Proverbios 9
9
Ñayii ñatuu jan‑ta'vi tnu'u ndichi Su'si ma chi ndimaa ja u'vi sa'a i
1Tnu'u ndichi Su'si ma chi kuenda tnu'u
ja ni sa'a i in ve'e te ni chituu i uja si'in,
2sani te ni ja'ni i kiti i ma te ni satu'va i ja jin kaa ñayii ma,
te ni satu'va i ndute nde'ya uva ma
te ni sonee i ndaka nuu mesa ma.
3Sani te ni tetniñu i ñayii ka jinukuechi nuu i ma
ni jan koo i onde nuu sukun‑ka ini ñuu ma,
te ni ka keja'a i ka kana i ñayii ka jiniñu'u tnu'u ndichi ma.
4Te sa'a ka jiña'a i:
“Ndeva'a‑ni nde ni ñatuu na tnu'u ndichi ka neva'a ni ma
te ñatuu ka ni'i ini ni naxe jin ko sa'a jin ko kuu ni ja va'a ma,
ne'e koo ni ya'a,
5te jin kaa ni xita tila ni satu'va sa ma
te jin ko'o ni ndute nde'ya uva ma ja ni satu'va sa ma.
6Jin xndoo ni ja ka kuneé ka ku‑uun ni a
te jin koteku ni te jin kondikin ni jin ko sa'a ni
sukan ká'an tnu'u ndichi ma”,
ka kuu i ka jiña'a i.
7Ñayii ndáka'an‑so'o nuu ñayii jakundee ña'a ma,
ja ni'i i kokuu ja ndonda ñayii yukan nuu i ma,
te ñayii ndáka'an na kuechi ñayii sa'a ja u'vi ma
chi ja ni'i i kokuu ja saxiko ña'a ñayii ma.
8Va'a‑ka ja máko ndaka'an ni na kuechi ñayii sa'a ja u'vi ma
te ko saxiko ña'a i, vaa masu nawa chindee ni i.
Va'a‑ka ndaka'an‑so'o ni nuu ñayii ndichi ma
te kuni ni ja kutoo ña'a i.
9Kaxtnu'u‑ka ni nuu ñayii ndichi ma, te kundichi‑ka i,
vaa ñatuu‑ka na ja u'vi sa'a i ma,
te jaku'ni‑ka ini i naxe ko sa'a ko kuu i,
10Vaa ja ko kuu o in ñayii ndichi ma
chi xinañu'u kuiti‑ka ja koyu'u o Su'si ma
te másu ko sa'a o ni‑in ja u'vi
te sukan te ko kuu o in ñayii ndichi.
Te nuna jin kutu'va o ja jin ko sa'a o
sukan ká'an Su'si o iya ñatuu na u'vi sa'a ya ma
chi jin ndani'i o janitnuni va'a te jin ni'i ini o nawa jin ko sa'a o.
11Vaa nuna kandija o te sa'a o sukan ká'an tnu'u ndichi Su'si ma
chi sa'a i ja koteku kani‑ka o ñuu ñayivi a.
12Chukan kúu ja nuna ko kuu ro ñayii ndichi ma
chi ja va'a maa ro ko kuu,
kovaa nuna ko kuu maa ro ñayii ndee ini
te jakundee ro ñayii ndáka'an‑so'o nuu ro ma
chi ja u'vi sa'a ro maa ro
te ndachunaa maa ro ja sukan sa'a sukan kúu ro ma.
13Ña'a kúneé kú‑uun ma chi ñatuu ndása'a ña kuenda
ja masu ja va'a kúu ja sa'a ña ma,
14te jínkoo ña ye'e ña ma,
vaa ndúku ña ja ndito ndito‑ka kuni ña na in ka ya'a ichi ma,
15te nú ni jini ña ñayii ka jika ndaa ichi Su'si ma
ja ñatuu‑ka na u'vi ka sa'a i ma,
te kána ña i,
16te sa'a jiña'a ña suchi ka kuneé ka ku‑uun ma
ja ñatuu ka ni'i ini i naxe jin sa'a i ja va'a ma:
“Ne'e koo, te jin kuni ro
17ja ndute sakui'na o ma
chi va'a‑ka ji'i de sana ndute maa o ma,
te jin kuni ro ja kaa yu'u o xtatila ma
chi jaa asi‑ka”,
kuu ña jiña'a ña.
18Kovaa ñatuu ka jini suchi ka kandija ja ká'an ña ma
ja ve'e ña ma kúu nuu jin kûu i te jin skenaa i maa i ma,
vaa ndaka suchi ka kivi koo ve'e ña ma
chi kuenda tnu'u ja onde nuu kunu‑ka andeya ma ka ñunee i.
Currently Selected:
Proverbios 9: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
