MIMBOONE MINLÔMAN 15

Sañesañe ajô ntyiʼibane metye: Sinôde ya Yérusalém

(Ga 2:1-9)

1Bôte bʼéziñ be nga so Yudé a zu yeʼele bobenyañe na: Nge mia bo te tyiʼibane metye, aval ane atiñe Môze e né, mi se ngule ya yen ényiñ. 2Ane ñyeʼelan ôte ô nga té metyamaʼane, a beta be môman me nga bo e zañe Paul baa Barnabas, a beyeʼele bete. Ane ntyiʼan ô nga bo na Paul ba Barnabas a bôte befe bʼéziñ, ba ye ke Yérusalém a tôbane minlôman a bemvendé amu ajô te. 3Keké ya Antiôche é nga volô mfaʼa ya dulu te. Be nga tyii Fénésie a e Samari, a kañete aval ane meyoñe bikuu me nga kôñelane minlem. Foé éte é nga ve bobenyañe beta avak minlem. 4Nkuane be nga kui Yérusalém, keké é nga nyoñe be, minlôman a bemvendé. Ane be nga kañete be mame mese Zambe a nga ve be ngule ya bo. 5Wôna bebuni be nga so ñyebe Beyude be nga nyoñe nkobô a yemete na, ba yiane tyiʼi bebuni ba so meyoñe bikule metye, a sili be be baʼale metiñe me Môze.

Ôyili ya ajô te ékôane ya Yérusalém

(Rm 15:8-12; Kôl 2:11-17; Ga 5:1-6; Mm 21:25)

6Minlôman a bemvendé be nga sulane mfaʼa ya kôme ajô te.

7Amu nsañetan ô nga bo ayôñ abui, ane Pierre a nga nyoñe nkobô a jô na: A bobejañ, mia yeme na, amu ntobane Zambe aso atataʼa e zañe jenan, meyoñe bikuu me nga wôʼô Mbamba Foé anyu dam, a be nga suʼulane bo bebuni . 8Zambe, nyô a yeme minleme mi bôt, a nga kale mbunane wop, vôm a nga ve be Mfufube Nsisim avale fe ane bia. 9A nji liti nkandan éziñ e zañe jap a bia. A nga tune minleme miabe fe ve a zene ya mbunan. 10Nde den, bia ye veʼele Zambe aya, éyoñ bia kômbô kaʼa beyéʼé ba mbeʼe ñwô te, toʼo bʼésaa bangan, toʼo biabebien, bi nji bo ngule ya beʼe? Ma beta jô na, ve amu mvame Nti Yésus Krist, nde bia nyiñ. 11Bia buni na, bi nga nyiñ avale da da ane be.

12Ane ékôane bôt é nga ku ne kubuk, a vôʼôlô Paul baa Barnabas ane ba kañete mendem a bitua bi mame Zambe a nga ve be ngule ya bo e zañe meyoñe bikuu.

13Eyoñe be nga suu nkobô, ane Yakob ki a nga toʼé nkobô a jô na: A bobejañ, vôʼôlaʼane ma. 14Siméon a ndôme mane liti bia ane Zambe, aso melu ya atataʼa, a nga top, ézezañe ya meyoñe bikuu, bôte ya beʼe jôé dé. 15Mi lôô na, e jame di da luʼan a mejô bekulu mejô be nga kobô, ane e ne ntilane na:

16Mvuse ya mam mete,

ma ye beta zu lôñe ébeme David é nga ku.

Ma ye beta lôñe bitune mimfin bi nga liʼi.

Ma ye beta telé je tetele. 17Wôna, ataté éyoñe te,

mebukaʼa me bôt ma ye jeñe Nti

baa be meyoñe mese me beʼe jôé dam.

18Nalé Nti a jô,

nyô a bo mam mete,

mme me ntoo ñyeman aso nnôm éto.

19Ajô te ma kañese na, bi bo te bôôé jôme ya kolé ôbak ôsu ya be meyoñe bikuu. 20Ntilaʼane be ve na, be tyi abé bengunemelan, mbia be mam, betit ba wu abuk a metyi. 21Aso mmiaé mi bôt, Môze a bili bekatefoé tison ése, a na, ba lañe mam mete e meba me Zambe.

Ekoone ja kui tyiñe jia a tili kalate

(Ef 2:17-19; 1 Pi 4:10-11)

22Tyiñe jia keké ése, minlôman a bemvendé be nga tyiʼi na be tobe bôt e zañe jap, mbe ba ye lôme Antiôche baa be Paul a Barnabas. Ane Yudas, be nga loone jôé afe na Barsabas, a Silas, be nga toban e zañe bobenyañ. 23Ane be nga kee be kalate ékôan é nga tili, a too ntilane na: Minlôman, bemvendé a bobenyañ, bia batane bobejañ be ne bikuu be too Antiôche, Siri a Silisi. 24Bi maneya wôʼô, na bobejañ bʼéziñe ya be bia, be zuya ndeñele mia, a jañele mia fek a miñyeʼelane miap. Ve bi nji lôme be. 25Nde bia bese, tyiñe jia, bi nga tyiʼi na, bia ye lôme bôte bʼéziñe ya be bia a bidima bi bobejañ, Barnabas ba Paul. 26Mbe be nga ve binyiñe biab amu jôé Yésus Krist. 27Ajô te ñhe bia, lôme mia Yudas a Silas be kate mia a ayoʼo ese, e mam ma yian. 28Mfufube Nsisim, fufulu a biabebien, bi nga tyiʼi na, bia ye bo te kaʼa mia mbeʼe ôfe, vengevenge ve mam mʼéziñ bi se ngule ya saʼale. 29E ne na, mi saʼale betite be nga veban ane bityiʼa meyoñe bikuu, metyi, betite ba wu abuk a mbia be mame mese. Nge mia saʼale mame mete mese, wôna mi boya mvoʼé . Tabaʼane mvoʼé ! 30Eyoñe be nga kandan, ane minlôman mi nga ke Antiôche, vôme be nga loone ékôane bôt a lañe be kalate be nga lôme be. 31Nlañane ya kalate ate ô nga ve bôte avak, amu mejô ma ve ngule minlem be nga wôk, mme me nga so kalate ate été. 32Yudas ba Silas, mfaʼa wop, aval ane bekulu mejô, be nga ve be ngule minlem, a suʼu be éyoñ ése. 33Be nga tabe e be be nté éziñ, ane bobenyañ be nga suu be a tame be mvoʼé , ane be nga ke koone bobenyañ be nga lôme be. 34Silas a nga yene mvaé ya liʼi, a Yudas a nga ke étam. 35Paul a Barnabas, be be nga tabe Antiôche, fufulu a abui bobenyañ, a yeʼele bôt, a kate bôte mbamba Foé ya ajô Nti.

Paul baa Silas, ba ke dulu ya kate Mbamba Foé

(2 Ko 11:11-28; Rm 15:29; Hé 13:18)

36Eyoñ ôbe nté ô nga lôt, Paul a nga jô Barnabas na: E mbulaʼane ke jome bobejañe ya bitison bise bi kateya Mbamba Foé Nti. Bi ke yeme vôme be ntele. 37Barnabas a nga yi na, be kee Yôanes, a mbe jôé afe na Mark e nsamba wop. 38Ve Paul a nji kômbô, baa be môt a nga tame liʼi be Pamfilie, teke nyoñe ngabe ya ésaé jap, be wulu. 39Tee ñwôkaʼan ate a nga bo abui, abime ya na, be nga kandane mezen, môt ase a kele mfaʼa wé. Barnabas a nga nyoñe Mark. Baa nye be nga ke Sipre. 40Ve Paul a nga ke lat a Silas be ke nsamba, éyoñe bobenyañ be nga mane ve be mo ya mvame Nti. 41Ane a nga lôte Siri a Silisi a ve bekeké ngule minlem.

Currently Selected:

MIMBOONE MINLÔMAN 15: BULU09

Highlight

Copy