Malatchi 1
1
Alona mi man Israel-lâ
1Ni zla d’a Ma didina mi dat mi Malatchi á dat mi Israel-lîd’a. 2Ma didina mi dagi ala: An le kagi heî, wani agi hulong dum ala: Ang le kami ni ki me ge?
Ma didina mi hulong dagi ala: Esau ni Jakob wiyema d’uo zu? Hina pî, an le yam Jakob, 3wani an noî Esau. An mbut ahuniyô mama vama hohoud’a, an he djo mama mi hâ ma hur fulîna.
4Suma Edom-ma#1.4 Suma Edom-ma: Nala, Esau andjavamu. a dala: Gola! Ahle mamina a b’lak kei wan pî, ami mba minizi akulo! Ni hina ba, Ma didin ma ad’engêm kal petna, mi dala: Arazi a mina; an mba ni tozi woi mi. Suma a mba yazi ala: Ambas sa tchod’a! Suma Ma didina hurum zal kazi ki iram fafatna.
5Iragi mba d’i waziya, agi tagi mba dagi ala: Ma didina ni ma zlam nde yina yam andaga d’a Israel-la gak kal lei yam haga matina.
Alona mi ngop suma ngat buzuna
6Ma didin ma ad’engêm kal petna, mi de mi suma ngat buzuna ala: Gorâ nga mi hu abumu, azongâ nga mi hu salama mi. Wani le an nabugiya ni, hu manda nara mi ge? Le an ni Salagina ni, ge yam mba kä avoronda nga ni lara? Agi nga lazan simiyênu, wani agi nga dagi ala: Ami nga lazang simiyêngî ki me ge? 7Ni kayamba agi nga mbagi kahle suma te suma ndjendjed’a yam yi man ma ngal ahle suma ngat buzunid’a. Agi nga dagi ala: Ami mbud’ung ndjendjed’a ni ki me ge? Ni kayamba agi golon yi man ma ngal ahle suma ngat buzuna isa.
8Ma didin ma ad’engêm kal petna mi dala: Ata yima agi nga mbagi ki vama ngat buzu ma dukina, ni tchod’a d’uo zu? Ata yima agi nga mbagi ki vama ngat buzu ma dileîd’ina, d’oze ma tugud’eid’ina, ni tchod’a d’uo zu? Ang hazi mi mang ma te yamba go! Mba mi vazi abong zu? Mba mi vang atam djivid’a zu?
9Ma didin ma ad’engêm kal petna mi dala: Ki tchetchemba, agi suma ngat buzuna, agi tchenegi Alona kayam mi wei hohoweya! Ni kayam agi ba, ahle ndazina a mba, na ni mba mi vagi atam djivid’a zu?
10Ma didin ma ad’engêm kal petna mi dala: Agiya, ni nge adigagi ba, mba mi duk vun gong man nda kud’ora akulo tala agi ngalagi akud’a yam yi man ma ngal ahle suma ngat buzuna hawa yak kuo d’a ge? Tan nga d’i lan djivid’a kagi d’i. An min ve he d’a hawa magid’a abogi d’i.
11Ma didin ma ad’engêm kal petna mi dala: Deîd’a hafatid’a gak nik mata, simiyên nga mi yï aduk andjaf suma, a nga ngalan dubang ma his djivid’ina á suburun simiyênu, a nga mban ahle suma ngat buzu suma nda’â mi, kayam simiyên nga mi yï aduk andjaf suma. 12Wani ni agi ba, nga lazan simiyênu. Agi nga dagi ala: Yima ngal ahle suma ngat buzunina hi Ma didinina mi ndjendjed’a, ahle suma te suma yam yima ngat buzunina, agi golozi is mi. 13Agi nga dagi ala: Ni ndaga me na ge! Agi nga hlagi yagi woi vivik mi. An Ma didina ni de na.
Ma didin ma ad’engêm kal petna mi dala: Hina wan pî, agi nga mbagi ki vama kula ki ma dileîd’a ki ma tugud’eid’a mi ala ni he d’a hawa magid’a. An mba ni vat abogi zu? 14Vun ma ged’a yam sama lop ir ma mi nga ki timi mam ma djivina aduk d’uwar mama, mi hle vunam kam á ngad’andji mi an Ma didina ko ba, mi vragam ki ma dakina. An Ma didin ma ad’engên kal petna ni de na, kayam an namul ma ngolâ, simiyên ni ma kal papa aduk suma petna mi.
Currently Selected:
Malatchi 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
