Filp 3
3
Zozii bhlo 'kʋ ‑tɛɛ, Pɔlʋ ‑zʋɔ 'lɛ ɔla pɔɔtɛtɛa
1Na, bholiecɩnyɩ, a nʋ ‑pɔpʋɛ ‑Kwlenyɔ nɩkplaan. Ɩ nʋ 'taan lʋʋ le n zie anyɩ wɔlɩa bhlogbɩɩ. 'Nyɩ ɩ ‑glɩ ala gbazɔ 'tɛtɩɩnzʋlɩɛ. 2A zʋlʋ gbanyinyinʋnyaa pɔlɛ 'kʋ, goye ‑naa 'nyɛkɛa 'la 'kʋdɩlɩɛa ‑glɩ 'lɛ ɩla 'ciin 'la wɔlɩ na! 3Sa, ‑anyɩ ‑ɔ ‑glɩ 'lɛ maa 'titia ‑ɔ ‑dɩɔ 'lɛ 'kʋ na, ‑anyɩa ‑ɔ gʋgwlalɩ 'lɛ Laagɔ 'la 'Wugoa nɩkplaan, ‑anyɩa ‑ɔ kpolili 'lɛ Zozi Klisi nɩkplaan 'nyɩ ‑ɔ zʋ 'ta 'lɛ ‑ala ‑delikʋtɛlɔa ‑ala 'nyɛkɛa 'kʋ na.
4'Bhlɩmɔɔn, ɩ ‑ka ‑kʋ lebhe nclɔɔ cɩa 'nyɛkɛa ‑delikʋtɛbhalɩ na, amʋ ma sa 'lɛ. Ɩ ‑ka ‑kʋ lebhe ‑anɔ bhlo ‑ka gugu lebhe ɔ cɩ 'nyɛkɛa ‑delikʋtɛbhalɩ na, ‑amʋ, n cɩ 'nyɛkɛa ‑delikʋtɛbhalɩ 'nyɩ n cɩɔ 'kʋ zi. 5N ‑ka clɩɩ ‑ngbaata 'nyɩ ma yaan 'lɛ 'kʋ 'dɩ, n ‑glɩ Izlayɛlɩnyɔ*, Bɛnzamɛɛn 'la 'lɔkpʋnyɔ, Ebleenyɔ 'yɛkɛyɛkɛ, 'nyɩ ‑jlɩmaa 'la gbazɔ, n ‑glɩ 'lɛ Falizɩɛnnyɔ*. 6A ‑glɩa 'na 'ciin 'la wɔlɩ ‑gbɔɔn, ɩ gbaa na, n ‑glɩa ‑laagɔnɩkplaa 'la gbaylɩsanyɔ. 'Nyɩ ‑ɔ ‑glɩ 'lɛ 'kʋnylugolulɩɛa ma 'lɩlɩ ‑jlɩmaa 'la 'kʋplɩlɩlɩɛa nɩkplaan na, n 'taa 'gesalɩda ‑ka.
7‑Ma lɩɩ ‑naa ‑tɛtɛa, ‑ɩ ‑glɩa 'lɛ 'na da ‑nvʋsʋɛ na, Klisi 'la gbʋ, n kopenɩɩ 'ciin le ‑gbɩɔlɩɛ. 8N ‑ka 'nanɩ 'kadie ‑naa 'na ‑Kwlenyɔ Zozi Klisi 'la cibhlililiea ‑glɩ 'lɛ na, 'ciinkope na, ‑tɛtɛa 'fɩan ‑glɩnɩ 'na da ‑gbɩɔlɩɛ. Ɔla gbʋ, n ya ŋonu le ‑tɛtɛa 'fɩan ‑gbɩɔ, 'nyɩ n kopenɩ ɩmɩ ‑naa ‑tɛtɛa 'ciin le ‑kakuo 'kʋ 'la lɩɩ ɩya Klisi 'ka 'na ‑nvʋsʋɛ 'plɩ, 9ɩya n ‑yɔɔsɔ 'ka bhlo 'plɩ. 'Na 'kʋnylugolulɩɛa 'wlʋlʋ 'ta ‑jlɩmaa 'la 'kʋplɩlɩɛa nɩkplaan, ‑ma ɩ 'wlʋlʋ 'na pɔɔtɛtɛa n ‑zʋɔ 'lɛ Klisi 'kʋ na nɩkplaan. Laagɔ ‑ɔ pleen 'lɛ 'kʋnylugolunyɔ, pɔɔtɛtɛ 'wluku. 10‑Tɛtɛa 'fɩan n 'matɩ 'lɛ na, n 'kɔɔ cibhlili, ɔmɔ, ɩya ɔla 'kwɩɩnkʋbhuea 'la 'tɛtɩa, n ‑yɔɔsɔ 'ka ɔla 'kwlɩbhɩɛa 'kʋwlalɩ, n 'ka ɔla 'kwɩa 'ku 11ɩya n 'kasɛnɩ 'kwɩɩnkʋbho.
12‑N ta le ka n ya 'lɛ ɩmɩ na ‑tɛtɛa tooto 'lɩ, ‑aana ka n ya 'lɛ 'kʋglalɩ. ‑Ma ka n 'sɩslɩlɩ 'lɛ ɩya n 'kɩɩ 'kʋbhli, ‑ofi lebhe ‑amʋ 'titi, Zozi Klisi yaan 'kʋbhli na. 13Bholiecɩnyɩ, 'n gugu 'ta lebhe n yɩɩ tooto 'kʋbhli. 'Na 'ciin 'la wɔlɩa bhlogbɩɩ ‑ɩ ‑glɩ 'lɛ lebhe n ya ‑tɛtɛa 'fɩan ‑ɩ 'plɩ 'lɛ na 'kʋbolu, 'nyɩ n kopenɩ 'lɛ 'kʋklʋʋn. 14‑Laagɔɔn 'la dluuplʋlɩɛa Laagɔ la 'lɛ ‑anyɩ le ‑a ka ‑aya Zozi Klisi 'la nebhloplɩlɩɛa nɩkplaan 'lɩlɩ na, ɩmɩ n tli 'lɛ. 15Na, ‑anyɩa ‑tɛtɛa ‑ɔ yanɩ 'lɛ 'kʋglalɩ na, ‑a gugu ‑sa, 'nyɩ wɔɔci ‑anɩ 'kʋ, ka a ‑ka ‑buun sa gugu na, Laagɔ cɩ 'ka anyɩ ɩla dɩgalɩa ‑ma 'nyɩ. 16‑Ma, daa ‑a yanɩ 'lɛ ŋeni na, -a gɩnɩ ‑gugwiea bhlogbɩɩ 'ciin.
17Bholiecɩnyɩ, a dɩbalɩɩn ɩya a kope maa ‑ɔ namʋ 'lɛ saa a 'lɩ 'lɛ ‑anyɩ 'namʋda na 'ciin. 18Sa, n solua ‑azla sɛɛ anyɩ 'nyɩ ‑pɔtɔnʋ ‑ma, 'mɩɔ ‑kʋʋn 'lɛ 'ciin 'nyɩ n solu ‑awlɛ 'lɛ sɛɛ anyɩ lebhe ‑bhutukpa namʋ le Klisi 'la dabhlalɩsua 'la ‑zɔbhɛlɩgbanya. 19Bhɩalɩdaa, ka ma cɩ 'ka 'lɛ mlɔ. Mala nɩkplɩa ‑ɩ ‑glɩ 'lɛ mala ‑laagɔ 'nyɩ ɩmɩa ‑ɩ ‑glɩ 'lɛ mala ‑zo na, ma kpolilii 'lɛ nɩkplaan, maa ‑ɔla pɔlɩa ‑kʋ 'lɛ ‑dʋdʋa 'kʋ 'la lɩɩa bhlobhlo ‑tɛɛ cɩ na. 20‑Ma ‑anyɩ, ‑ala 'dua, ‑laagɔɔn ʋ ‑kʋ 'lɛ, 'yɛpɩ ‑a ‑bɛ 'lɛ le ‑Kwlenyɔ Zozi Klisi 'ka 'wlʋlʋ ɩya ɔ 'ka ci le ‑ala gbʋʋnsanyɔ. 21Ɔ cɩ 'ka ala ŋaazɩnyɛkɛa kaci ɩya ɔ 'kɛɛ ɔla 'klʋagbanyɛkɛa 'bhisa 'kʋ ple, ɔla 'tɛtɩa ɔ ma 'lɛ 'nyɩ ɔ zʋ 'lɛ lɩɩa ‑tɛtɛa ɔla ‑kwleliea ‑zɔn na nɩkplaan.
Currently Selected:
Filp 3: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.