Malatchi 2
2
1Ma didin ma ad’engêm kal petna mi dala: Wana ni vun ma hed’a mi agi suma ngat buzuna: 2Le agi humugi d’uo, le agi tinigi nga hurugi á suburun simiyên nduo ni, an mba ni gagi vuna, an mba ni b’lagagi djivi magid’a woyo. Gagazi, an mba ni b’lagat teyo, kayam agi vagi nga zla manda kurugi d’i. 3Gola! An mba ni ngobogi andjavagiya, an mba ni kogi sutna iragiya – sud’o ahle suma agi ngad’andji buzunina; a mba yogi ki sed’em mi.
4Ma didin ma ad’engêm kal petna mi dala: Ata yi máma agi mba wagi ala ni an ba ni hagi vuna, kayam vun ma djin ma an djinim ki suma hi Levi-nina#2.4 suma hi Levi-nina: Ni suma ngat buzuna abuzi ngolo. mi ka’î ma iratna. 5Vun ma djin ma an djinim ki sed’ezina narid’a ki halasa; an hazizi kayam a lan ki mandaranu, a ringîn mandaran a zlak avoron mi. 6Gat ta gagazid’a nga avunaziya, a nga fe zla d’a aboina avunazi d’i; a tit ki sed’en ki halasa ki d’ingêra mi, a hulongî suma woi kur tcho mazid’a ablaud’a. 7Kayam suma a wan an Alona nata ma ngat buzuna, suma a had’an gat manda natam mi, kayam mam mi ma an Ma didin ma ad’engên kal petna ni sunumina.
8Ma didin ma ad’engêm kal petna mi dala: Wani agi d’ezegi woi kur lovota, agi mbud’ugi hat magid’a ni vama dap asema mi suma ablaud’a, agi b’lagagi vun ma djin ma an djinim ki suma hi Levi-nina. 9An mba ni gologi is, an mba ni mbud’ugi d’igi vama ndak kuo na na avok suma pet, kayam agi ngomogi nga lovot manda d’i, agi kagagi ni ir suma go ata yima agi nga vazi ad’u gat mandina.
Suma Juda-na a mbut suma mbut ir Alona
10Na ni ei pet abui ni tu d’uo zu? NAlo ma tu máma ba, mi lei d’uo zu? Ni yam me ba, ei nga mbud’i ir tei á b’lak vun ma djin ma Alona djinim kabuyoina ge? 11Suma Juda-na a mbut suma mbut ira, a mbut ambas sa Israel-la kazì ma Jerusalem-ma ndjendjed’a, kayam a mbut vama a tinim iram vam mi Ma didinina ndjendjed’a, nala, gong nga hurum vata, kayam a vik arop suma a nga kud’or alona handjaf suma dingîna. 12Sama lara ma mi lahle suma hina nina, Ma didina mba mi pad’am mbei aduk andjafâ hi Jakob-ma ki sum mama pepet; le ni ma nga mi mbam ki vama ngat buzuna he d’a hawad’ina pî, mba mi pad’am mbeyo.
13Wana ni vama ding ma agi nga luma: Agi nga tchigi ata yima ngal ahle suma ngat buzuna hi Ma didinina ki simina iragi ki yor tad’a mi, kayam mam nga mi tin iram yam he d’a hawa magi d’a ngat buzuna d’i, nga mi ve va abogi d’uo mi. 14Agi nga dagi ala: Ni kayam me hina ge? Ni kayamba Ma didina ni ma glangâsâ adigang kamang nga azong nga ndjun nda ang djin vunang ki sed’et ta ang wal lei ki sed’eta. 15NAlona ba, mi mbud’ugi hliu ma tuna ki muzuk ma tuna d’uo zu? Ni kayam me ba, mi le hina ge? Kayam agi vud’ugi gro suma d’ingêrâ mAlona. Agi gologi tagi djiviya! Ar sa adigagi mi wal lei kamam mba azonga d’i. 16Ma didina Alona hi Israel-lîna mi dala: An min nga dika hatchad’id’a d’i, an min nga sama mi mbut tam tchod’a kasa’at ta led’ina d’i. Wani agi gologi tagi djiviya! Ar agi mbud’ugi ir amiyôgina d’i. An Ma didin ma ad’engên kal petna ni de na.
Alona nga mi mba á ka sariyad’a
17Agi nga kawagi Ma didina ki zla magi d’a ded’a. Wani agi nga dagi ala: Ami kawamî ki me ge? Ni ki zla d’a agi nga dagi ala: Sama lara pî ma mi le tchod’ina ni ma djivina ir Ma didina, nata sama hina na ba, tam mbi lum djivid’a kam mi! d’oze, Alo ma ka sariyad’a mi nga ni lara ge d’a.
Currently Selected:
Malatchi 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
