Proverbios 6
6
Ñayii sa'a sukan ká'an Su'si ma chi ma ko kuu in ñayii kuxi, ñayii xnda'vi tna'a
1Sa'ya maa ri, nú na in ni jikan‑ta'vi nuu ro
ja ko kuu ro yunuu i ja na kakan yika ro nawa kúni i ma
xi nú jâ ni skuiso ro ja kuu ja ko kuu ro yunuu i ma,
2chi kuenda tnu'u ja ni ju'ni vava'a ro maa ro
ja sukan ni ka'an ro ma,
3te vitna chi sa'a sa'a ro,
sukan‑va'a kaku ro nuu nda'a in‑ka ñayii ma,
te máko kukan‑nuu ro,
te kua'an te ka'an vii ka'an va'a ro ji'in ñayii
ni yo kuu ro yunuu i ma,
te kuña'a ro ja masu ndachunaa ro nuu tniñu i ma
te na ndachunaa maa i.
4Kovaa ni másu ko kusu tnuni ro,
te ûni ki'in ro te kuña'a ro i sukan.
5Tnuñu ja na kaku ro
sukan kaku in isu ma nuu nda'a tee nduku ja ka'ni de ti ma,
xi sukan kaku lasaa ma nuu nda'a tee ndúku ti ma.
6Ro'o ja kuu ro ñayii kuxi xeen ma, konde'ya sukan sa'a tioko ma,
te ndasa'a kuenda sukan sa'a sukan kúu ti ma,
te ko kuu ro in ñayii ndichi.
7Vaa tioko ma, masu na in tátnuni nuu ti
naxe ko sa'a ko kuu ti sukan‑va'a koteku ti ma.
8Kovaa maa ti chi tiempu kúun savi ma te iyo kua'a ja kaa ti ma
te ndí ini ti ja tiempu yukan kúu ja ndáxtutu ndáxtutu ti te táva'a ti
sukan‑va'a tiempu yichi ma te koo ja kaa ti ma.
9Kovaa ro'o ñayii kuxi, ¿na saa‑ka kivi kavatuu kavatuu‑ni ro,
te na saa‑ka kivi sana ndoto ro ja kixi kixi‑ni ro a?
10Jâ ni kuu‑ni ja kixi ndeyi kixi ndichi ro a
te ndachunenu tna'a tna'a‑ni ro nda'a ro
te ndatatu ndatatu‑ni ro a.
11Vaa nú sukan‑ni kúu ro a chi yachi yachi‑ni kenda
ja ko kunda'vi ko kukee ro te kundee i nuu ro.
12Ñayii sa'a ja u'vi ma masu jini‑ka maa i ja sa'a i ma,
te nanimaa‑nka tnu'u ndeva'a tnu'u kini kée yu'u i ma.
13Onde nuu i ma sa'a xiñi i,
te ji'in nda'a i ma ji'in ja'a i ma sa'a i seña ja ká'an ndeva'a i ma.
14Vaa nanimaa ja u'vi ñu'u ini anua i ma,
te ndimaa ñu'u ini i ja sa'a i ja u'vi ma.
15Chukan kúu ja sanaa sanaa‑ni,
te kenda ja skenaa ndi'i kuiti i ja neva'a i ma,
te ni masu nawa ndani'i‑ka i,
te ja sukan ndo'o i ma, masu na in kasi ndee.
16Vaa iñu ja sa'a ñayii ma masu jatna ini Su'si ma,
te ja ku‑uja ma chi ûni onde ini anua ya ma saxiko ya.
17Ñayii ndee xeen nuu i ma ja jani ini i ja maa i kúu‑ka ma,
ñayii ka'an tnu'u ma,
ñayii ja'ni ñayii ñatuu na kuechi ma,
18ñayii jani ini naxe sa'a i ja u'vi ma,
ñayii ûni jinu i kua'an i ja sa'a i ja u'vi ma,
19ñayii ka'an ja ni jini nuu i ma te masu ja ndaa kúu ja ká'an i ma,
ji'in ñayii sa'a ja ka ndakiti ini nuu tna'a ñayii ka ketna'a ini ma.
20Sa'ya maa ri, tava'a ndaka ja tátnuni yuva ro a,
te máko xndoo ro ja ni kaxtnu'u si'i ro ma nuu ro a.
21Ndimaa ku'un ini tnu'u ya'a te ûni kuenda tnu'u ja kondeku ro,
22vaa ndaka tnu'u ka ka'an ka kachi yuva ro ma nuu ro ma,
te ni'i ini ro naxe sa'a naxe kuu ro ndenu kua'an ndenu vee ro ma,
te sa'a i ja kusu ro te ndatatu sii ini ro,
te ora ndoto ro ma
te kuenda tnu'u ja maa tnu'u yukan ká'an‑so'o nuu ro.
23Vaa tnu'u tátnuni ri a chi kuenda tnu'u ja in ñu'u ndú'va kúu i,
te ja káxtnu'u ri a chi xtnuu i nuu ro sukan kúu ñu'u ndú'va ma,
te ja ndáka'an‑so'o ri nuu ro ja ndákani ichi ña'a ri a
chi sa'a i ja koteku ro,
24te sa'a i ja kaku ro ja ma xnda'vi ña'a ña'a kúneé kú‑uun ma
ña'a vivii ká'an te masu ñasi'i ro kúu ña ma.
25Te máko ndiyo ini ro ja vivii kaa ña ma,
te ni máko kua'a ro tnu'u ja kundee ña xnda'vi ña'a ña
ji'in nduchinuu ña ma.
26Ña'a xiko maa ña ma chi ja kúni ña kúu ja na ni'i ña ja kaa ña ma,
kovaa ña'a kúneé kú‑uun ma
chi ndúku ña ja na xnda'vi ña tee ñu'u kaji ini ma.
27Vaa kona'a ro ja masu na‑in kuu chiso i ñu'u i'ni ma
siki sa'ma ne'nu i ma te ma kayu sa'ma i ma,
28te ni masu kuu kaka tee ma siki ñu'u i'ni ma te ma kayu ja'a de ma.
29Vaa tee kívi nduu ji'in ñasi'i in‑ka tee ma
chi másu yanduu ja ndachunaa de ja ni sa'a de ma.
30Vaa nawa kúu ja tee sakui'na sana ni'i de ja kaa de ma
masu ka sanuu xeen ñayii ma.
31Kovaa nuna jin ndani'i ñayii ma de ja sukan sa'a de ma
chi uja‑ka jichi ndakua'a de sana ja ni sakui'na de ma,
te ndakua'a de onde ndaka ja neva'a de ve'e de ma.
32Kovaa vi'i‑ka ndachunaa tee kívi nduu ji'in in‑ka ña'a ma,
vaa jini de te masu ndasa'a de kuenda,
te xtivi de ini anua de ja sukan sa'a de ma.
33Ja ni'i de kúu ja jin ka'ni i de xi jin xtnakue'e i de,
te ja kan‑yu'u ja kan‑nuu ni'i de ma chi masu naa kuiti.
34Vaa tee xi‑ñasi'i ma chi ja kukueñu de ña ma sa'a
ja ûni ndakiti xen‑xeen ini de,
te ni masu sakanu ini de tee ni kivi nduu ji'in ñasi'i de ma
onde ndachunaa de.
35Te ni masu kuan‑ta'vi de nawa jin kua'a i
ja jin ndaka'an mani i de,
te ni masu kachi de ja sakanu ini de,
visi na nduku tee ndiso kuechi ma kua'a xeen ja skuta'vi de tee ma.
Currently Selected:
Proverbios 6: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
