1 Tasaloni’â 3
3
1Wani ata yima ami ndagami á ve tami d’uo na, ami djib’eremi ala djivid’a ami kagami Aten ni ami hol. 2Ni kayam ndata ba, ami sunugi sä wiyeina Timote ma sunda hAlona ma yam Zla d’a Djivid’a hi Christ-sina á siragiya, á gigid’egi kur he gagazi magid’a mi, 3kayam sa tu mi giget abo djop vun máma d’i. Kayam agi wagi ala ni vama Alona mi ngam keina. 4Kid’a ami nga ki sed’egid’a, ami dagi woi adjeu ala ei mba fei djop vuna. Agi wagi ala mi mba wa da mi. 5Wani ata yima an ndak á ve tan nduo na, an sunugi sä Timote atogo zak á wäd’u he gagazi magid’a. An le mandarâ ala dam ma lopma Seitan mi lobogi wa. Hina, sun mamid’a ami lat adigagid’a pet mba d’i mbut ni vama hawa na.
6Wani ki tchetchemba, Timote mi tcholï hatagi mi mba mi dami yam zla d’a djivid’a hi he gagazi magid’a ki o magid’a mi. Mi dami ala agi nga djib’eregi kami ki furîd’a teteu, agi min á wami d’igi ami tami minimi á wagi na mi. 7Kayam ndata, b’oziyomina, kur ndak mamid’a ki djop vun mamina pet, ami hurumi b’leng yam he gagazi magid’a. 8Ki tchetchemba, le agi nga kaka ngingring zlapa tu ki Salad’a ni, ami nga karid’a. 9Nandjaf mersi d’a me d’a ami ndak á lat mAlona kagi kayam furî d’a pet ta ami fat kagi avoromba ge. 10Ami nga tchenemi Alona kagi andjege ki falei ki so tad’a á wagi iragi á hagi ahle suma kid’agagi yam he gagazi magid’ina mi.
11Ar Alona Abui tamba ki Saleina Jesus a malami lovota avoromi á iza hatagiya. 12Ar Salad’a mi igi avogovok kur o d’a agi nga lat yam tagid’a zlapa ki suma pet, d’igi ami nga lami kagi na mi. 13Hina wani, mba mi siragi ngingring kur lovot ta d’ingêra bei zlad’a kagi ba avok Alona Abui kur bur ma Saleina Jesus mba mi mba zlapa ki malaika mama petna.
Currently Selected:
1 Tasaloni’â 3: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.