Sunda hi suma a sunuzinid’a 11

Pierre mi väd’u ahle suma lena avok tok ka Jerusalem-mba

1Suma a sunuzina ki b’oziyod’a suma a nga kur Jude-na, a hum ala andjaf suma dingâ a ve wa zlad’a hAlonid’a mi. 2Kid’a Pierre mi i Jerusalem-mba, Juif suma a he gagazid’ina a yalam ala: 3Ni kayam me ba, ang kal avo hi suma bei ngat bayâd’a, ang te ki sed’ezi mi ge?

4Wani Pierre mi nde vazi ad’u ahle suma lena ala: 5An nga kur azì ma ngol ma Joppe-na, nga ni tchen Alona. Ata yi máma, vana nde tam mbei iran d’igi baru d’a ngola na, djinda ata kengêm ma fid’ina pet, a sirimï akulo dei gak mba avoron kä. 6Kid’a an so iran gola atamba, an wahle suma lara ge suma asezi fifid’ina kazureina kahle suma dram kä na kaluweina mi. 7An hum dela ti dan ala: Pierre, ang tchol akulo, ang ngat ang mud’a. 8Wani an dum ala: Salad’a, nga na d’i, kayam an te nga vama tchona ki vama ndjendje ma hina na yan tu d’i. 9Dela ti tcholï akulo kua, ti dan ala: Vama Alona mi mbud’um mbei yed’etna, ang yum vama ndjendjed’a d’i. 10Va máma le hina hina yam hindi, ata yi máma na wat a hlum sä akulo.

11Atogo hina zak, suma hindi suma a sunuzï Sesare kana, a mba. A nga tchola avun azì ma ami nga kuana. 12Muzu’â hAlonina mi dan ala: Ang i ki sed’ezi bei gigrita. Ami ki b’oziyod’a suma karagaya suma a tinina, ami kalami avo hi Kornei. 13Mi dami ala mi we malaikana mi tchola avo hatamu, mi dum ala: Ang sun suma Joppe a yï Simon ma a yum ala Pierre-râ. 14Mam mba mi dang zla d’a ang mba fe ki sutid’a ki suma avo hatangâ pet mi. 15Kid’a an tin ad’ud’a á de zlad’id’a, Muzuk ma bei tchod’a ba na mi tchuk kä kazi d’igi mi tchuk kei adjeu na mi. 16Human gan yam zla d’a Salad’a mi dat ala: Jean mi le suma batemba ni ki mbina, wani an mba ni lagi batemba ni ki Muzuk ma bei tchod’a ba na d’a.

17Le Alona mi hazi he d’a hawad’a d’igi mi heizi mi ei kid’a ei hei gagazid’a yam Salad’a Jesus Christ-sa na ni, an ni nge ba, ni d’el Alona ge?

18Ata yima azi hum hina na, a seng silil, a gile Alona, a dala: Gagazi, Alona mi he wa lovota mandjaf suma dingâ á mbut huruzi á fe arid’a mi.

Suma tok suma Antiyos-sâ

19Suma a he gagazid’ina a b’rau woi yayak abo djop vun ma mba kazi kur bur ma a tchi Etienne-na. Suma dingâ adigazi a i kur Fenisi ki Sipre ki Antiyos, wani a nga tchi wal zlad’a hAlonid’a ni mi Juif-fâ hohol. 20Wani suma dingâ adigazi ni suma Sipre-na ki suma Siren-na. Sum ndazina a i Antiyos, a tchi wal Zla d’a Djivid’a hi Salad’a Jesus-d’a mandjaf suma dingâ mi. 21Ad’enga hi Salad’id’a ti nga ki sed’eziya, suma ablaud’a a he gagazid’a, a mbut huruzi yam Salad’a.

22Suma tok suma Jerusalem-ma a hum zla mazid’a, a sun Barnabas Antiyos. 23Kid’a mi mbaza kua mi we ni nana ba, Alona mi b’e vunam kazi ge d’a, mi le furîd’a. Mi gigid’ezi ala a ka’î suma d’engzengâ ki hur ma tuna yam Salad’a. 24Mam mi sama djivina. Muzuk ma bei tchod’a ba na ki he gagazid’a a nga oîd’a kurum mi. Suma ablaud’a a mbut suma hi Salad’ina.

25Ata yi máma, Barnabas mi i Tarsis á hal Saul. 26Kid’a mi fumba, mi mba ki sed’em Antiyos. A nga tok ki suma toka teteu gak bizad’a tu, a nga hat suma ablaud’a kur Antiyos. Ni kur bur máma ba, a tin ad’ud’a á yi suma hata ala Kretiyêna.

27Kur bur máma suma djok vun Alona a tcholï Jerusalem, a i Antiyos. 28Ma dingâ adigazi simiyêm ala Agabus mi tchol akulo. Muzu’â hAlonina mi zud’um mi dala: Baktara d’a ngola mba d’i nde yam andagad’a pet. Gagazi, baktara ndata ti nde kur atchogoid’a hi ma te yamba Klaut-ta mi. 29Suma hata a nga huruzi ala nge nge pî mi he vama ndak yam ad’eng mamba, a sun ahle suma ndjunda mi b’oziyod’a suma avo Jude-na mi. 30Azi le hina mi, a sun ahle ndazina mi suma nglona abo Barnabas azi ki Saul.

Currently Selected:

Sunda hi suma a sunuzinid’a 11: BA

Highlight

Copy