MIMBOONE MINLÔMAN 14

Paul ba Barnabas Ikôn a Listre

(Mm 17:2-14; Mt 10:23; 2 Tim 3:11; Mm 3:1-12; 17:22-31; Yer 10:3-16)

1Avale da da Ikôn, Paul baa Barnabas be nga nyiine Aba Zambe Beyude a kobô avale ya na, abui Beyude a Begrék be nga buni. 2Ve Beyude be nga bo te kpwéban a mejô map, be nga bé nsisime ziñ e zañe bobenyañ a e be meyoñe bikuu. 3Paul baa Barnabas be nga ke ôsu a tabe nté éziñ. Ndi nleme jap é nga to e be Nti, Nye émien a nga yemete Mbamba Foé ya mvame jé, a zene ya ve mo mabe ngule ya liti mendem a bitua bi mam. 4Ane bôte ya tison be nga kandane zañ, bevoʼo ngame Beyude, ba bevok e ngame minlôman. 5Meyoñe bikuu a Beyude be nga tyiʼi na, ba zu bo évô a wôé minlôman. 6Eyoñe be yemeya na abé e ntoo, ane be nga jeñe vôme ya sobô e tison ya Likaônie, Listre a Derbe a mefôla ma bôman. 7Be nga kate fe Mbamba Foé wé.

8Môt a mbe ñyeyeme Listre, te ngule ya tebe tetele a mebo mé. A mbe ñyeyem aso abialé. A nji tame wulu môs éziñ. 9Môs éziñ a nga vôʼôlô nkobô Paul, ane Paul a nga fombô nye a yene na a nga bili mbunane ya bo mvoʼé . 10Ane a nga jô nye a ngule na: Kôlôʼô si ô tebe a mebo môé. Ane môt ate a nga valé si a wulu.

11Eyoñe bôt be nga yene jame Paul a nga bo mise map me lôô, ane be nga bete metyiñe yôp e nkobô wobe ya Ikôn be jôʼô na: Bezambe, be funaʼane bôt, be zuya e be bia. 12Be nga yôlé Barnabas na Zeus, Paul ke na Hérmés, amu nye a nga bili ntum ajô. 13Ane ntuni zambe Zeus, nda Zambe jé é mbe atan akaʼa ya nlam, a nga zu beyôme benyak a bikate bi sam e mimbé yôbe ya tison, tyiñ a bôte na, a zu ve bityiʼa . 14Eyoñe foé nyô é nga kui melo me Barnabas baa Paul, be nga nyabe melôʼô map a ke avôl e be ékôane bôt a yôtan a jô na, 15jé mia bo ji, ke bia fe bi ne bôt ane mia. Mbamba Foé bia kat ane avale dina na, mi jôʼé biboboé mia bo, mi kôñelane minlem a buni vevea Zambe, nyô a nga té yôp a si a mañ, a biôme bise bi ne été. 16Aso melu kôa, a nga jôʼé miaé mi bôt mi wulu e mezene map. 17Ve akôsa bo nalé, a nji vuane liti be mvame jé, vôm a nga lôme mveñ é soʼo yôp a mimbu ya afok a ve mia bidi, a jalé minleme mienan a mevak. 18Mejô mete me nga veʼele volô bôte minlem, a bo be na, be jôʼé ôsimesane ya ve bityiʼa . 19Beyude, be soʼo Antiôche a Ikôn be nga dutu bôt be bôme Paul bebé ya wu. Be nga ke ba woʼotô nye atane ya tison a wua nye ane mbim. 20Ve éyoñe beyéʼé be nga zu bômane nye, ane a nga bi ngule ya kolô si a bulane tison. Tyé kpwaa, baa Barnabas be nga kôlô a ke Derbe.

Mbulane Paul ba Barnabas

(2 Tim 3:11-12; 2 Ko 6:4-9; Mm 13:1-3)

21Eyoñe be maneya kate Mbamba Foé e tison éte, a dutu bôt abui be bo beyéʼé, ane be nga beta bulan a lôte Listre, Ikôn a Antiôche. 22Be nga ve beyéʼé ngule minlem a tômôlô be na, be baʼale mbunan, a jô be na: ajô ya nyiin ayoñe Zambe da sili na bi jibi mam abui. 23Be nga telé bemvendé keké ése. Be nga bo meyeʼelan a tyi bidi a ve be e be Nti, nyô be nga buni. 24Eyoñe be nga lôte Pisidie, be nga ke Pamfilie, 25a kañete Mbamba Foé e Pergé, a tulan a kui Atali. 26Valé, be nga bet éfunga a ke Antiôche e vôme be nga taté dulu. Vôm ate be nga ve be mo me Zambe a ne mvam , ajô ya ésaé be nga ke bo. 27Eyoñe be nga kui, be nga sulane bebuni , a kañete be mam mese Zambe a nga bo ésaé jap été, a dañedañ ane a nga yoé meyoñe bikule mbé ya mbunan. 28Ane be nga tabe nté éziñ baa be beyéʼé.

Currently Selected:

MIMBOONE MINLÔMAN 14: BULU09

Highlight

Copy