Filp 2

‑Kwlenyɔa, ɔmɔ ‑ɔ ‑glɩ 'lɛ Zozi Klisi

1Na, ɩ ‑ka ‑kʋ le Klisi ya anyɩ la, a ya ‑wawʋa nɩkplaan 'tɛtɩɩnzʋlɩɛ 'lɩlɩ, a ya Laagɔ 'la 'Wugoa nɩkplaan bhlo 'plɩlɩ, 'nyɩ a ‑kanɩ ‑walʋ ɩya ŋaazɩɩnlɩlɩɛ na, 2'dɛndlana a 'plɩnɩ bhlo ɩya 'na pɔlɛkʋmɛnɔa 'ka 'kʋglalɩ. A kalɩ ‑walʋ bhlo, pɔlɛ bhlo ɩya a 'plɩ bhlo. 3A 'la nʋnʋa lʋʋ bhlogbɩɩ 'tɩtʋɛ nɩkplaan, a 'la 'matɩa 'klʋagba, ‑ma a ‑la acɩ ‑dʋdʋ 'kʋ ɩya a kope a 'ye 'ciin le saa ma zi 'lɛ anyɩ 'kʋ na. 4Nclɔɔ nclɔɔ 'la gbaa ɔcɩ ‑tɛɛ 'la gbʋ, ‑ma ɔ kopemʋ ɔ 'ye 'ciin.

5A namʋ ‑sa, sɛ ma namʋ 'lɛ Zozi Klisi nɩkplaan:

6Ɔmɔa ‑ɔ ‑glɩ 'lɛ Laagɔ na,

ɔ 'ta 'matɩ le ɔ 'ka ɔya Laagɔ 'la 'wʋlʋlɩɛa 'kʋtɩtɔlʋ.

7‑Ma, ɔ ya ɔcɩ 'kʋ 'wlʋ,

ɔ ya ɔcɩ geyu ple,

ɔya ncɛlɩ ya 'wlʋlʋ

'nyɩ ɔla ‑lɩɩbhuo palanɩa le nclɔɔ.

8Ɔ ya ɔcɩ ‑dʋdʋ 'kʋ ‑la,

ɔla 'nyi ‑kʋ Laagɔ yida ‑aan

'nyɩ ɔ ya 'lɛ ŋonu le ɔ cɩ 'ku,

ɔ cɩ dabhlalɩsua 'ciin 'la 'kwɩa 'ku.

9Ɩla gbʋ, dɛ Laagɔ ‑too 'lɛ 'kʋ

'nyɩ ɔ ya 'lɛ ‑tɛtɛa 'fɩan 'kʋ zi,

'nyɩ ɔ yɔɔ 'lɛ 'ŋlɩa ‑ɩ zi 'lɛ

'ŋlɩa ‑tɛtɛa 'fɩan 'kʋ na 'nyɩ,

10ɩya ma ‑ka Zozii 'ŋlɩ sla na,

‑laagɔɔn, ‑dʋdʋa 'kʋ ɩya ‑gluu,

ncɛlɩa ‑tɛtɛa 'ka ‑kukoonkplii sa sla,

11ɩya nia ‑tɛtɛa 'ka 'cla lebhe

‑Kwlenyɔa, ɔmɔ ‑ɔ ‑glɩ 'lɛ Zozi Klisi,

To Laagɔ 'la 'klʋagba 'la gbʋ.

'Naa a le zezezeli 'bhisa

12Na, 'na ‑wawabholiecɩnyɩ, anyɩa ‑ɔ ‑ka 'lɛ clɩɩa 'fɩan 'na 'nyiyilie na, 'naa a kalɩ 'kɩɩ, ‑n 'ta le 'na 'ci 'kʋ ‑tɛɛ, ‑ma ‑pɔtɔnʋ 'titi, daa n 'tanɩ 'lɛ anyɩ sidiin ‑kʋ na. ‑Ncɩdʋdʋkʋlalɩɛ ɩya cɩtɩtɛlɩlɩɛ nɩkplaan, a ‑glalɩ ala gbʋʋnsalɩɛa 'la lobholia 'kʋ. 13Sa Laagɔ, ɔmɔ ‑ɔ nʋnʋ 'lɛ anyɩ lobholi nɩkplaan, 'nyɩ a mino 'lɛ a wabha 'lɛ 'nyɩ a nʋ 'lɛ ɩmɩa ‑ɩ ‑kɔɔ 'lɛ 'tʋ na.

14Na, ‑tɛtɛa 'fɩan a cɩ 'ka 'lɛ nʋ na, a 'la gba wɔlɩ, a 'la dlɛa dlɛdlʋ, 15ɩya ma 'la ka anyɩ 'ge ‑salɩ ɩya a 'ka ‑kplɔ. ‑Sa a cɩ 'ka 'lɛ ‑zɔkpaa ‑naa ‑a ‑mlɔ 'lɛ 'nyɩ ‑a ‑nyumo 'lɛ na sidiin, Laagɔ 'la 'cuoa wɔɔnyinyi 'ta 'lɛ nɩkplaan ‑kʋ na 'plɩ. 'Lɩka ‑sa a cɩ 'ka 'lɛ ‑laagɔzɔan leli le zezezeli 'bhisa. 16Anyɩ ‑ɔ la 'lɛ maa jabhʋa 'la wɔɔnyɩtʋa. Klisi 'la ciclɩɩa 'kʋ, ɩmɩ ‑ɩ cɩ ka 'lɛ 'na 'klʋagba 'plɩ, ‑masa sɔmɩa n fa 'lɛ ɩya lobholia 'la gbʋa n sɛ 'lɛ na, ɩ cɩ 'ta 'kpɔkpɔ 'plɩ na. 17'Nyɩ ka ɩ ‑ka ‑kʋ le 'na ‑dolua 'kɔsɔsa ɩya n 'plɩ ala pɔɔtɛtɛa 'la ‑teyiyilʋʋ ɩya ɛla lobolia 'la ‑aghlɛ na, ɩ mɛnɩɩn pɔlɛ 'kʋ, 'nyɩ n ‑ya anyɩa 'fɩan nʋ 'dɛ 'la pɔlɛkʋmɛnɔa. 18Na, 'sɛtɛɛ bhlogbɩɩ, anyɩ ‑ma, pɔlɛ 'kʋ mɛma anyɩ ɩya n ‑ya anyɩsɔ nʋ ‑pɔpʋɛ.

Pɔlʋ cɩ 'ka Timoti ɩya Epafloditi lobhu

19‑Kwlenyɔ Zozii 'la 'ŋlɩa nɩkplaan, n gugu lebhe n cɩ 'ka clɩɩklipɛ nɩkplaan Timoti anyɩ 'bhlɩ lobhu ɩya ala 'dɩa ɔ cɩ 'kaan 'lɛ ‑lamʋ na, ‑amʋ ‑ma ɩ 'kaan 'tɛtɩɩn zʋ. 20N 'ta ‑buun nclɔɔ ‑ylɛylɛ ‑ka, ‑ɔ gugu 'lɛ amʋ 'bhisa, 'nyɩ ala wɔlɩ kalɩ 'lɛ cɩɩn na: 21Maa ‑tɛtɛa, maa 'titi macɩ 'la wɔlɩ ma gugu 'lɛ, ‑ma ‑n 'ta Zozi Klisi 'nɩa. 22‑Ma ɔmɔ, ɔ ya pala lebhe ma cɩɔ ‑delikʋtɛbhalɩ, 'nyɩ anyɩ 'titi a ‑ci sɛɛ: Saa 'cilee kʋ 'lɛ ɔ to cɩ na, ɔ yaan Dɩnanɩa* 'la lobholia klalɩ. 23Na, daa n cɩ 'ka 'lɛ 'nanɩ 'nylugo na, n gugu lebhe ɔmɔ n cɩ 'ka 'lɛ anyɩ 'bhlɩ lobhu. 24'Nyɩ ‑Kwlenyɔ 'la 'ŋlɩa nɩkplaan, n ‑ci lebhe ‑amʋ ‑ma n cɩ 'ka anyɩ clɩɩklipɛ nɩkplaan kopekan ci.

25'Bhlɩmɔɔn, n ya gugu lebhe ɩ ‑fata lebhe n lobhua n bholi Epafloditi, 'na lobholi ɩya tavʋnamʋnyɔa anyɩ 'bhlɩ, ɔmɔa a lobhuwaa 'lɛ le ɔ ‑ciin klalɩkan, daa n ‑kʋa 'lɛ ‑mieliin na. 26Sa, ala 'ciinlɩlɩɛ 'la 'tʋ bhla 'mɔɔ ‑gbɔɔn, 'nyɩ ɔ plea pɔlɛ, ‑ofi lebhe a yaa ɔla gubhladɩa 'nu na. 27‑Zaagbʋsa, ɔ 'taa ‑ja, 'nyɩ 'pɛpɛ 'titi ɔ 'ku 'taa. ‑Ma Laagɔ yɔɔ ŋaazɩɩn 'lɩ 'nyɩ ‑n 'ta ɔmɔ bhloo, ‑ma ‑amʋ ‑masɛɛ, ɩya 'na cɩɩnkalɔa 'la ka 'kʋzʋlʋzʋlʋlʋ. 28Ka n nʋ 'lɛ 'faanfan ɩya n 'ka ‑awlɛɔ anyɩ ‑la ɩya a ‑kɔɔ 'lɩ na, pɔlɛ 'kʋ 'ka ‑awlɛ anyɩ mɛma ɩya ‑amʋ ‑ma 'na cɩɩnkalɔa 'ka 'kʋsalɩ. 29Na, a 'klɔɔ pɔlɛkʋmɛnɔmɛnɔsa le a bholia ayɔɔsɔ ‑kʋ 'lɛ ‑Kwlenyɔ nɩkplaan na 'bhisa, ɩya a kalɩ ɔmɔ 'bhisa 'kʋ 'la ncɛlɩa 'la zʋlɩɛ. 30Sa Klisi 'la lobholia 'la gbʋ, 'pɛpɛ 'titi ɔ 'kʋ 'taa. Ɔ ya ɔcɩ 'pɛlʋ zʋ le ala 'jeen, ɔ 'ka ɩmɩa anyɩ 'titi a cɩ 'taa 'lɛ mino a 'ka nʋ ɩya a 'kaan klalɩ na, ala da nʋ.

Currently Selected:

Filp 2: NTLD13

Highlight

Copy