Malatchi 3
3
1Ma didin ma ad’engêm kal petna mi dala: Agi gologiya! An mba ni sunï man ma sunda; mba mi min lovota avoronu. Ata yi máma na wat Salad’a ma agi nga halama, mba mi kal kur gong mam mba kud’ora; gola! Sama an sunumî yam vun ma djinda ma agi minima nga mi djïya.
2Ni nge ba, mba mi so tam kur bur ma mba mamba ge? Ni nge ba, mba mi tchol avorom fata mba mi ndei woi d’a ge? Kayam mi hle tamî d’igi akud’a hi suma tchafid’a na, mi hle tamî d’igi sabulâ hi sama mbus barud’a hapina na mi. 3Mba mi kak kä d’igi sama mi yor kawei ma hapma á mbud’ut yed’etna na, mba mi mbut Levi andjavam yed’et, mba mi yorozi d’igi a nga yor lora ki kawei ma hapma na. Azi mba he he d’a hawad’a ata lovod’ot mi Ma didina mi. 4Ata yi máma he d’a hawad’a hi suma Juda-nid’a ki d’a hi suma Jerusalem-mid’a mba d’i mbut djivid’a ir Ma didina d’igi kur bur ma avo’â na, d’igi kur biza d’a kal leid’a na mi.
5Ma didin ma ad’engêm kal petna mi dala: An mba ni hud’ï atagi go á ka sariyad’a, mba ni b’at tan á le glangâsa yam suma kuma suma fileina ki suma mizeuna, yam suma a nga gun tazi ir gurzulina, yam suma a nga he wuraka d’uo mi suma a nga lazi sundina, yam suma a nga le ir arop suma modonod’a ki suma hokuyod’ina, yam suma a nga we angoyogeina tchet tuo na, yam suma a nga ringîn mandaran nduo na mi.
Suma a nga lop ir Alona kur dima
6Ma didin ma ad’engêm kal petna mi dala: An ni Ma didina, an nga ni mbut ti, agi Jakob groma, agi dabagi nga woi d’uo mi. 7Agi d’ezegi woi yam gat manda, agi ngomot nga d’uo d’igi abuyogi ngolo a ladjeu dei na mi. Le agi hulongôgi gevenu ni, an Ma didin ma ad’engên kal petna mba ni hulongî gevegiya. Agi nga dagi ala: Ami mba mi gevengî nana ge? 8Sana mi lop ir Alona ko zu? Wani agi lobondiya. Agi nga dagi ala: Ami lobong irang ni ki me ge? Ni kur dima#3.8 Dima: Nala, Dogo, a pat tu mAlona. ki he d’a hawad’a. 9Agi Israel-lâ pet, an gagi vuna kagi ni kayamba agi lobon iranda. 10An min ala agi mbeyegi ki dima pet kur gong nga ngom ahlena, kayam tena mi kak kur gong man nda kud’ora. Agi kugun an Ma didin ma ad’engên kal petna hina gi, agi mba wagiya, le an malagi nga ir mbiyo ma akulona d’uo, le an hagi nga ahle suma djivina ngola kal kagi d’uo ni, agi mba wagi ko. 11An mba ni d’el vun ahle suma a b’lagagi ahligiyegina; a mba b’lagagi vud’ahle magi suma yam andaga magid’ina d’uo; guguzlu magid’a mba d’i ba bei vuta d’uo mi. 12Ata yi máma andjaf suma pet a mba dagi ala: Agi lagi furîd’a, kayam ambas magid’a mba d’i mbut nambas sa duzîd’a. An Ma didin ma ad’engên kal petna ni de na.
Alona mba mi we sum mama hohowoziya
13Ma didina mi dala: Zla magi d’a agi dandjid’a ni d’a asa’ata. Agi dagi ala: Ami dami ni zla me d’a tchod’a kang nge? 14Agi dagi ala: Ei tchi tei á le sunda mAlona ni hawa. Kid’a ei nga ngomei gat mamba ei tid’i ki hohoud’a avoromba, ei fei ni me abo Ma didin ma ad’engêm kal petna ge? 15Tchetchem mba wanda, hotei ni suma subur tad’a d’o, kayam azi nga ki furîd’a! Gagazi, suma tchona, ahle mazina a nga zula, a nga kuk Alona wan pî, va nga mi lazi d’i!
16Wani suma a ring mandara Ma didinina, a de tazi zlad’a; Ma didina mi kak hina tchugot, mi huma. A b’ir mbaktum mba djib’era avorom yam suma a ringîm mandaram a suburum simiyêm mi na. 17Ma didin ma ad’engêm kal petna mi dala: An mba ni mbud’uzi sum mana kur bur ma an mba ni tak ad’eng manda woi kuana, an mba ni wazi hohowozi d’igi sana mi we gorom ma mi sunuma hohowom na. 18Ata yi máma agi mba wagi wal la an mba ni wal ir suma d’ingêrâ ki suma tchona woid’a, ir suma a nga lan sundina ki suma a nga lan sunda d’uo na.
Alona mba mi tak ad’eng mamba woyo
19Ma didin ma ad’engêm kal petna mi dala: Gola! Burâ nga mi mba mi hle tamî d’igi aku alamba ngola na. Suma asa’atna ki suma tchona pet a mba mbut ni d’igi kuzad’a na. Kur bur máma akud’a mba d’i ngalazi woyo, sideî d’oze abo agu tu pî mba mi ar ri. 20Wani kayam agi suma ringîn mandarana, d’ingêra mba d’i deî kagi d’igi afata ti deî yam suma na, suta#3.20 Suta: Nala, sut ndata ni suta hi hliu tad’id’a nga kua mi. mba d’i tak tat tei iragi d’igi afata ti b’o yam suma na mi. Agi mba buzugugi woyo, agi mba dub’aragi d’igi amuzlei suma gureina a buzuk kei dub’ara avun kangâna na mi. 21Kur bur ma an mba ni tak ad’eng manda woi kuana, agi mba mired’egi suma tchona kä kasegiya, a mba mbut ni d’igi butna na kä ad’u asegiya.
Eli mba mi hulongîya
22Agi djib’eregi yam gat ta an hat mi azong mana Moise yam ahina d’a Horep-pa yam Israel-lâ peta, nala, gata ki vun ma hed’a.
23Gola! An mba ni sunugï ma djok vuna Elie, avok burâ hi an Ma didina mba ni mba kuana; ni bur ma ngol ma mandarâ. 24Mam mba mi zlap abuyod’a ki grod’a, grod’a kabuyod’a tu tala an b’lak ambasa woi d’uo d’a.
Currently Selected:
Malatchi 3: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
