YOANES 16

Lk 6:22-23

1Me maneya kate mia mam ma mi za kolé ôbak. 2Ba ye titane mia e meba me Zambe. Yaa, awolo da ye bo, éyoñ môt ase a wôé mia a ye simesane na a ve Zambe ékañaʼa ja yian. 3Ba ye bo mam mete amu na be nji yeme toʼo Tate, toʼo ma. 4Ve me maneya kate mia mam mete, ajô te, éyoñ awolo ya été da ye kpwaan, mia ye yeme na mamien me nga mane kate mia me.

Esaé Nsisim

(Yoa 14:16-17,26; Mm 13:1-3; 1 Jn 2:27)

5E nde, éyoñe ji, ma ke e be Môt a nga lôme ma, a teke môt éziñe ya be mia a sili me na: Wo ke vé? 6Ve mbôl me maneya kobô mia mam ma, e nlem ô jaéya mia a ôlun. 7Ma kate foʼo mia bebela na, e ne mia beta mfi na me ke. Amu nge ma bo te ke, Mvolô minlem aa ye ke zu be mia. Ve nge ma ke ki, ma ye ke lôme mia nye. 8Eyoñ a ye so, émien a ye kpwé si nyô ajô abé , ajô zôsôô , a ajô ntyiʼane mejô. 9Mfaʼa ajô abé , amu na be nji buni ma. 10Mfaʼa ajô zôsôô , amu ma ke e be Tate, mi teke fe beta yene ma. 11Mfaʼa ajô ntyiʼane mejô, amu na ajô njôô ya si ndône nyô e maneya tyiʼi. 12Me ngenane me bili mam abui ya kate mia, ve mi nji bi ngule ya jibi beʼe adite te éyoñe ji. 13Eyoñe ñhe, Nsisim bebela nye a ye so, a ye liʼitane mia zene ya bebela ase ngumba. Amu a ye bo te kobô mam mé, ve mam mese a ye wôk, e me a ye kobô, a kate fe mia mam ma zu. 14E nye a ye ve me duma, amu e jam a ye nyoñe be ma, e nde a ye kate mia. 15E mam mese Tate a bili me ne émam. Ajô te nde ma te jô na, a nyoñ e be ma a kate mia.

Olun wo ye veñesane mevak

(Yoa 14:18-19; Eze 39:29)

16Ane mon étun a lôté mia ye bo, teke beta yene ma, mon étun a beta lôt mi beta fe yene ma. 17E nsamba beyéʼé été bôte bʼéziñ be nga ke ba jô ba bevoʼo na, za akaʼajôô a kate bia di na, ane mon étun a lôté, mia ye bo te beta yene ma, mon étun a beta lôt, mi beta fe yene ma, amu ma ke e be Tate? 18E nde be nga jô na: Jé nje a jô na, mon étun? Bi nji yem e jam a kobô. 19Eyoñe Yésus a nga yeme na ba kômbô sili nye ajô te, ane a nga jô be na: Mia ke mia silane minsili zañe jenan a ajô ma jô mia na, ane mon étun a lôté, mia ye bo teke beta yene ma, mon étun a beta lôt, mi beta fe yene ma? 20Ma bele foʼo ane ma jô mia na, mia ye yôn a tat, ve si ndône ki ja ye vak. Mia mia ye foʼo wôʼô ôlun, ve ôlune wônan wo ye kôñelan a veñesane mevak. 21Eyoñe minga a kôʼôlô mmie, a tabe éyôé, amu éyoñe jé ya mintaé é soya. Ve ane mon a bialé, teke fe beta simesane mintaé, amu mevaʼa ya na ngumba môt ô bialéya e si ndôn. 22Mfaʼa wônan, mi bili foʼo ôlun éyoñe ji. Ve ma ye beta zu yene mia. A nleme wônan wo ye fôn a mevak, a mevaʼa menan mete, teke môt a ye vaa mia me. 23Môs ôte, mia ye bo te sili ma nsili éziñ. Bebela, bebela émien foʼo ma kate mia na, e jôm ése mia ye sili Tate a jôé dam, a ye ve mia je. 24Azukui éyoñe ji, mi nji jaʼé jam éziñ a jôé dam. Jakaʼane ñhe, mia ye nyoñ, éyoñe te avaʼa denan da ye bo njalan ne lut.

Me dañeya si nyô

25Me maneya zu ma kobô mia mam ma a minkana. Ve éyoñ ja zu, ma ye bo te beta kobôô mia a minkana, ma ye kate mia ajô Esaa wom ne ngeññ. 26Môs ôte, mia ye jaʼé Tate mam a jôé dam, a me nji kôsa jô mia na ma ye yeʼelane Tate ajô denan. 27Amu Tate émien a nyeʼe mia, amu mi nga nyeʼe ma, mi buni fe na mamien me nga so e be Zambe. 28Me nga so be Tate, ane me nga zu e si nyô. E nde ma beta liʼi si ndôn nyô a ke be Tate. 29Ane beyéʼé bé be nga jô na: Ke bia yene foʼo éyoñe ji na wo kobô ne ngeññ, teke ku nkana éziñ. 30Eyoñe ji, bia yeme na wo yeme mam mese, a teke mfi éziñe na môt a sili wo nsili. E ne bia buni valé na ô nga so be Zambe. 31Ane Yésus a nga jô be na: Ye mi buniya éyoñe ji? 32Ke awolo da zu, e soya fe so, mia ye mane tyamelan, môt ase a kele mfaʼa wé, mi liʼi ma étam. Ve da me nji bo étam, amu bia Tate bi ne. 33Me nga mane kate mia mame ma na, mi tabe mvoʼé ne mieññ amu ma. Mia ye foʼo bi bitibelaʼa; ve da, boʼone ngul minlem, mamien me dañeya si ndôn.

Currently Selected:

YOANES 16: BULU09

Highlight

Copy