Sunda hi suma a sunuzinid’a Wana ni modo zla d’a kuruta
Wana ni modo zla d’a kuruta
Mbaktum mba yam Sunda hi Suma a Sunuzinid’a ni mbaktum mba mbà d’a Luc mi b’irita. Kur Zla d’a Djivi d’a mam tchat walat avoka, mi de zlad’a ni yam kak ka Jesus mi kak yam andagad’a ka hid’a.
Wani kur mbaktum mba wanda, bugol la Jesus mi hulong sä akulod’a, ei dok wei Jesus kur hliu tam mbuo d’a. Jesus mi vo Muzuk mama ni yam mam suma hata. Bugola, Jesus ma sana mi ndak á wum ki iram mbuo na, nga mi le sun mamba nad’u ad’enga hi Muzuk mamid’a.
Ei wei ad’u tinda hatchogoid’a hi Tokid’a. Ei wei ad’u tinda hadesâ hi kretiyêna kur Jerusalem aduk Juif-fâ, kur Antiyos kazì ma nglo ma teteng ma aduk andjaf suma dingîna mi.
Ei wei Pierre ma a sunuma nga mi le sunda ad’u ad’enga hi Muzu’â hAlonina. Bugola, ei wei Paul ma a sunuma nga mi le sunda nad’u ad’enga hi Muzuk máma mi. Paul mi i ata yima dedeina á tchi wal zlad’a hi Christ-sa.
Ei wei zla d’a teteng nga ti tchol akulo kur Tok ka awilid’id’a, ei wei djop vun ma a djobozizina ki ndjun nda Muzu’â hAlonina mi ndjunuzi á min ahle ndazinid’a mi.
Ata yima teteng ma kur mbaktumbina ei wei ala Luc ma b’iritna mi nga zlapa ki Paul. Gol 16.10-16; 20.5-16; 21.1-18; 27.1–28.16.
Zla d’a Djivi ndata ti b’rau woi kur duniyad’a pet ata wal la tchid’a hi suma a sunuzinid’a ki zla mazi d’a ded’a. A tak Jesus woi mi suma pet, nala, mi Juif-fâ kandjaf suma dingâ mi. Burâ ki burâ Muzu’â hAlonina nga mi i ki suma á tagazi Jesus tamba, hat mam mba mi had’ata ki sun mam mba ndandal la mi lata mi.
Ahle suma a lazi kur mbaktum mba yam Sunda hi Suma a Sunuzinid’a, a mal lovota woi mi Tok ka kur atchogoi d’a lara ge pet á ndak vun sun mata, á tchi wal Zla d’a Djivid’a hi Jesus Christ-sa mandjaf suma pet gak dabid’a handagad’id’a. t Wana ni wal mata
Min tad’a yam wal la tchid’a 1.1-26
(a) Vun ma he ma danana hi Jesus-na ki vun ma hled’a 1.1-14
(b) Sama vrak balum Judas-sâ 1.15-26
Wal la tchi d’a avo Jerusalem-mba 2.1–8.3
Wal la tchi d’a yam ambas sa Jude-d’a ki d’a Samari-d’id’a 8.4–12.25
Wal la tchid’a hi Paul-la 13.1–28.31
(a) Wal mam mba tchi d’a avoka 13.1–14.28
(b) Tok ka suma a tok Jerusalem-mba 15.1-35
(c) Wal la tchid’a hi Paul la yam á mbàd’id’a 15.36–18.22
(d) Wal la tchid’a hi Paul la yam á hindid’id’a 8.23–21.16
(e) A ge Paul dangeina avo Jerusalem, avo Sesare, avo Rom mi 21.17–28.31
Currently Selected:
Sunda hi suma a sunuzinid’a Wana ni modo zla d’a kuruta: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.