1 Tasaloni’â 5
5
Agi minigi tagi á ngaf ki Saleina
1Wani b’oziyomina, yam zlad’a hatchogoid’a ki burâ hi mbad’a hi Salad’id’a, an dok ni b’irigi mbaktum kat tuo d’a. 2Kayam agi wagi tetet ala bur ma Salad’a mba mi mba kuana ni d’igi sama kula mi mba andjege na. 3Fata suma a dala: B’leng nga halasa ki djivid’a a nga d’a, ata yi máma na wat, bad’a mba d’i nde kazi d’igi vuta ti nde yam atcha d’a wirâ na, a mba prut tei d’uo mi. 4Wani b’oziyomina, agi nga kur nduvunda tala bur máma mi mba kagi dumuzi d’igi sama kula mi mba yam suma na d’a d’i. 5Kayam agi pet ni suma hi b’od’ina, suma hafatina mi. Ei ni suma handjeged’ina d’i, ei ni suma hi nduvundina d’uo mi. 6Kayam ndata, ar ei buri sena d’igi suma hiuna na d’i, wani ei kagei irei sik ki ndjola. 7Kayam suma a nga burâ senina, a nga burâ sena nandjege. Suma a nga gurut ki sümina, a nga gurut nandjege mi. 8Wani ei ni suma hafatina á kagei irei sik. Ar agi tchugugi he gagazi magid’a ki o magid’a atagi d’igi sana mi tchuk kongrongâ atam na, ar agi kulubugi hur ma tin mala ni sut magid’a na kagi d’igi sana mi kulup djumba kam na mi. 9Kayam Alona mi yï woi ná fe ndaka ad’u ayî mama d’i, wani ná fe suta yam Saleina Jesus Christ 10ma mit keina. Kayam ndata, le ei nga ki irei d’oze le ei boi pî, ei mba kagei karid’a zlapa ki mamu. 11Kayam ndata, ar agi gigid’egi tagiya, agi minigi tagi akulo d’igi agi nga lagi na.
Giget ta dananda ki dep pa ged’a
12Wani b’oziyomina, ami nga tchenegiya, ar agi gagi yagi kä avok suma a nga le sunda adigagi suma Salad’a mi tinizi avorogi á d’obogi á had’agi mi na. 13Ar agi hazi ngola, ar agi lagi od’a kazi yam sun mazi d’a azi nga lata, agi kagagi ki b’leng nga halasa aduk tagi mi.
14B’oziyomina, ami nga gigid’egiya, ar agi ngobogi suma azulomba, agi b’lengêgi hur suma mandarâ, agi ndjunugi suma amangeîna, agi vagi tagi yam suma pet mi. 15Agi gologi tagi djiviya, ar sa mi wurak tchod’a yam ndrat tchod’a d’i, wani agi minigi tagi teteu á le djivid’a aduk tagi ki suma pet mi.
16Agi kagagi ki furîd’a teteu. 17Agi tchenegi Alona bei ara ba. 18Agi lagi mersi mAlona yam ahlena pet. Wana ni minda hAlona d’a yam kak magid’a zlapa tu ki Jesus Christ.
19Ar agi vagi vun Muzu’â hAlonina kä d’i. 20Agi gologi zla d’a djok vuna hi suma djok vun Alonid’a is si. 21Agi kugugi ahlena pet, agi vagi ahle suma djivina. 22Agi walagi woi dei ki tcho d’a lara ge pet.
23Ar Alo ma b’leng nga halasa mi tinigi iragi vagi mi mam tamba memet. Mi ngomogi muzugagi ki tagi ki hliwigi pet bei zlad’a kagi ba fat ta mbad’a hi Saleina Jesus Christ-sa. 24Mam ma yagina ni ma d’engzengâ, mam mba mi le hina mi.
25B’oziyomina, agi tchenegi Alona kamiya.
26Agi gagi b’oziyoina depa ki furîd’a.
27An hagi vuna ki simiyê Saleina ala ar agi ndumugi mbaktum ndata avok b’oziyoina pet.
28Ar Saleina Jesus mi vagi sumad’a.
Currently Selected:
1 Tasaloni’â 5: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.