Proverbios 10
10
Tnu'u ndichi ni ka'an Salomón ma ja kuu ñayii sa'a ja va'a ma ji'in ñayii sa'a ja u'vi ma
1Tnu'u ndichi ni ka'an Salomón ma.
Suchi sa'a sukan ká'an tnu'u ndichi Su'si ma
chi sa'a i ja kúsii ini yuva i ma,
kovaa suchi so'o xeen kaa ma
chi sa'a i ja kúxii ini si'i i ma.
2Nú nanimaa ja u'vi ma sa'a ñayii ma
chi masu nawa chíndee ña'a i,
kovaa nú nanimaa ja va'a ja ndaa ma na ko sa'a ñayii ma
chi kaku i te ma skenaa i maa i.
3Vaa Su'si ma chi masu kua'a ya tnu'u ja ko kokon ko yichi
ñayii sa'a ja va'a ja ndaa ma,
kovaa ñayii ka sa'a nanimaa ja u'vi ma
chi kua'a Su'si ma tnu'u,
te jin ndando'o jin ndaneni maa i ja u'vi ka sa'a i ma.
4Ñayii kuxi te ñatuu ndí ini i ja satniñu i ma
chi ko kunda'vi ko kukee i,
kovaa ñayii ñu'u ini ma te satniñu i ma
chi ko ni'i ko tna'a i.
5Ñayii ñu'u kaji ini ma chi satniñu i itu i ma,
te na'a i na tiempu ndáxtutu i itu i ma,
kovaa suchi ká'an uun ká'an su'va‑ni ini ma
te ñatuu ndáxtutu i itu i ma
chi ja kan‑nuu wa'a i yuva i ma.
6Iyo ja vii ja va'a kuta'vi ñayii sa'a ja va'a ja ndaa ma,
kovaa ñayii sa'a ja u'vi ma
chi ndando'o ndatna'a xeen maa i ja u'vi sa'a i ma.
7Ñayii ni yo sa'a ja va'a ma
chi ka ndakune'e ña'a ñayii ma,
te ka ka'an vii ka ka'an va'a i ja sukan ni yo sa'a i ja va'a ma,
kovaa ñayii ni yo sa'a ja u'vi ma
chi masu na in ndakune'e‑ka ña'a
te ni naa maa cuentu i ma‑ni.
8Ñayii iyo tnu'u ndichi ini anua i ma
chi jan‑ta'vi i te kándija i tnu'u ni tatnuni Su'si ma,
kovaa ñayii ndee ini ma te ndimaa ndákone'e xiko i ma
chi skenaa i maa i.
9Ñayii jika ndaa jika ndija ma
chi masu nawa yu'u i ndenu kua'an ndenu vee i
vaa ja va'a sa'a i ma,
kovaa ñayii sa'a ja u'vi ma
chi ndí ini xeen i nasa yukan te ndatuu ja u'vi sa'a i ma.
10Ñayii kini xeen nde'ya i ja kúni u'vi i nuu in‑ka ñayii ma
chi sa'a i ja kúxii ini o,
te ñayii ndee xeen yu'u i ma
chi ja sukan kúu i ma chi xndo'o xneni ña'a Su'si ma.
11Kovaa ñayii sa'a ja va'a ja ndaa ma
chi sa'a i ja kúu sii ini xeen o te ndáni'i o tnu'u kanu ini,
kovaa ñayii sa'a ja u'vi ma
chi ndando'o ndatna'a xeen maa i ja u'vi sa'a i ma.
12Ñayii chú'un ini nawa ni sa'a ña'a in‑ka ñayii ma
te suu‑ni suu‑ni ndákune'e i ma
chi ñatuu kúu koo mani i,
kovaa ñayii kútoo tna'a ndija ma
chi kánda i nekanu ini i nawa ni sa'a ña'a maa in‑ka ñayii ma.
13Ñayii jini tnu'u ndichi ma
chi nanimaa tnu'u ndichi ma ká'an i,
kovaa ñayii ñatuu ndása'a kuenda
naxe ko sa'a ko kuu i ja va'a ma,
chi ja kuta'vi i ko kuu yutnu xii ma te ndo'o neni maa i.
14Ñayii ndichi ma chi ndása'a i kuenda
te káji kaji‑ni i tnu'u kuatniñu ma ká'an i,
kovaa ñayii ndee ini ma chi masu káji maa i tnu'u ká'an i.
15Ñayii ndichi ma chi ja ni jani va'a ini i ma te ní'i tna'a i
te iyo tu'va i te kúu yanduu i nuu tnundo'o kénda ma,
kovaa ñayii kúnda'vi kúkee ma
chi ja ñatuu ni jani va'a ini i kúu,
te kundee maa tnundo'o ma nuu i.
16Ñayii ndichi ma te sa'a i ja va'a ja ndaa ma
chi koteku i ni‑kani ni‑jika,
kovaa ñayii sa'a ja u'vi ma
chi jiso kuechi i nuu Su'si o ma.
17Ñayii sa'a sukan ká'an káchi tnu'u ndichi ma
chi kua'an i ichi nuu koteku i ma,
kovaa ñayii ñatuu niniso'o ja ká'an káchi tnu'u ndichi ma
chi kua'an i ichi nuu skenaa i maa i.
18Ñayii sa'a tnu'u ja kútoo ña'a i ma kovaa kíti ini i nuu o ma
chi ñii yu'u i ma‑ni yoxtnee tnu'u ká'an i ma.
Te ñayii skanduu yu'u ma chi ñayii so'o ñayii ndee ini kúu i.
19Ñayii ñatuu ndása'a kuenda te ndeva'a‑ni tnu'u ká'an i ma
chi iyo yika i ja ka'an i in tnu'u ja masu kuatniñu te kuiso kuechi i,
kovaa ñayii ndichi ma chi ndása'a i kuenda na tnu'u ká'an i ma.
20Ñayii sa'a ja va'a ja ndaa ma
chi sukan kúu plata ni nduu nanimaa ma,
sukan ka kuu tnu'u ká'an i ma,
kovaa ja ñu'u ini anua ñayii sa'a ja u'vi ma chi masu nde jiniñu'u.
21Ja ka ka'an ñayii ka sa'a ja va'a ja ndaa ma
chi skaka ichi i kua'a ñayii ichi va'a ma,
kovaa ñayii so'o ñayii ndee ini ma
chi ka skenaa i maa i
ja ñatuu ka jaku'ni ini i ja jin sa'a i ja va'a ma.
22Ja vii ja va'a skuta'vi ña'a Su'si Iya Tátnuni ma
chi sa'a i ja ko ni'i ko tna'a o,
te sa'a Su'si ma ja masu na tnu'u xii ini kenda nuu o.
23Ñayii so'o ñayii ndee ini ma
chi ja sa'a i ja u'vi ma chi kútachi xeen i ja sukan sa'a i ma,
kovaa ñayii ndichi ma
chi ndátatu‑ka i ja sukan jáku'ni ini i
te sa'a kúu i sukan ká'an tnu'u ndichi ma.
24Tna'a ja yu'u ñayii sa'a ja u'vi ma ja ndo'o i ma,
su'va chukan kenda yachi‑ka nuu i ma,
kovaa ñayii sa'a ja va'a ja ndaa ma
chi ja ñu'u ini i ja ni'i i ma chi kua'a Su'si ma.
25Ñayii sa'a ja u'vi ma
chi sukan‑ni yá'a tikachiyaa xeen ma sukan‑ni kúu i,
vaa nunuu‑ni iyo i te náa i,
kovaa ñayii sa'a ja va'a ja ndaa ma
chi ni‑kani ni‑jika koteku i.
26Ñayii kuxi ma chi sukan sa'a ja iya ma nuu nu'u ñayii ma
xi sukan sa'a ñu'ma ma nduchinuu ñayii ma,
sukan kúu i, vaa xtna'a i ñayii xi‑nuu satniñu i ma.
27Ñayii yu'u Su'si ma te ñatuu sa'a‑ka i ja u'vi ma
chi kani kani koteku i,
kovaa ñayii sa'a ja u'vi ma
chi ndate'nde sava sukan iyo ja koteku i ma.
28Ñayii ka sa'a ja va'a ja ndaa ma
chi jin ni'i sii ini i ja ka ndetu i ma,
kovaa ñayii ka sa'a ja u'vi ma
chi visi iyo ja ka ndetu i ja jin ni'i i ma,
kovaa masu jin ni'i i, vaa sani te jin naa.
29Ñayii ka jika ichi Su'si ma chi ko koto va'a ya i,
kovaa ñayii ka jini ja va'a ma te ñatuu ka sa'a i ma
chi jin skenaa i maa i.
30Ñayii sa'a ja va'a ja ndaa ma
chi konukuiñi va'a i nuu Su'si ma
te masu nawa kundee ja kotuu i,
kovaa ñayii ka sa'a ja u'vi ma
chi masu kuu jin konukuiñi va'a i nuu Su'si ma ñuu ñayivi a.
31Ndimaa tnu'u ndichi ká'an káchi ñayii sa'a ja va'a ja ndaa ma,
kovaa ja ká'an ñayii so'o ñayii ndee ini ma masu nde kuatniñu o.
32Vaa ja ká'an ñayii sa'a ja u'vi ma
chi nanimaa tnu'u kini tnu'u ndeva'a kúu, te masu játna ini o,
kovaa ja ká'an ñayii sa'a ja va'a ja ndaa ma chi játna ini o.
Currently Selected:
Proverbios 10: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
