2 Korente-na 10
10
PAUL NGA MI TAK KEI ALA MAM MI MA A SUNUM MA GAGAZINA
(1.1—13.10)
Paul mi väd’u sun mamba
1Ki tchetchemba, an Paul nga ni tchenegi ki lulumad’a, ki hur ma djivina hi Christ-sâ. Suma dingâ a nga dala ata yima an nga adigagina, an ni sama lulumana, wani ata yima an nga adigagi d’uo na, an nga ni dagi zlad’a bei mandarâ. 2Wani an nga ni tchenegiya, fata an mbaza hatagid’a, an ar ngop pa an ngat kurun ala an mba ni ngop ki suma ding suma a nga dala ami nga tid’imi ni d’igi suma bei he gagazid’a na na woyo. 3Le ami nga tid’imi ni d’igi suma bei he gagazid’ina na pî, ami nga durumi ayîna d’igi sum ndazina na d’i. 4Ahle mami suma dur ayîna a nga nahlena hi suma bei he gagazid’ina d’i, wani nahle suma dur ayî suma ad’eng suma hAlonina á to gulumun ma ad’eng ma ngunguna hi ma djangûnina kä woyo. Ami pleyêmi tuguyo d’a hawa yaka hi sumid’a 5kahlena pet suma a nga le yam mba ad’enga á kak djangûna ki wed’a hAlonid’ina, ami nga mbud’umi djib’er ra lara ge pet kä á ge yat kä ad’u Christ. 6Ami minimi tami da’. Le agi gagi yagi kä kukud’ugu ni, ami mba kami sariyad’a yam suma bei hum vuna.
7Agi nga gologi ahle suma a nga abu pid’ak iragina. Le sama djib’er ala mam mi sana hi Christ-sâ ni, ar mi djib’er hina ala ami tami ni suma hi Christ-sâ d’igi mam na mi. 8Le an nga ni subur tan kal yam ad’eng nga Saleina mi hamizi á wulugi akulo á b’lagagi woi d’uo d’a pî, zulona nga mi lan ndi. 9An min ala agi golon d’igi sama mi mbud’ugi mandarâ ki mbaktum mambina na d’i. 10Kayam suma dingâ a nga dala: Mbaktum mamba taneka, tad’enga mi, wani le mam tamba nga adigeya ni, mam mi amangeîd’a, zla mam mba ded’a a golot is mi. 11Djivid’a sama nga mi de hina na mi wala, zla d’a ami dagizi kur mbaktum mamid’a kid’a ami nga adigagi d’uo d’a, ami mba lami ni d’igi ami nga adigagi na da’.
12Kayam ami min suburumi tami ki suma a nga hle yazi akulona d’i, ami nga ngami tami ki sed’ezi d’uo mi. Wani ata yima azi tazi nga nga tazi ki tazina, ne mazid’a kid’aga. 13Wani ami min suburumi tami kal yam nga d’a a ngamizid’a d’i, wani ami nga lami sunda ata yima Alona mi ngamizina. Mi malami lovota á le sunda gak sä hatagi mi. 14Kayam ndata, ata yima ami mbamiza hatagi á tchagi wal Zla d’a Djivid’a hi Christ-sa avo’â, ami kalami nga yam yima Alona mi ngamizi á le sundina d’i. 15Ami nga suburumi tami yam sunda hi suma dingâ d’a nga kur haga mamid’a d’uo d’a d’i. Wani ami min ala he gagazi magid’a ti wul akulo. Hina wani, sun mamid’a mba d’i i avogovok ngola adigagiya, wani ni yam nga d’a Alona mi ngamizid’a teteu. 16Hina wani, ami mba fami lovota á tchami wal Zla d’a Djivid’a kur ambas sa sä blogogid’a, kayam ami min suburumi tami yam sun nda suma dingâ a lat kur asine mazina adjeud’a d’i.
17Kayam d’igi mbaktumba hAlonid’a ti de na ala: Sama min subur tama, ar mi subur tamî yam sun nda Ma didina mi lata. 18Kayam sama nga subur tam vama, mi ndak nga d’i, wani sama Ma didina nga mi suburuma ni ma nda’â.
Currently Selected:
2 Korente-na 10: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.