Jean 21
21
ZLA D’A DABI D’A JESUS MI TAK TAM MBEI KUA AVO GALILE-D’A
(21.1-25)
Jesus mi nde tam mbei ir mam suma hata kid’iziya
1Bugol ahle ndazina, Jesus mi hulong tak tam mbei ir mam suma hata avun apo d’a Tiberiyat-ta. Wana ni tak ka mi tak tam mbei irazid’a: 2Simon Pierre, Toma ma a yum ala Ngoneîna na, Natanayel ma Kana d’a Galile-d’ina, Zebede groma ki suma hata hi Jesus suma dingâ mbà, a nga zlapa ata yima tuna. 3Simon Pierre mi dazi ala: An i tchiuna.
Azi dum ala: Ami imi ki sed’eng mi. Azi buzuk keyo, a djak kur alumba, a i tchiuna. Kur andjege ndata, a ve nga va d’i. 4Kid’a yina nga mi lá fod’id’a, Jesus mi nga tchola avun gongôd’id’a, wani mam suma hata a we nga d’ala ni Jesus d’a d’i. 5Kayam ndata, Jesus mi dazi ala: Grona, agi nga ki kuluf fuo zu?
A hulong dum ala: Va nga d’i.
6Mi dazi ala: Agi tchugugi abeina abo alumba abot ma ndjufâ, agi mba fagi ini. Azi tchugum mi. Ata yi máma, azi nga kad’enga á tanam mbi, abo kuluf ma oî kurâ.
7Kayam ndata, ma hat ma Jesus mi le kam heîna, mi de mi Pierre ala: Ni Salad’a.
Kid’a Simon Pierre mi hum ala ni Salad’a d’a, mi kleû baru mama atamu, kayam mam mi gandilad’a, mi ge tam kä á mbiyo. 8Wani suma hat suma dingâ a mba kalumba, a tan abeina oîd’a ki kulufâ, kayam azi nga dei ki vun gongôd’id’a d’i, a ni d’igi metred’a kis na. 9Kid’a a djak kei del gongôd’id’id’a, a wakud’a nga ved’a ki kiwilâ kä, kulufâ nga tchuka kad’u, kavungôna mi. 10Jesus mi dazi ala: Agi yogï kuluf ma agi vigigizï ka tchetchema nde, agi mbeyegïziya.
11Simon Pierre mi djak kur alumba, mi vabeina, mi tanam del gongôd’id’a oîd’a ki kuluf ma nglona kis yam dok vahl yam hindi. Mablaud’a hina pî, abeina mi tchal nga d’i. 12Jesus mi dazi ala: Agi mbeï tagiya. Aduk suma hata ma ndak á djobom ala: Angî nge ge na nga d’i, kayam azi wala ni Salad’a. 13Jesus mi mba, mi yo avungôna ki kulufâ, mi haziziya.
14Wana ni tak ka Jesus mi tak tam mbei ir mam suma hata yam á hindid’a, bugol la mi tchol akulo aduk suma matnid’a.
Jesus azi ki Pierre
15Bugol la azi te dad’a, Jesus mi de mi Simon Pierre ala: Simon Jean goroma, ang le kan kal suma wana zu?
Mi dum ala: Â, Salana, ang we an le kangû.
Jesus mi dum ala: Ang he gro tumiyô mana tena. 16Jesus mi dum kua á mbàd’a ala: Simon Jean goroma, ang le kan ndju?
Pierre mi hulong dum ala: Â, Salana, ang we an le kangû.
Jesus mi dum ala: Ang pol tumiyô mana. 17Mi djobom yam á hindid’a ala: Simon Jean goroma, ang le kan ndju?
Pierre hurum zal yam de d’a mam dum yam á hindid’a ala: Ang le kan ndju d’a. Pierre mi dum ala: Salana, ang wahlena pet, ang wala an le kangû.
Jesus mi dum ala: Ang he tumiyô mana tena. 18Gagazi, an nga ni dangû, kid’a ang ki gogorong tua d’a, ang djin d’i’â furung katangû, ang tit ata yima hurung mina. Wani fata ang mbut wa mamarâ ni, ang mba mat abongû, sama ding mba djining d’i’â furungû, mba mi ing ata yima ang hurung minim mbuo na. 19Mi de hina ná tak matna hi Pierre ma mba mi subur Alonina. Bugol la mi de hina dad’a, mi dum ala: Ang tid’ï ad’unu.
Jesus azi ki ma hat ma mam le kam heîna
20Pierre mi pret tamu, mi we ma hat ma Jesus le kam heîna nga mi djï bugolo. Ni ma deng tam ata Jesus kid’a azi nga te te ma fladegenid’a, ni ma mi dum ala: Salana, ni nge ba, nga mi hang abo suma ge na. 21Kid’a Pierre mi wumba, mi de mi Jesus ala: Salana, sama wana mba mi le ni nana ge?
22Jesus mi dum ala: Le an min ala mam kak gak mba manda mbeyû ni, vama ndolong ang kua ni me ge? Ang tid’ï ad’unu.
23Kayam ndata, zla ndata ti b’rau aduk b’oziyozina ala ma hat máma mba mi mit ti. Jesus mi dum nga d’ala mam mba mi mit tuo d’i, wani mi dum mala: Le an min ala mam kak gak mba manda mbeyû ni, vama ndolong ang kua ni me ge?
24Ni ma hat máma ba, mi le glangâsâ yam ahle ndazina wana, ei wei ala glangâs mama ni gagazi mi.
Zla d’a dabid’a
25Ahle suma ding suma Jesus mi lazina, a nga ngola. Ladjï a b’irizi tutu ped’u ni, an djib’er ala yima kur duniyad’ina pî, nga mi ndak yam mbaktum mba teteng nga a b’irita d’i.
Currently Selected:
Jean 21: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
