Sunda hi suma a sunuzinid’a 1

MIN TAD’A YAM WAL LA TCHID’A

(1.1-26)

Agi djubugi vun ma hled’a hAbuna

1Teyofil,

Kur mbaktum man nda avoka an dang ahlena pet suma Jesus mi tin ad’u á led’a, á hata 2gak bur ma Alona mi hlum sä akulona. Avok i mam mba sä akulod’a, mi he vuna yam ad’enga hi Muzuk ma bei tchod’a ba na mi mam suma a sunuzi suma mi manazina. 3Bugol mat mama, mi nde tam mbei ir sum ndazina á tagazi woi ala mam nga karid’a gagazi. Mi le burâ dok fid’i ki sed’eziya, mi dazi zla d’a yam leud’a hAlonid’a mi. 4Kid’a Jesus nga zlapa ki sed’ezi tua d’a, mi hazi vuna ala: Ar agi walagi woi ki Jerusalem mbi, wani agi djubugi vun ma hled’a hAbun ma an dagi kam adjeuna. 5Kayam Jean mi le suma batemba ni ki mbina, wani ar nga burâ ngol li an mba ni lagi batemba ki Muzuk ma bei tchod’a ba na.

Jesus mi i akulo

6Suma a nga toka gen Jesus-na a djobom ala: Salad’a, ni ki tchetchemba ba, ang mba hulong he leud’a mi Israel-lâ zu?

7Jesus mi hulong dazi ala: Nga ni kayam agi á wagi yina d’oze atchogoi d’a Abun mi ngat kur ad’eng mambid’a d’i. 8Wani fata Muzuk ma bei tchod’a ba na mba mi mba kagid’a, agi mba fagi ad’enga, agi mba mbud’ugi man suma glangâsâ kur Jerusalem ki Jude pet ki Samari gak dabid’a handagad’id’a. 9Bugol la mi de zla ndata dad’a, Alona mi hlum sä akulo. Kid’a azi nga golom tua d’a, d’ugula vid’im iraziya.

10Ata yima irazi nga sod’a gola akulo kid’a Jesus nga mi id’ina, gola, suma mbà ki baru ma hap ma titilâ a nga tchola geveziya, 11a dazi ala: Agi suma Galile-na, ni kayam me ba, agi tchologi á gol akulod’a ge? Ni Jesus ma Alona hlum sä akulo adigagina, mba mi hulongî ni d’igi agi golom i mam mba sä akulod’a na mi.

Sama a manam balam Judas-sâ

12Ata yi máma, mam suma a sunuzina a tcholï yam ahina d’a a yat ala Olif-fa, a hulong Jerusalem. Nahina d’a go ki Jerusalem-mba, adigazi ni d’igi kilometred’a tu na. 13Kid’a azi kal avod’a, azi djak kur gong nga yam ndrata akulod’a, ata yima azi nga kaka kuana, nala, Pierre azi ki Jean, Jacques, Andre, Filip, Toma, Bartelemi, Matiye, Jacques Alfe goroma, Simon ma kak djangûna ki gata hi Romê-d’a avo’â ki Judas Jacques goroma mi. 14Azi pet a nga toka, a nga tchen Alona ki hur ma tuna zlapa karopma ki Marie Jesus asum ki b’oziyoma mi.

15Kur bur máma Pierre mi tchol akulo aduk b’oziyom suma a nga tokina, a ni d’igi kis yam dok mbà na, mi dazi ala: 16B’oziyona, mbeî zla d’a b’ir ra Muzuk ma bei tchod’a ba na mi dat avun David yam Judas ma mba mi tak lovota mi suma á ve Jesus-nid’a ti ndaga. 17Ni ma adjeu a ndumum ki sed’eina, mi fe wa b’rau mamba kur sun ndata mi.

18Sa máma mi gus asinena ki wurak mam mba tchod’a, mi ge tam kä, hayam mun ndeyo, aruwad’am buzuk kei mi. 19Suma a nga kur Jerusalem-ma pet a we zla ndata. Hina, azi yi asine máma ki vun mazina ala Hakeldama, nala, Asine ma buzuna.

20Kayam a b’ir kur mbaktumba hi Sawal la Giled’a ala:

Ar yam ma kaka mi mbut djona,

ar sa mi kak kua d’i.

A b’ir kua ala:

Ar sama dingâ mi vrak kur sun mamba.

21Kayam ndata, mbeî ei manei sana tu ma nga ki sed’ei teteu ata yima Salad’a Jesus mi nga ki sed’ei karid’a tua na, 22ni ma mi tinï ad’ud’a ata batemba hi Jean-d’a dei gak bur ma Alona mi hle Jesus sä akulo adigeina. Mbeî sa máma mi mbut ni ma le glangâsâ zlapa ki ami yam tchola hi Salad’a Jesus d’a akulo aduk suma matnid’a. 23Azi tin suma mbà avoroziya. Ma avo’â a yum ala Josef ni ma a yum ala Barsabas na, simiyêm ma mbàna ala Justus. Sama dingâ a yum ala Matiyas.

24A tchen Alona kazi ala: Salad’a, ang ma we hur suma petna, ang tagami aduk suma mbà ndazina sama ang manama, 25kayam mi vrak balum sun nda Judas mi arat tei mi i ata yi mamid’a. 26Azi le togina kaziya; togina mi nde yam Matiyas. Kayam ndata, a ndumum ki suma a sunuzi suma dogo yam tuna hi Jesus-na.

Currently Selected:

Sunda hi suma a sunuzinid’a 1: BA

Highlight

Copy