Sunda hi suma a sunuzinid’a 9
9
Saul mi mbut hurumu
(Gol Sun SS 22.6-16; 26.12-18)
1Wani Saul nga mi gurut ki ngopa ndandaleî á tchi suma hata hi Salad’ina. Mi i gen ma ngol ma ngat buzuna, 2mi djobom ala mi hum mbaktumba yam gongîyo suma toka hi Juif suma Damas-sâ, kayam le mi fe suma ding suma a nga tit kur lovota hi Salad’id’a, le ni andjofâ d’oze aropma ni, mi yozï mi mbazi Jerusalem ki djinda.
3Kid’a mi nga kur tita tua d’a, mi mba go ki Damas. Atogo hina zak, b’od’a ti tcholï akulo, ti wile nguyumu. 4Mi puk kä, mi hum dela ti dum ala: Saul, Saul, ni kayam me ba, ang djobon vunan hina ge?
5Mi djobom ala: Salana, angî nge ge?
Mam hulong dum ala: Ni an Jesus ma ang nga djobon vunana. 6Wani ang tchol akulo, ang i kur azì ma ngolâ. A mba dang vama ang mba luma. 7Suma a nga tit ki sed’ema a nga tchola mudjuk, a hum dela, wani a we nga sa d’i. 8Saul mi tchol akulo, mi mal iram mbeyo, wani iram nga we d’i. A gum dungûruna abomu, a im Damas. 9Mi le burâ hindi bei wed’a, bei te va, bei tche mbina mi.
10Ma hata hi Salad’ina mi nga Damas, simiyêm ala Ananiyas. Salad’a mi nde tam mbei iram mi dum ala: Ananiyas.
Mi hulong dum ala: Salad’a, an wana.
11Salad’a mi dum ala: Ang tchol atogo, ang i kur palum mba a yat ala D’ingêra d’a. Ang i hal sama a yum ala Saul-lâ, ni sama Tarsis-sâ. Mi nga avo hi Judas, nga mi tchen Alona kua. 12Mi we sana nde tam mbei iram simiyêm ala Ananiyas, mi tin abom kam ala iram mal leyo.
13Wani Ananiyas mi hulong dum ala: Salad’a, an hum zla sa máma avun suma ngola ala nga mi le murud’umba ablaud’a ki sum mang suma Jerusalem-ma. 14Mi mba nga ka hî ni ki vun ma hed’a hi nglo suma ngat buzunina á djin suma pet suma a nga yang simiyêngâ.
15Wani Salad’a mi dum ala: Ang iya, kayam sa máma ni sama an manam á tagan simiyên ndei avok andjaf suma dingâ kamulei mazina ki Israel-lâ mi na. 16Kayam an tanda mba ni tagam ndak ka pet ta mam mba mi fat kanda.
17Ata yi máma, Ananiyas mi iya. Mi kal avo, mi tin abom kamu, mi dum ala: Wiyena Saul, Salad’a Jesus ma nde tam mbei irang kur lovot ta ang mba ki d’ina, mi sununï ni mamu, kayam irang mal leyo, ang oî ki Muzuk ma bei tchod’a ba na mi. 18Ata yi máma na wat, ahlena nde buzuk kei iram d’igi b’lo’â na, iram mal leyo. Mi tchol akulo, a lum batemba. 19Mi te tena, mi fad’enga mi.
Saul mi tchi wala avo Damas
Saul mi le burâ tcha ki suma hata hi Salad’a suma avo Damas-sâ. 20Ata yi máma na wat, mi nde tchi wala kur gongîyo suma toka hi Juif-fîna, nga mi dala: Jesus nAlona Goroma.
21Suma pet suma a humuma a le atchap, a dala: Wana ni sama djop vun suma Jerusalem suma a nga yi simiyê Jesus-na d’uo zu? Mi mba ka hî á yo suma á izi mi nglo suma ngat buzuna mi d’uo zu?
22Wani Saul nga mi tchi wala burâ ki burâ kad’enga kal Juif suma a nga kaka avo Damas-sâ, mi nga mi tagazi woi ala Jesus ni Mesi.
23Bugol la burâ kal ngola dad’a, Juif-fâ a ndjak vunazi ala a tchi Saul leyo. 24A nga ndjol vun gulumuna kandjege ki faleya ala a tchumu, wani Saul mi we lem mazid’a tcha. 25Wani mam suma hata a gum kur gagalagad’a kandjeged’a, a sirim kä yam gulumuna.
Saul mi nga avo Jerusalem
26Kid’a Saul mi mbaza Jerusalem-mba, mi kuk tam á tok ki suma hata, wani azi pet a nga lum mandaramu. A he nga gagazid’a kam ala mam mi ma hat ma gagazina d’i.
27Barnabas mi vum im mi suma a sunuzina. Mi vazi ad’u ahlena ala ni nana ba, Saul mi we Salad’a kur lovota kahle suma mi dumzina ki wal la mi tchat ki simiyê Jesus kur Damas bei mandarâ ba d’a.
28Saul mi nga zlapa ki sed’ezi avo Jerusalem, nga mi ndabua, nga mi hulongîya, nga mi tchi wala ki simiyê Salad’a bei mandarâ ba. 29Nga mi de zlad’a, nga mi tchi tuguyod’a ki Juif suma a nga de vun Gre’îna, wani azi hal á tchum mbeyo. 30Kid’a b’oziyod’a a we hina d’a, a i Saul Sesare, a sunum Tarsis.
31Kayam ndata, suma toka hi Christ suma yam ambas sa Jude-d’a ki d’a Galile-d’a ki d’a Samari-d’a petna, tazi d’i tchuk simetna, a fad’enga, a nga i avogovok á le mandara Salad’a, Muzuk ma bei tchod’a ba na nga mi ndjunuzi mi.
Ene mi tchol akulod’a
32Kid’a Pierre nga mi tit ata yina peta, mi i á gol suma hAlona suma avo Lida-na mi. 33Mi fe sana, simiyêm ala Ene, nga burâ kä kur zlatna bizad’a klavandi, kayam mi kuzî gugutud’a. 34Pierre mi dum ala: Ene, Jesus Christ mi sud’ung wa da’, ang tchol akulo, ang d’ut zlat mangâ. Ata yi máma na wat, mi tchol akulo. 35Suma pet suma a nga kaka kur Lida ki yima papan ma Saron-na a wumu, a he gagazid’a yam Salad’a mi.
Dorkas ti tchol akulo karid’a
36Atcha d’a he gagazid’a tu nga kur Joppe, simiyêt ala Tabita, nala, Dorkas d’oze Duka, nga d’i le sun nda djivid’a burâ ki burâ, nga d’i ndjun suma hohoud’a mi. 37Kur bur máma ti ve tugud’eid’a, ti mid’a. Bugol la azi mbuzut teid’a, a hlat a i gat kur gong nga yam ndrata akulod’a. 38Lida ni go ki Joppe. Suma hata a hum ala Pierre nga kua, a sun suma mbà kam ala: Ar ang le lilinga á mba gevemi d’i.
39Pierre mi tchol atogo zak, mi i ki sed’eziya. Kid’a mi mbad’a, a i ki sed’em kur gong nga yam ndrata akulod’a. Arop suma modonod’a pet a hut gevem a nga tchiya, a nga tagam baru d’a gureid’a ki d’a nglod’a suma Dorkas ti lazi kid’a ndat nga ki sed’ezi tua d’ina.
40Pierre mi buzuk suma pet woi abua, mi grif kä, mi tchen Alona. Mi mbut iram yam mad’ad’u, mi yat ala: Tabita, ndak tchol akulo. Ti mal irat teyo, ti gol Pierre, ti tchol kak akulo. 41Pierre mi vat abod’u, mi tcholot akulo. Mi yi suma a he gagazid’ina karop suma modonod’a, mi hazizi ki arid’a.
42Zla ndata b’rau woi kur ambas sa Joppe-d’a pet. Suma ablaud’a a he gagazid’a yam Salad’a. 43Pierre mi kak burâ ngola kur Joppe avo hi sana tu, simiyêm ala Simon, ni ma yap bogoyona.
Currently Selected:
Sunda hi suma a sunuzinid’a 9: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
