Proverbios 5
5
Ñayii sa'a sukan ká'an tnu'u ndichi Su'si ma chi ñatuu sa'a i ja u'vi
1Sa'ya maa ri, katanuu tnu'u ndichi ká'an káchi ri a,
te koniniso'o ñukuun ro,
2sukan‑va'a kutu'va ro tnu'u ká'an so'o ri nuu ro a
te ndimaa tnu'u ndichi ko ka'an ro,
3sukan‑va'a kaku ro nuu ña'a kúneé kú‑uun ma
ja vivii ká'an ña ma.
Vi'i‑ka saa nduxi ma xi xe'en,
sukan ka kuu tnu'u ká'an ña ma.
4Vaa tee kandija ja ká'an ña ma
chi ja u'vi xeen ko kuu maa de,
vaa vi'i‑ka saa in ja uwa xeen xi in yuchi xen‑xeen kúu
ja ni ja'nde ña'a,
sukan ko kuu ja ndo'o neni de ma.
5Vaa masu ndása'a maa de kuenda
ja ndita ndita kua'an de nuu kûu de ma te skenaa de maa de ma,
vaa ñayii ka sa'a sukan sa'a ña'a kúneé kú‑uun ma
chi jin kûu i te jin skenaa i maa i ma.
6Vaa ña'a yukan chi masu ndí ini ña ja ko sa'a ña ja va'a ma
te koteku ña ma,
te ni masu ndása'a maa ña kuenda ja ichi kua'an ña ma
chi ichi nuu skenaa ña maa ña kúu.
7Sa'ya maa ri, koniniso'o va'a ja ká'an káchi ri nuu ro a,
te máko ndunaa ro sukan jani ini ja ká'an ri a.
8Kakayata ro nuu iyo ña'a yukan,
te ni máko jin tu'va ro ye'e ña ma,
9sukan‑va'a má jin sa'a ndeva'a ña'a tna'a ña ma
te ma skenaa ro maa ro,
ni a jin ko ka'an i ja masu ni sa'a ro ja va'a,
10nasa yukan te in‑ka ñayii jin kaa jin ko'o
ndaka ja ni ni'i ro ja ndo'o neni ro satniñu ro ma,
11te kenda kivi ja kuu nija'nu ro ma
te ndakani ndaka'vi ini ro te ndanda'yu ro ja ni sa'a ro ja u'vi ma.
12Te ndaka'an ro:
“Nava'a ni saxiko o tnu'u ndichi ni ka yo ka'an i nuu o ma,
te naku ñatuu ni jan‑ta'vi ini anua o a
ja ni ka yo ndaka'an so'o i nuu o ma,
13te nava'a ñatuu ni yo niniso'o o tnu'u ni ka yo kaxtnu'u i nuu o ma
sukan‑va'a ko sa'a o ja va'a ma.
Nute ni jatanuu o chi koo va'a‑ka o nkuu.
14Te vitna chi masu nawa kúu‑ka o nuu ñayii a,
vaa kuechi ja nanimaa ja u'vi ni yo sa'a o ma,
te masu na in kúnimani va'a‑ka nuu o”,
ndaka'an ro.
15Chukan kúu ja kandija sukan ká'an tnu'u ndichi Su'si a,
te ko kuu ro in tee ku'un va'a ini,
te ko'o ro ndute ñu'u va'a ve'e ro ma.
16¿Vaa naku ko kati ro ndute ro ma ndeva'a‑ni ichi ma
xi nuu ka ndatna'a kua'a ñayii ma?
17Vaa kona'a ro ja kuenda maa ro kúu,
te ¿naku ko kuatniñu ro ji'in in‑ka ñayii
ja masu ñayii ve'e ro ma kúu i ma?
18Ja vii ja va'a kúu tnu'u ndee tnu'u ndatnu neva'a ro ma,
te koo sii ini ji'in ñasi'i ro ma ña'a ni tnanda'a ji'in ro
nuu ka iyo jaa ro ma.
19Kani ini ja sukan kaa in isu vivii ma, sukan kaa ñasi'i ro ma,
te ni‑kani ni‑jika ko jatna ini ro sukan vivii kúu ñasi'i ro ma
nuu ro ma.
Te ndunaa ndaka tnundo'o tnuneni iyo ma,
te ndimaa ku'un ini sukan ka kutoo tna'a ro ji'in ñasi'i ro ma.
20Sa'ya maa ri, ndasa'a kuenda vaa masu kuaa ro,
vaa ko kondikin ro ña'a kúneé kú‑uun ma
te kunu ni'ni ro ña'a masu ñasi'i ro kúu ña ma.
21Vaa kona'a ro ja Su'si ma chi nde'ya nde'ya‑ni ya
ndaka ñayii ma nawa ka sa'a ka kuu i ma,
te jini ya nú ja va'a xi ja u'vi kúu ja ka sa'a ka kuu i ma.
22Vaa kona'a ro ja ñayii sa'a ja u'vi ma
chi maa ja u'vi ni sa'a i ma ndatnii vava'a ña'a
te konu'ni vava'a maa i,
te kondiso maa i kuechi i ma.
23Te sukan kûu maa i,
vaa ñatuu ni kandija i ja ni ka yo ndaka'an so'o ñayii ndichi ma,
te skenaa i maa i ja sukan so'o ni kaa i ma.
Currently Selected:
Proverbios 5: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
