tate ô ne Mfufup, baʼaleʼe be a jôé dôé, di ô nga ve ma, nde be bo jôme jia aval ane bia wo bi né. 12Eyoñe me nga too bia be be, me nga baʼale be a jôé dôé, di ô nga ve ma, a me nga kamane be, a wua éziñe ya be be a nji jañ, sesale ve mone ya njañ, ane jam e ne ntilan da ye tôéban. 13Eyoñe ji ma zu be wo, a ma kobô mam ma e si ndône mu ane be ne bi avaʼa dam njalane e be be ne lut. 14Me nga mane ve be mejô môé, ane si nyô é nga wôʼô be biko, amu be nji bo bôte ya si mu, aval fe mamien me nji bo môte ya si ndôn. 15Me nji yeʼelane wo na ô vaa be e si ndôn, ve na ô baʼale be, amu Mbia Môt a ne. 16Be nji bo bôte ya si ndôn, aval fe mamien me nji bo môte ya si ndôn. 17Tune be a benya mejôô. Mejô môé me ne bebela. 18Aval ane ô nga lôme ma e si nyô, nalé ate fe me nga lôme be e si nyô. 19A ma ve mamien ane metunaʼa asu dap, na be fe be ve bebien ane metunaʼa e bebela été. 20Me nji yeʼelane wo ve asu bana étam, ma yeʼelane fe asu ba bese ba ye buni ma amu mejô map, 21ane be bese be ne bo jôm jijia, aval ane wo, a Tat, ô nee be ma, a ma fe e be wo, e nde be fe be bo jôm jia e be bia éyoñe te si ndôn ja ye buni na wo foʼo ô nga lôme ma. 22E duma ô nga ve ma, ma fe ma ve be de na be bo jôme jia aval ane bia wo bi ne jôme jia. 23Ma e be be, a wo fe e be ma, nalé ba ye tuʼa bo jôme jia, ajô te si ndôn ja ye yeme na wo foʼo ô nga lôme ma, a ô nga nyeʼe be avale fe ô nga nyeʼe ma. 24A Tat, ba ô nga ve ma, ma yi na e vôm me too be fe be tabe valé bia be be, ane ba ye yen étôtoʼo jam mamien, nje ô nga ve ma amu ô nga nyeʼe ma si nyô é ngenan te boban. 25A Tate ô ne zôsôô , si nyô é nji yeme wo, ve ma me nga yeme wo, a bana fe be nga yeme na wo foʼo ô nga lôme ma. 26Me nga mane bo na be yeme jôé dôé, a ma ye ke ôsu a bo na be yeme de, nalé ate nyeʼan ô nga nyeʼe ma wo ye tabe be be a mamiene fe e be be.

Currently Selected:

YOANES 17: BULU09

Highlight

Copy