MIMBOONE MINLÔMAN 16

Timôté a fubu e nsamba Paul ba Silas

(Rm 16:21; Fil 2:19-22; Ga 4:13-15)

1Eyoñe be nga lôte Siri a Silisi, Paul a nga yemete bekeké, akekui a nga kui Derbe a Listre. Nyéʼé a mbe wé, jôé dé na Timôté. Mone ngone Beyude é nga buni, ve ésaa a mbe mone Begrék. 2A nga bili mbamba nkañete be bobenyañe ya Listre a Ikône. 3Paul a nga kômbô kee nye e nsamba wé. Ane a nga nyoñe nye a tyiʼi nye atyel, amu a nga mate Beyude be nga bômane afôla te. Bese be nga yeme na, ésaa a mbe mone Begrék. 4E bitisone bise be nga lôt, Paul ba Silas be nga kate foé ya ntyiʼan ékôane minlôman a bemvendé be nga tyiʼi Yérusalém. Be nga yeʼele be na, be tôñe mintyiʼane mite. 5Bekeké be nga bo ngul e mbunan a yaé e tañe bôt, môs ane môs .

Nloon wo so Masédôan

(Mt 18:20; Yoa 6:44-45; Mt 13:23)

6Paul baa Silas be nga wulu afôla ya Frigi a Galate ase. Nalé, amu Nsisim a nga kame be na, be bo te kate Mbamba Foé Azi. 7Eyoñe be kuiya minné ya Mizie, be nga jeñe zene ya dañ a ke Bitinie, ve Nsisime Yésus ô nga kame be. 8Ane be nga lôte Mizie a siliki a kui Trôas. 9A alu ese, Paul a nga yene ñyenan, môt éziñ ya Masédôan a nga kui nye nlô, a tele tetele, a yeʼelane nye na zaʼa Masédôan, ô zu volô bia. 10Ve nné ane Paul a nga yene ñyenane wu, été été, bi nga jeñe zene ya ke Masédôan, amu bi nga tuʼa buni na, Zambe a looneya bia bi ke kate Mbamba Foé wé.

Minga, Lidia, a dubane Filipe

11Nkôlane ya Trôas, dulu ya e mañe yôp, bi nga ke zôsôô ne tiiñ a kui Samôtras. Tyé kpwaa, bi nga ke Néapôlis. 12A kôlôya valé, bi nga ke Filipe, nlô tisone ya sii ya Masédôan, ja wôk a éjôé ya Rôme. Bi nga tabe tison éte ôbe nté. 13E Môse Sabat, bi nga tulane mbé , bi sôñe na, bi kui afôla bi nga buni na vôme ya yeʼelan a ye yené. Bi nga ke bia womôlô ôsôé. Eyoñe bi tabeya si, bi nga laan e binga bi nga koone be valé. 14Wua ya e be be a to jôé na, Lidia. A mbe nkuane beveleves, bialébialé ya Tiatire, nye a nga too a kañe Zambe. A nga vôʼôlô bia nalé amu Nti a nga kui e nleme wé a bo nkômane ya vôʼôlô nkobô Paul. 15Eyoñ a nga duban, émien a nda jé, a nga loone bia a jô na: Amu mi kañese ya na me buni Nti, zaʼane ñhe tabane nda jam. A a nga yemete bia na bi kañese.

Paul baa Silas e nda mimbôk, a nkôlane wop

(Mm 19:23-24; 1 Tes 2:2; 1 Pi 4:12-13; Fil 1:12)

16Môs éziñ bi nga ke e nda meyeʼelan. Esoé mbo ésaé minga, é nga bili nsisime ya bemviʼi. A nga zu tôbane bia. Nkulane mam wé, ô nga ve bemasa bé moné abui. 17A nga tôñe bia mvus, a yôtaʼane na: E bôte ba be ne bebo bisaé be Zambe a dañe mbetebane yôp; ba kate mia zene ényiñ. 18Melu abui a nga bo a betaʼa yôtane nalé. Jame te e nga tyaʼa Paul nlem . Ane a nga suʼulane kobô, a jô mbia nsisim ate na: A jôé Yésus Krist, ma jô wo na, kôlôʼô e be minga nyô! Awolo te ebien, nsisim ô nga kôlô. 19Bemasa bé, éyoñe be nga yene na be nga zu sube moné wop, ane be nga bi Paul ba Silas, a ke ba sôʼôlô be e menganda bôt, ôsu betyiʼi mejô. 20Ane be nga kee be e be bejôô ya Rôme a jô na: E bôte ba ba zu zametane nlam wu. Be ne Beyude. 21Ba yeʼele metiñ, mme mete bia, bôte ya Rôme, bi nji bi ngule ya kañese nge baʼale. 22Ane bôte be nga tebe be ngame yat; ane bejôô ya Rôme be nga jô bôt be vaa be mengômesan, 23a bôme be mbia ébôm, a futi be mimbôk, a bendé bebaʼale nda mimbôʼô na, be tuʼa baʼale be. 24Eyoñ be nyoñeya abendé ya tuʼa baʼale be nalé, be nga kee be étune nda ya étééye a futi be bibome mebo.

25Bebé e zañe alu, Paul ba Silas, e meyeʼelan été, be nga yia bia a kañe Zambe, a mimbôʼô mivok mi nga vôʼôlô be. 26Atemeteme na, beta mfôʼôsane si a nga bo avale ya na, mbôkaʼa nda ô nga fôʼôsan. Mimbé mise ya nda mimbôk mi nga yombô éyoñe te ébien, a mengataʼa mimbôk mese me nga kuliban. 27Eyoñe mbaʼale nda mimbôk a nga vee ôyo, a nga yene mimbé ya nda mimbôk mi ñyoo. A feʼe ya na, mimbôk mi maneya tup, a nga nyoñe nkpwaté mekôn wé a kômbô wôé émien. 28Ve Paul a nga bete tyiñe yôp, a jô nye na: Te wôé womien. Bi ne va. 29Ane mbaʼale nda mimbôk éte, a nga fôʼôban. Ane a nga ku mebo me Paul a Silas. 30Eyoñ a nga kuli be atan, a nga sili be na: A beti, me ne bo aya ane me ne yen ényiñ? 31Ane be nga yalane nye a jô na: Buniʼi Nti Yésus a nda jôé, wôna wo ye yen ényiñ. 32Ane be nga kate nye Mbamba Foé Nti, baa be bôte bese be nga nyiñe vôme wua. 33E zañ alu éte ébien, mbaʼale nda mimbôk a nga kee be na, be ke sôbe be mefô. Wôna, teke beta yange, ane a nga duban, émien a bôte bé bese. 34Ane a nga kee Paul ba Silas, a ve be bidi, a vak a nda bôte jé, amu be nga buni Zambe.

35Tyé kpwaa, ane bejôô ya Rôme be nga lôme bebo bisaé bap be kate mbaʼale nda mimbôʼô na: Suʼane bôte bete. 36Ane mbaʼale nda mimbôk a nga kate Paul foé nyô na: Bejôô ya Rôme ba jô na bi suu mia. Ajô te kuian atan, mi ke mvoʼé ! 37Ve Paul a nga kobô a jô na: Be nga bo na be bôme bia bôt été, tee étom, bi ne fe bôte ya éjôé ya Rôme. Be nga futi bia nda mimbôk, ve éyoñe ji be nga kômbô suu bia asoé. Teke bebé, bebien, be zaʼa suu bia. 38Ane bebo bisaé be nga ke kate bejôô ya Rôme tyiñe Paul. Ane be nga ko woñ éyoñ be nga yeme na, be fe be ne be bialébialé ya éjôé ya Rôme. 39Ane be nga sili be njaman . Ane be nga jôʼé be a sili be na, be kôlô tison été. 40Eyoñe be nga kôlô nda mimbôk, Paul ba Silas be nga ke yene Lidia a bobenyañ bevok, a ve be ngule minlem. Ane be nga bulan a ke.

Currently Selected:

MIMBOONE MINLÔMAN 16: BULU09

Highlight

Copy