Sunda hi suma a sunuzinid’a 10
10
Pierre azi ki Kornei
1Sana nga kur Sesare, simiyêm ala Kornei, ni ma ngol ma azigarâ abom kis ma Romê-na, ni ma nga avok adesâ hi azigar suma Romê suma a yazi ala Itali-na. 2Ni sama djivina, nga mi le mandara Alona ki suma avo hatama pet. Mi nga mi ndjun suma hou suma Juif-fâ ngola, nga mi tchen Alona teteu mi. 3Ki fladege d’a afata tchuk siyata, mi we malaikana hAlonina mi nde tam mbei iramu. Mi kal gevemu, mi dum ala: Kornei.
4Kornei mi so iram gola atamu, mandara tchum su. Mi dum ala: Salana, a ni me ge?
Malaikana mi dum ala: Alona mi hum tchen manga ki ndjun nda ang nga ndjun suma hohoud’id’a, mi djib’er kangû. 5Ki tchetchemba, ang sun suma avo Joppe a yï Simon ma a yum ala Pierre-râ. 6Mi nga tchuka avo hi Simon ma yap bogoyona ma aziyam nga avun alum ma ngolîna. 7Kid’a malaika ma dum zlad’ina mi id’a, Kornei mi yi azungeî suma avo hatama mbà zlapa ki azigar ma nga mi le mandar Alona ma aduk suma a nga lum sunda teteuna. 8Kid’a mi vazi ad’u ahle ndazina peta, mi sunuzi Joppe.
9Tcha ndjivinda, kid’a azi nga kur lovota tua, a mbaza go huyok azì ma ngolîd’a, Pierre mi djak nga yam gonga akulo ki falei d’ad’ar á tchen Alona. 10Meid’a nga d’i tchumu, mi min á te tena, wani kid’a azi nga min tena tua d’a, vana nde tam mbei iramu. 11Mi gol akulod’a ti mal leyo, vana d’igi baru d’a ngola na, djinda ata kengêm ma fid’ina pet, a sirimï kä yam andagad’a. 12Ahle suma lara ge pet suma asezi fifid’ina kahle suma a dram kä yam andagad’ina kaluweina a nga kuru. 13Dela ti dum ala: Pierre, ang tchol akulo, ang ngat ang mud’a.
14Wani Pierre mi dum ala: Salad’a, nga na d’i, kayam an te nga vama tchona ki vama ndjendje ma hina na yan tu d’i.
15Dela ti dum kua ala: Vama Alona mi mbud’um mbei yed’etna, ang yum vama ndjendjed’a d’i. 16Va máma le hina yam hindi; ata yi máma na wat, a hlum sä akulo.
17Kid’a Pierre nga mi djib’er yam vama nde tam mbei irama tua d’a, suma Kornei mi tchuguzï sundina, a djop wa yam azina hi Simon-na, a nga tchola avun agre’â abua. 18A yiya, a djop ala: Simon ma a yum ala Pierre-râ mi tchuk nga ni ka hî ko zu?
19Kid’a Pierre nga mi djib’er yam vama nde tam mbei irama tua d’a, Muzu’â hAlonina mi dum ala: Pierre, suma hindi a nga halangû. 20Ang tchol akulo, ang tchugaseng kä, ang i ki sed’ezi bei gigrita, kayam ni an ba ni sunuzïya.
21Pierre mi tchuk asem kä gen sum ndazina, mi dazi ala: An ma agi halana ba wana. Agi mbagi ka hî ni hawa ko zu?
22Azi dum ala: Kornei ma azigarâ abom kis ma Romê-na mi sunumï ni mamu, ni sama d’ingêr ma nga mi le mandara Alonina, ni ma Juif-fâ pet a nga le glangâs ma djivina kama. Alona mi sun malaika mama, mi hum vuna á yangî avo hatam á hum zla d’a avunanga. 23Ata yi máma, Pierre mi kal ki sed’ezi avo, mi hazi yima burâ.
Tcha ndjivinda Pierre mi tchol mi i ki sed’eziya. B’oziyod’a suma hiu suma Joppe-na a i ki sed’em mi. 24Tcha ndjivinda azi mbaza Sesare. Kornei mi yi b’oziyoma ki buniyôma, a nga toka á djubuziya. 25Kid’a Pierre nga mi kal avod’a, Kornei mi d’ugulomu, mi grif kä avoromu, mi kud’uromu. 26Wani Pierre mi vum akulo, mi dum ala: Ang tchol akulo, an pî ni sana d’igi ang na. 27Kid’a Pierre nga mi de zlad’a tua d’a, mi kal avo, mi fe suma ablaud’a a nga toka. 28Mi dazi ala: Agi tagi wagiya, d’ela nga yam ma Juif-fâ á zlap kandjaf ma dingâ d’oze á kal avo hatamu. Wani Alona mi tagan ala ar an yi sana ma tchona d’oze ma ndjendjed’a d’i. 29Kayam ndata, kid’a agi tchugugi suma sunda kanda, an mba bei gigrita. An nga ni djobogiya, ni kayam me ba, agi yanï ge?
30Kornei mi dala: Ini ni bur ma hindina, ata yima an nga ni tchen Alona avo hatan kid’a afata tchuk siyata. Atogo hina zak, sana mi nga tchola avoron ki baru ma wile wiwilika atamu. 31Mi dan ala: Kornei, Alona mi hum tchen manga, mi djib’er yam ndjun nda ang nga ndjun suma hohoud’id’a mi. 32Kayam ndata, ang sun suma Joppe a yï Simon ma a yum ala Pierre-râ, mi nga tchuka avo hi Simon ma yap bogoyona avun alum ma ngolâ. 33Ata yi máma na wat, an sundja kang wana, ang le djivid’a ang mba wa. Ki tchetchemba, ami pet nga ka hî avok Alona á hum ahlena pet suma Salad’a mi hang vuna kazi á ded’ina.
Pierre mi tchi wala avo hi Kornei
34Pierre mi mal vunam mi dala: An we gagazi Alona nga mi pat sana ni yam iram go d’i. 35Wani aduk andjaf ma lara ge petna sama lara ma nga mi lum mandaram ma nga mi le d’ingêrina, ni ma Alona tam mbi lum djivid’a kama. 36Agi wagi zla d’a Alona mi sunut mi Israel-lâ d’a. Mi sunuzi Zla d’a Djivi d’a b’leng nga halas sa tcholï ata Jesus Christ-sa. Mam mi ma Sala suma pet. 37Agi wagi zla d’a a tchat walat tei kur ambas sa Jude-d’a peta, tinï ad’ud’a ni kur ambas sa Galile-d’a, bugol batem mba Jean mi tchat walata. 38Agi wagiya, ni nana ba, Alona mi vo Muzuk mama kad’enga yam Jesus ma Nazarat-na ge? Mi i ata yina teteng á le djivid’a, á sut suma pet suma a nga ad’u ad’enga hi Diable-d’ina, kayam Alona mi nga ki sed’emu. 39Ami ni suma glangâsâ yam ahlena pet suma mi lazi kur ambasa hi Juif-fîd’a, kur Jerusalem mi. Azi tchum ata agu ma b’ala. 40Wani Alona mi tcholom akulo aduk suma matna kur bur ma hindina. Mi tagam mbei ir suma, 41wani nga ni ir suma pet ti, wani ni mi ami suma Alona mi manami avok dei á le glangâsâ kama. Bugol la Alona mi tcholom akulo aduk suma matnid’a, ami tami ki sed’emu, ami tchami ki sed’em mi. 42Mi hami vuna ala ami tchami wala mi suma, ami dami woi kam ala mam mi ma Alona manam á ka sariyad’a yam suma arina ki suma matnina. 43Suma djok vun Alona pet a le glangâsâ kam ala nge nge pî ma he gagazid’a kama, Alona mba mi vat hurum mbei yam tcho mamba ki simiyêmu.
Alona mi handjaf suma dingâ Muzuk ma bei tchod’a ba na
44Kid’a Pierre nga mi de zla ndata tua d’a, Muzuk ma bei tchod’a ba na mi tchuk kä yam suma a hum zla mambina pet. 45Juif suma a he gagazid’a suma a mba ki Pierre-râ a le atchap, kayam Alona mi vo Muzuk ma bei tchod’a ba na yam andjaf suma dingâ mi. 46Kayam a humuzi a nga de zlad’a ki vuna hi sumina teteng, a nga gile Alona.
47Ata yi máma, Pierre mi dala: Suma Alona mi hazi Muzuk ma bei tchod’a d’igi ei na na, sama d’elezi bei lazi batemba ki mbina nga zu? 48Mi hazi vuna á lazi batemba ki simiyê Jesus Christ. Bugola, suma hi Kornei-na a tchenem ala mi kak ki sed’ezi burâ tcha tua.
Currently Selected:
Sunda hi suma a sunuzinid’a 10: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
