Proverbios 8
8
Tnu'u ndichi Su'si ma chi in ja va'a xeen kúu i te iyo i ni‑kani ni‑jika
1Káyu'u káyu'u tnu'u ndichi Su'si ma ká'an i,
sukan‑va'a jin jaku'ni ini ñayii ma.
2Onde sukun ma iyo i te ká'an i,
te onde nuu ka ndatna'a ichi nuu ka jika kua'a ñayii ma
kénda i te ká'an i,
sukan‑va'a jin kuniso'o ñayii ma.
3Onde nuu kívi o ñuu ma iyo i te ká'an i,
sukan‑va'a jin kuni ndaka ñayii ma.
4Sa'a ká'an tnu'u ndichi Su'si ma:
“Nuu ndaka ndijin ja ñatuu jin ndasa'a‑ka ni kuenda a, ká'an sa:
5Jin jaku'ni ini ndaka ndijin ja ka iyo neé ka iyo su'va‑ni ni a,
ndijin ja inundee xeen ini ni ja jin jaku'ni ini ni tnu'u ndichi a
te jin ni'i ini ni naxe jin ko sa'a jin ko kuu ni ma.
6Jin koniniso'o ni, vaa ká'an sa tnu'u va'a tnu'u ndaa,
vaa masu játna ini sa tnu'u masu kuatniñu ma.
7Vaa ja ká'an sa a chi ja ndaa kúu,
te masu xnda'vi ña'a sa,
vaa masu játna ini sa tnu'u ndeva'a tnu'u kini ma.
8Vaa ndaka tnu'u ká'an tnu'u káchi sa a
chi tnu'u va'a tnu'u ndaa kúu,
te masu ja ká'an sa ja sa'a u'vi ña'a sa kúu,
9vaa saña chi kaji kaji ká'an sa,
sukan‑va'a jaku'ni ini ñayii ndása'a kuenda ma,
te ñayii ndichi ma chi jáku'ni ini i
ja tnu'u vii tnu'u va'a kúu ja ká'an sa a.
10Jin kuan‑ta'vi ni ndaka ja ká'an káchi sa nuu ni a,
vaa ja va'a‑ka kúu sana plata ma,
te ja va'a‑ka kúu ja jaku'ni ini o ma
sana oro nanimaa ma.”
Sa'a ká'an tnu'u ndichi Su'si ma.
11Te ja va'a xeen‑ka kúu tnu'u ndichi a sana yuu vivii ma,
te ni‑in ja játna ini o iyo ñuu ñayivi a
ñatuu kétna'a i ji'in tnu'u ndichi Su'si a,
vaa ja va'a xeen kúu tnu'u ndichi a.
12Vaa tnu'u ndichi a chi iyo i ji'in ñayii ndása'a kuenda
naxe ko sa'a i ja va'a ja ndaa ma,
te tnu'u ndichi a chi sa'a i ja jaku'ni va'a ini ñayii ma
te ndasa'a i kuenda nde a kúu ja va'a ma.
13Vaa ñayii yu'u Su'si ma
vaa jini i ja iya ndákan kuenda kúu ya ma
chi saxiko i ja u'vi ma
ji'in ja kani ini o ja maa o kúu‑ka ma te kuvixi o ma,
te suni saxiko i ñayii ka jika ichi u'vi ma
te ka ka'an i nanimaa tnu'u ndeva'a tnu'u kini ma.
Sa'a ká'an tnu'u ndichi Su'si ma.
14“Maa sa kúu ja káxtnu'u nuu ñayii ma naxe sa'a naxe kuu i,
sukan‑va'a ku'un kaji ku'un va'a ini i.
Maa sa káxtnu'u nuu ñayii ma tnu'u ndichi a,
te koo tnu'u ndee tnu'u ndatnu i.
15Maa sa sa'a ja ka ni'i ini rey ma
naxe jin tatnuni de ñuu de ma,
te maa sa sa'a ja ka ni'i ini tee ka tatnuni ñuu ma
naxe jin ka'nde ndaa de tniñu ñayii ma.
16Te ja maa sa kúu ja ka ni'i ini ndaka ñayii ka netniñu ma
naxe jin tatnuni i ma
te ka ja'nde i tniñu ñayii ñuu ñayivi a.
17Ñayivi ni‑yu'u ni‑ini i ndánduku ña'a i ma,
ji'in suchi jaa ka ndanduku ña'a ma
chi jin ndani'i yachi‑ni ña'a i.
18Ñayii jan‑ta'vi tnu'u ndichi káxtnu'u sa a
chi ni'i i ja vii ja va'a ni‑kani ni‑jika,
te ko ni'i ko tna'a i nawa ko neva'a i,
te ko sa'a i ja va'a ja ndaa ma,
te koo jayiñu'u i.
19Ñayii jan‑ta'vi tnu'u ndichi káxtnu'u sa a
chi ja va'a‑ka kúu sana ja koneva'a i kua'a oro ma xi plata ma,
20te skaka sa i ichi va'a ichi ndaa ma,
te ndasa'a i kuenda na nde a kúu ja va'a ja ndaa ma.
21Te chukan kúu ja ñayii ka kandija tnu'u ndichi ká'an sa a
chi chindee sa i ja jin ko ni'i jin ko tna'a i ja jin koo ve'e i ma.
22’Saña ja kúu sa tnu'u ndichi a,
onde xinañu'u kuiti ma ni sa'a ña'a Iya Tátnuni ma,
sana ni sa'a ya ndaka‑ka ja ka iyo a,
23vaa jâ iyo sa xi'na‑ka,
sana ni ka kuva'a ndaka‑ka ja ka iyo a.
24Te xi'na‑ka sa jâ iyo,
sana ni ka kuva'a nuu kunu kunu ka ñu'u ndute ma,
te xi'na‑ka sa iyo,
sana ni ka kuva'a nuu ka too ndute ma.
25Xi'na‑ka sa jâ iyo, sana ni ka kuva'a yuku sukun ma
ji'in yuku kuechi ma,
26vaa jâ iyo sa,
sana ni kuva'a ñuyaka ko kuu ni‑ka'nu ñuu ñayivi a
ji'in ndaka nundaa ma.
27Iyo sa ji'in Su'si ma nuu yikuu ya sa'a ya andivi a
te ni skendoo ya ndute ma onde nuu ñu'ú ya.
28Iyo sa ji'in Su'si ma nuu yikuu ya sunkani vava'a ya andivi a
te ni chituu vava'a ya nuu ñu'u ndute ma.
29Nuu ni sunkani vava'a ya ñu'ú ya,
te ni tatnuni ya nuu ndute ma nde‑ni kuu kenda de ma.
30Iyo sa ji'in Su'si ma nuu yikuu ya súnkani va'a ya
ndaka ja sa'a ya ndi‑kivi ndi‑kivi ma,
te chukan kúu ja kúu sii ini xen‑xeen sa ja iyo sa ji'in ya.
31Saña ja kúu sa tnu'u ndichi a,
sii ini xeen iyo sa nuu ni sa'a Su'si ma ndaka cha'a,
te sii ini xeen iyo sa ja ni sa'a ya ñayii ñuu ñayivi a.
32’Chukan kúu ja vitna, vi sa'ya maa ri,
jin koniniso'o ja ká'an káchi ri a.
Ja vava'a ka kuu ñayii ka kandija te ka sa'a i
sukan ká'an káchi ri a.
33Jin katanuu ja ká'an káchi ri nuu ro a,
te máko jin saxiko ro,
sukan‑va'a jin ko kuu ro ñayii ndichi.
34Ja va'a kúu ñayii niniso'o ndaka ja ká'an ri a,
ja ûni ndee ndikin i ja na ni'i i tnu'u ndichi a.
35Vaa ñayii kuan‑ta'vi tnu'u ndichi ká'an ri a
chi sa'a i ja koteku i
te ni'i i ja skuta'vi ña'a Iya Tátnuni ma.
36Kovaa ñayii saxiko tnu'u ndichi a
chi sa'a u'vi maa i ini anua i ma,
te ja ni'i i kúu ja kûu i te skenaa i maa i ma.”
Sa'a ká'an tnu'u ndichi Su'si ma.
Currently Selected:
Proverbios 8: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
