Proverbios 7
7
Sukan sa'a ña'a kuneé ku‑uun ma ja xnda'vi ña tee ma
1Sa'ya maa ri, kandija te sa'a ro sukan tátnuni ri a,
te máko ndunaa kuiti ro ndaka ja tátnuni ri a.
2Ko koto va'a ndaka ja tátnuni ri a
sukan jito va'a ro nduchinuu ro a,
sukan‑va'a koteku ro.
3Tava'a va'a ini anua ro a,
te kinda'a kua'an kinda'a vee ro.
4Kutoo tnu'u ndichi a sukan kútoo ro ku'va ro ma,
te ndimaa kóo tnu'u ni kutu'va ro ma ini ve'e ro ma,
kuenda tnu'u ja in tna'a maa ro kuu i,
5sukan‑va'a jin kasi ndee jin kasi ndoso ña'a i
nuu ña'a vivii ká'an ma ja kúni ña
ja kivi nduu ña ji'in in‑ka tee ma.
6Vaa in kivi te nde'ya nde'ya ri ventana ri ma,
7te ni jini ri ja ne'un suchi jaa
suchi ñatuu ka jaku'ni ini tnu'u ndichi ma,
te iyo in i ja ka'vi‑ka kuu i sana ndaka‑ka i ma,
8te yu'u yu'u‑ni kua'an i ichi ve'e ña'a kúneé kú‑uun ma,
9vaa ñukuun kua'an i ora ve kunee ma,
sukan‑va'a ñatuu na‑in kuni ña'a.
10Sani te ni kee ña'a kúneé kú‑uun ma
ja jin ndatna'a ña ji'in i ma,
te na'a ña ja ña'a xiko maa ña kúu ña,
te skuiko yu'u skuiko nuu ña sukan kúu ña'a yukan ma.
11Ña'a ndee xeen ini kúu ña,
vaa ñatuu jandetu ña nuu yii ña ma,
chukan kúu ja ñatuu kúu koo ña ve'e ña ma,
12te ndimaa kua'an vee ña ichi ma ji'in nuya'vi ma
kúu ña nduku ña na in kundee ña xnda'vi ña.
13Te ni ndani'i tna'a ña ji'in suchi jaa
ñatuu na tnu'u ndichi neva'a i ma,
te ni kanuni'ni ña i te ni chitu ña yu'u i,
te jiña'a ña nawa kúni ña ma,
vaa masu na ja kan‑nuu ña.
14Te jiña'a ña:
“Vitna ni ndakua'a ri nuu Su'si ma ja ni skuiso ri ma,
sukan‑va'a jin ndumani ri ji'in ya.
15Chukan kúu ja vee ri ve ndi nduku ñukuun ña'a ri,
te vitna ni ka ndani'i tna'a o a.
16Vaa vivii jâ ni satu'va ri nuu jin kusu o ma
ji'in sa'ma vee ñuu Egipto ma,
17te jâ ni ndachi'i ri ve'e ri ma ndute jáxiko asi
ja ni kuva'a ji'in mirra ji'in áloe ji'in canela ma.
18Ne'e, te jín koo o te jín koo sii ini xeen o niñu
onde jin ndatuu jin ndandii o yutnee ma.
19Vaa yii ri ma chi ñatuu na tee iyo ve'e ri ma
chi ni kee de kua'an jika de,
20te kua'an de ji'in in bolsa xu'un,
te kukuee de kua'a kivi sana ndenda de”,
kúu ña jiña'a ña.
21Te vivii ká'an ká'an ña
onde ni kundee ña ni xnda'vi ña suchi jaa ma,
22te ni masu ni jini maa i ja ni xnda'vi ña'a ña ma,
te ni ndikin i ña sukan kúu in xndiki kua'an nuu kûu ti ma,
xi sukan kúu ñayii ndee xeen ini ma te kua'an i vekaa ma
ja na ndo'o neni i ma,
23xi sukan kúu in lasaa ja masu jini ti nawa ndo'o ti ma,
te kivi ñukuun ti nuu ni ka satu'va i
ja jin tnii i ti te jin ka'ni i ti ma,
sukan kúu suchi jaa ñatuu na tnu'u ndichi neva'a i ma.
24Chukan kúu ja ro'o ja kúu ro sa'ya ri a,
koniniso'o ñukuun ja ká'an káchi ri nuu ro a,
25te máko ndunaa ro ichi va'a a
te ko kondikin ro ichi kaxtnu'u ña'a yukan,
te máko ko ku'un ini ro ña te ko kondikin ro ña,
26vaa jâ ni kukua'a xeen tee ja'ni ña
ja sukan kúu ña ma.
27Vaa ichi nuu jin kûu ñayii kúu ichi ve'e ña ma,
te ichi nuu jin skenaa i maa i kúu.
Currently Selected:
Proverbios 7: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
