2 Korente-na 11
11
Paul azi ki suma a sunuzi suma ka zlad’a
1An min ala agi vagi zla man nda lili d’a nde wanda. Â, ar agi vagi tagi kanu! 2An nga ni le yungôra kagiya; ni yungôr ma tcholï ata Alonina, kayam agi ni d’igi gor wei d’a yed’et ta an kat mi mandjufîd’a na, nala Christ. 3Wani an nga ni le mandarâ kagiya. Ar djib’er magid’a ti b’lak ki, ar agi walagi djin magi d’a d’engzeng nga yed’et ta ki Christ-sa woi d’igi guguina mi lop Ef ki lem mamba na d’i. 4Le sana mi mba hatagi mi tchagi wala Jesus ma ding ma ami tchagizi nga walam mbuo na, d’oze le agi vagi muzuk ma ding ma agi vum nga adjeu d’uo na, d’oze le agi hagi gagazid’a yam zla d’a djivi d’a ding nga ami tchagizi nga walat tuo d’a ni, agi nga vagizi atogo zak.
5An wala suma agi nga golozi ala ni suma a sunuzi suma nglona na a kalan nga ki va tu d’i. 6Wani le an de zla d’a aneka pî, wed’a ti kid’agan nga d’i. Kayam ndata, kid’a ami nga adigagid’a, ami tagagi ad’u ahlena pet ata lovot ta lara ge pet mi.
7Kid’a an tchagi wal Zla d’a Djivid’a hAlonid’a, an tchat ni hawa bei wuraka. Ata yi máma an mbut tan va d’uo á mbud’ugi va. Hina ni an le ni tchod’a zu? 8An tar ahlena abo Tok ka dinga, ni fe beged’a abozi á bongôn lovota á ndjunugiya. Kid’a an sä hatagid’a, ahle suma kid’agana an tin nga aneka yam sa adigagi d’i, 9kayam b’oziyoi suma a tcholï Maseduwan-na a ndjunun kur kid’ak manda. Kayam ndata, an d’el tan yam ahlena pet, kayam ni tin aneka kagi d’i, an mba ni le hina teteu mi. 10Zla d’a gagazid’a hi Christ-sa nga kurunu. Kayam ndata, sama ndak á d’elen á subur tan yam zla ndata kur ambas sa Akai-d’ina nga d’i. 11Ni kayam me ge? Ni kayamba an nga ni le kagi d’uo d’a zu? Alona mi wala an nga ni le kagiya.
12Wani ahle suma an lazina, an nga ni lazi avogovogo, kayam ni d’el suma a nga nga tazi ki ami kur ahle suma azi nga subur tazi kazina. 13Kayam azi ni suma a sunuzi suma ka zlad’a, ni suma lop suma, azi mbut tazi d’igi azi ni suma a sunuzi suma hi Christ-sâ na. 14Nga ni vama atchap pi, kayam Seitan tamba nga mi mbut tam d’igi malaika ma b’od’a na. 15Kayam ndata, le azungeî mama a mbut tazi d’igi azungeî suma d’ingêrâ hina pî, nga ni vama ngol li. Dabi mazid’a mba d’i nda’î yam sun mazi d’a azi lata.
Paul ma a sunuma mi fe ndaka teteng
16An nga ni dagi kua, ar sana mi golon d’igi sama lilid’a na d’i. Wani le agi golon d’igi sama lilid’a hina pî, agi van zla man nda lilid’a, kayam an subur tan nde. 17Zla d’a an nga ni dat ki tchetchembid’a ni vun ma hed’a hi Salad’ina d’i, wani an nga ni subur tan d’igi sama lilid’a na. 18Kayam suma ablaud’a a nga subur tazi yam ahle suma kur duniyad’ina, an mba ni subur tan d’igi azi na mi. 19Kayam agi suma ned’a agi vagi zlad’a hi suma lilid’id’a ki furîd’a. 20Le sana mi lagi magomba, d’oze le mi yogi ahle magina, d’oze le mi b’ad’agi ahle magina kad’enga, d’oze le mi subur tam kagiya, d’oze le mi tumugi iragi pî, agi nga vagi tagiya. 21An nga ni dagiya: An nga ki zulona kayam ad’engêmi ndak á le hina d’i.
Wani le sama ding nga subur tam yam va ni, an nga ni de d’igi sama lilid’a na, an ndak á subur tan mi. 22Azi ni Hebre-na zu? An ni ma Hebre-na mi. Azi ni Israel-lâ zu? An ni ma Israel-lâ mi. Azi nandjafâ hi Abraham-ma zu? An nandjafâ hi Abraham-ma mi. 23Azi nazungeîna hi Christ-sâ zu? An nga ni de d’igi sama vit teina na. An kalaziya, an le sunda kalazi mi. A gan dangeina yazi ablaud’a kala, a ton ngola kala, an ar gogo á matna yan ablaud’a kal mi. 24Juif-fâ a ton ki blafâ dok hindi yam zlengâ yazi vahl. 25Romê-na a ton ki tutuguyona yazi hindi. Suma a durun kahinad’a yazi tu, batod’a hlup kä ki sed’en yat hindi, an le burâ tu ki dola hur alum ma ngolâ. 26Kur tit manda yan ablaud’a an ar go á bad’a aduk mbina, suma tchigeta a lan á tchid’a, andjavan Juif-fâ a lan á tchid’a, andjaf suma dingâ a lan á tchid’a. Suma a lan á tchid’a hur azina, a lan á tchid’a hur fulâ, a lan á tchid’a hur alum ma ngolâ. B’oziyoi suma ka zlad’a a lan á tchid’a mi. 27An le sunda ngola ki ndaka. An ba bei bur sena yan ablaud’a, meid’a tchanu, vunan so mi. Yan ablaud’a an fe nga vama te d’i. Ab’lenga lanu, an fe nga baru d’a tchuka atan ndi. 28Kal ahle ndazina pet, aneka hi Tokid’a pet nga kan burâ ki burâ. 29Le sana mi mbut amangeîd’a ni, an mbut amangeîd’a mi. Le sana mi puk kur tchod’a ni, an nga ki hur ma hata ngola.
30Le an subur tan mbeyû ni, ar an subur tan ni yam ahle suma a tak amangeî manda woina. 31Alona Abu Salad’a Jesus ma suma a nga suburum simiyêm gak didina, mi wala an nga ni ka zla d’i. 32Kid’a an sä Damas-sa, ma te yam ma ad’u amulâ Aretas-sâ, mi tin suma ndjola avun azina á vanu. 33Wani suma a sirin kä ir gulumuna ki gagalagad’a. Ni hina ba, an sut ki tan abomu.
Currently Selected:
2 Korente-na 11: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.