1 Tasaloni’â 4
4
Tit ta lAlona tam djivid’id’a
1B’oziyomina, vama arâ, ami nga tchenegiya, ami nga gigid’egi ki simiyê Salad’a Jesus d’igi ami had’agi avok na, ni nana ba, agi tid’igi tit ta lAlona tam djivid’a ge. Ki tchetchemba, agi nga lagi na mi, ar agi igi iragi avogovogo. 2Kayam agi wagi vun ma he ma ami hagizi ki simiyê Salad’a Jesus-na. 3Wana ni vama Alona mi minima: Ar agi kagagi ni suma mi tinigi iragi vagina ala ar agi walagi woi ki mizeuna, 4ar nge nge pî adigagi mi we lovota á vamamba ata lovot ta d’ingêra ki hud’a mi, 5ar mi le d’od’ok ka tchod’a d’igi suma bei wAlona na d’i, 6ar sa mi tchila yam gata á le ir wiyem ma kur Christ-sâ kur ahle ndazina d’i. Ami dagi woi mbak, ami gagi humagi mi, suma a le tcho d’a hina d’ina, Salad’a mba mi kazi sariyad’a kaziya. 7Alona mi yï ná le mizeuna d’i, wani ná kagei ni suma yed’etna. 8Kayam ndata, sama noî hat ndata woina, mi noî ni sana d’i, wani mi noî nAlo ma mi hagi Muzuk mam ma bei tchod’a ba na kurugina.
9Wani kayam zla d’a o d’a yam b’oziyoi suma he gagazid’ina, agi nga djup sa mi lagi mbaktum kat tuo d’a, kayam Alona mi had’agi á le yam tagi da’. 10Gagazi, agi nga lagi yam b’oziyoi suma Maseduwan-na ki zlazi pet hina mi. Wani b’oziyomina, ami nga gigid’egiya, ar agi lagi hina avogovogo. 11Ar agi b’ad’agi tagi á kagagi tchugot, ar agi kagagi agi tinigi iragi yam ahle magina, ar agi lagi sunda kabogi á fahle magina d’igi ami hagi vuna avok na. 12Hina wani, agi mba fagi hud’a ir suma bei he gagazid’ina, agi mba halagi va ata sa d’uo mi.
Bur ma mbad’a hi Saleinina
13B’oziyomina, ami minimi ala agi kagagi kur vita yam suma matna d’i. Ar agi yorogi tagi kazi d’igi suma hiu suma bei hur ma tinda ba na na d’i. 14Le ei nga hei gagazid’a ala Jesus mi mid’a mi tchol akulo aduk suma matna miyu ni, hina mi, ei hei gagazid’a ala suma a he gagazid’a yam Jesus suma a bona, Alona mba mi hulongôzi arid’a zlapa ki Jesus mi.
15Kayam ndata, zla d’a ami nga dagizid’a ni zlad’a hi Salad’id’a. Ei suma nga ki irei tua na kur bur ma mbad’a hi Salad’ina, ei mba kalei avok suma matna d’i. 16Ei mba humi yid’a ki vun ma hed’a ki dela hi ma ngolâ hi malaikanina kadif fa bud’a hAlonid’a. Salad’a tamba mba mi tchugï asem kä kur akulod’a. Suma a he gagazid’a yam Jesus suma a bona a mba tchol akulo avok kikidji. 17Bugola, ei suma arei ki irei tua na, Alona mba mi zlabei yod’a ki sed’ezi tu sä akulo kur d’ugula á d’ugol Salad’a akulo kur simetna. Hina wani, ei mba kagei ki Salad’a gak didin. 18Kayam ndata, ar agi b’lengêgi hur tagi ki zla ndata.
Currently Selected:
1 Tasaloni’â 4: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.