Jean 20

TCHOLA HI JESUS-D’A KI TAK TA MAM MBA WOID’A

(20.1-31)

Jesus mi nde woyo, zula ar hawa

(Gol Mat 28.1-8; Mar 16.1-8; Luc 24.1-12)

1Bur ma dimasa ki yorogo tcholola, kid’a yina kukurumuk tua d’a, Marie d’a Makdala-d’a, ti i yam asud’a, ti wahinad’a a ligad’at tei avun zula. 2Kayam ndata, ti ring ti fe Simon Pierre ki ma hat ma ding ma Jesus mi le kam heîna, ti dazi ala: A pat wa Salad’a kur zula, ami wami nga yima a gum kuana d’i. 3Pierre ki ma hat máma, a buzuk á i yam asud’a. 4Azi ring zla tazi djak, wani ma hat máma mi kal Pierre, mi mbaza adjeu yam asud’a. 5Mi hud’o kä, mi gol hur zula, mi we baktana nga tchuka kä, wani mi kal kua d’i. 6Simon Pierre mi mba blogomu, mi kal kur zula kä, mi we baktana nga tchuka kä, 7mi we baru d’a a d’ud’umzi kamba nga zlapa ki baktana d’i, wani nga d’uta tchuka woi ata yima dingâ vad’u. 8Ata yi máma, ma hat ma mbaza yam asud’a adjeuna, mi kal kua mi, mi we, mi he gagazid’a. 9Azi we nga zlad’a kur mbaktumba hAlonid’a biya d’i, tala mbeî Jesus mba mi tchol akulo aduk suma matna d’a. 10Ata yi máma, suma hat ndazina a hulong avo.

Jesus mi nde tam mbei ir Marie d’a Makdala-d’a

(Gol Mat 28.9-10; Mar 16.9-11)

11Wani Marie d’a Makdala-d’a ti ar nga tchola avun zula, nga d’i tchiya. Kid’a nga d’i tchid’a, ti hud’o kä, ti gol hur zula, 12ti we malaikana mbà ki baru d’a hapa tchuka ataziya. A nga kak kä ata yima a ge Jesus mad’am kuana, tu abo ma kama, tu abo ma asema. 13Azi dat ala: Atchad’a, ndak tchi nana ge?

Ti dazi ala: An tchi ni kayamba azi pat Salanid’a, an we nga yima azi gum kuana d’i.

14Kid’a ti de zla ndata dad’a, ti pret tad’u, ti we Jesus nga tchola, wani ti wum nga d’ala ni Jesus d’a d’i. 15Jesus mi dat ala: Atchad’a, ndak tchi nana ge? Ndak halî nge ge?

Ti djib’er ala ni sama ngom asinena. Ti dum ala: Banana, ang le hlumî angû ni, ang tagan yima ang gum kuana, an i hlumu.

16Jesus mi dat ala: Marie! Ti pret tad’u, ti dum ki vun Hebre-na ala: Raboni, nala, Ma hat suma.

17Jesus mi dat ala: Ndak don ndi, kayam an djak nga gen Abun biya d’i, wani ndak i gen b’oziyona, ndak dazi ala an nga ni djak gen Abun mala nAbugiya na, gen Alo man mala nAlo magina na mi.

18Marie d’a Makdala-d’a ti i de mi suma hata ala: An we Salad’a. Ti dazi ahle suma Jesus mi dattchina mi.

Jesus mi nde tam mbei ir mam suma hata

(Gol Mat 28.16-20; Mar 16.14-18; Luc 24.36-49)

19Kid’a afata nik dad’a, ni bur ma dimas máma, suma hata a duk vun azì ma azi nga kuana, abo mandarâ hi Juif-fîna. Ata yi máma, Jesus mi mba, mi tchol adigaziya, mi dazi ala: An gagi depa. 20Kid’a mi de hina dad’a, mi tagazi abom ki fefed’emu. Kayam ndata, suma hata a le furîd’a kayamba azi we Salad’id’a.

21Jesus mi dazi kua ala: An gagi depa. D’igi Abun mi sununï na, an sunugi na mi. 22Kid’a mi de hina d’a, mi fo muzugam kaziya, mi dazi ala: Agi vagi Muzuk ma bei tchod’a ba na kurugiya. 23Suma agi vad’agi hurugi kazina, Alona mba mi vat hurum mbei yam tcho mazid’a. Suma agi vad’agi nga hurugi woi kazi d’uo na, Alona mba mi vat hurum mbei kazi d’uo mi.

Jesus azi ki Toma

24Wani Toma ma a yum ala Ngoneîna na, ni ma aduk suma hat suma dogo yam mbàna, mi nga ki sed’ezi ata yima Jesus mba gevezina d’i. 25Kayam ndata, suma hat suma hiuna a dum ala: Ami wami Salad’a.

Wani mi dazi ala: Le an gol mbil ponde ma aboma d’uo, ni nik tchitchid’an balum pondena d’uo, ni kal abon fefed’em mbuo mi ni, an nga ni he gagazid’a d’i.

26Dimas sa mbàd’a, suma hata hi Jesus-na a nga klavi kua, vun azina nga duka mi. Toma mi nga ki sed’eziya. Ata yi máma, Jesus mi mba, mi tchol adigaziya, mi dazi ala: An gagi depa. 27Bugola, mi de mi Toma ala: Ang mad’ï tchitchid’angû, golon abonu. Ang mad’ï abongû, kalam ata fefed’enu. Ang kak bei he gagazid’a d’i, wani ang he gagazid’a.

28Toma mi hulong dum ala: Angî Salana, Alo mana.

29Jesus mi dum ala: Ni kayamba ang wanda ba, ang he gagazid’a ni na zu? Suma a wan nduo a he gagazid’a kana, a le furîd’a.

A b’ir mbaktum ndata ni kayam me?

30Jesus mi lahle suma atchap suma dingâ kua ngola ir mam suma hata ni suma an b’irizi nga kur mbaktum ndata d’uo na. 31A b’ir ahle ndazina ni kayambala agi hagi gagazid’a ala Jesus ni Mesi Alona Goroma d’a, ni yam he gagazid’a ba, agi mba fagi arid’a ki simiyêmu.

Currently Selected:

Jean 20: BA

Highlight

Copy