2 Korente-na 12
12
Vama Alona mi ndum mbei ir Paul-lâ
1Djivid’a an subur tan mi, wani subur tad’a djivi mata nga d’i. Wani ki tchetchemba, an nga ni de ni yam vama Salad’a mi nde tam iran mi tagandji woina. 2An we sana hi Christ-sâ tu ma a hlum sä kur akulo d’a hindid’ina, ini ni bizad’a dogo yam fid’i. Le mi ni kur hliu tad’a, an we d’i; le ni bei hliu tad’a ni, an we d’i, wani nAlona ba, mi we. 3Gagazi, an we sa máma a hlum sä akulo kur Paradis. Kua d’ei, an we d’uo le a hlum sä akulo gagazi, d’oze le ni vama nde tam mbei irama; wani nAlona ba, mi we. 4Ata yi máma, mi hum zla d’a de d’a sana ndak á dat tuo d’a, kayam mi ar nga lovota mi sana á de zlad’a d’i. 5Ni kayam sa máma ba, an mba ni subur tanu. Wani an mba ni subur tan yam tan ndi. Wani an mba ni subur tan ni yam amangeî manda. 6Le an min subur tanu ni, an mba ni mbut ma lilid’a d’i, kayam an de ni zla d’a gagazid’a. Wani an ar bei subur tanu, kayam ar sa mi djib’er kan kal vama mi wum atana, d’oze vama mi humum avunana d’uo mi.
7Kayam an fe lovota á subur tan yam ahle suma kal tegles suma Alona mi simad’andjina d’i, ni kayam ndata ba, mi tinin tugud’ei d’a ndaka atanu, ni ma sunda hi Seitan-na ba, mi ton kiya, kayam an subur tan ndi. 8An tchen Salad’a yan hindi kayam mi pat tugud’ei ndata woi atanu. 9Wani mi hulong dan ala: Suma manda ti ndagangû, kayam ata yima ad’engêng nga d’uo na, ad’eng manda ti ndak memet. Kayam ndata, an nga ki furî d’a ngola á subur tan yam amangeî manda, kayam ad’enga hi Christ-sa ti kak kanu. 10Kayam ndata, an nga ki furîd’a ata yima ad’engên nga d’uo na, ata yima suma a nga kragan ngulina, d’oze kur kid’aka d’oze kur djop vuna d’oze kur a’alîd’a yam Christ. Wani ata yima ad’engên nga d’uo na, an nga kad’enga.
Paul nga mi djib’era yam suma Korente-na
11An nga ni de zlad’a ni d’igi sama lilid’a na, wani agi lan kad’enga ni agiya. Djivid’a ni agi ba, yoronu, kayam an ni va d’i. Wani suma agi nga golozi ala ni suma a sunuzi suma nglona na a kalan nga ki va tu d’i. 12Gagazi, ahle suma ndandal suma an lazina ki ve ta d’a adigagid’a ná tagagi woi ala an ni ma a sunun ma gagazina hi Salad’ina. An lahle suma simata kahle suma atchapma kahle suma ndandalâ mi. 13Vama an lum ki Tok ka dinga kal agi ni me ge? Kayambala an tinigi nga aneka kagi d’uo d’a zu? Ar agi vad’agi hurugi woi yam tcho man ndata!
14Ki tchetchemba, an min tan yan á hindid’a á iza hatagiya. An min á tinigi aneka kagi d’i, kayam an halî beged’a abogi d’i, wani an halî agiya. Kayam gugureina a nga tok va yam simiyêzi d’i, wani ni simiyêzi ba, a nga tok ahlena kaziya. 15An nga ki furîd’a á b’lak ahle mana woi pet, á he tan ndei kagi á ndjunugi mi. Le an nga ni le kagi ngola kal hina ni, agi mba lagi kan akid’eid’a kal zu?
16Wani an tinigi nga aneka kagi d’i. Wani agi nga dagi ala an lagi ni lemba á yogi ahligiyegi ki mbut ira. 17Na ni aduk suma an sunuzi sä hatagina, a yo ahle magina zu? 18An tchen Tit á iza hatagiya, an sun wiyei ma agi wuma ki sed’em mi. Na ni Tit mi hle va magi zu? Na ni an ki mam djib’er mamid’a ni tu d’uo zu? Tit mamid’a ni tu mi d’uo zu?
19Gak ini agi nga djib’eregi ala ami halami ná pad’ami zlad’a woi kami avorogiya zu? Nga na d’i! Ami dami yam minda hi Christ-sa avok Alona. Buniyômi suma od’a, ami lami hina pet á wulugi akulo kur he gagazid’a. 20An nga ni le mandarâ, fata an mbaza hatagid’a, dam an mba ni fagi d’igi an min na d’uo kla. Agi mba fan d’igi agi minigi na d’uo kla mi. An nga ni le mandarâ, dam yalâ ki yungôra kayîna, ngengâ, ngula, zla d’a de d’a tchod’a, tum didi’â ki batranga a nga adigagi kla. 21An nga ni le mandarâ ala fata an hulongza adigagid’a, Alo mana mba mi hulongôn yan kä kua avorogiya, an mba ni tchi yam ablau suma a le tchod’a adjeu a ar nga tcho mazid’a ki ndjendjed’a ki mizeuna ki gaulangâ woi d’uo na mi.
Currently Selected:
2 Korente-na 12: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.