Filp 4
4
1Na, 'na ‑wawabholiecɩnyɩ, anyɩa n ‑wa 'lɛ ‑gbɔɔn lebhe n 'ka ‑awlɛ 'ciinlɩ na, anyɩa ‑ɔ ‑glɩ 'lɛ 'na pɔlɛkʋmɛmɛnɔ ɩya 'na ‑ajaakpa na, 'na ‑wawabholiecɩnyɩ, a 'nylugo ‑sa kpaan, ‑Kwlenyɔ nɩkplaan.
A 'plɩlɩ ɩmɩa a ca 'lɛ na 'kʋ
2N 'clalɩ Evodii ɩya Sɛntisi le ma 'plɩ bhlo ‑Kwlenyɔ nɩkplaan. 3'Nyɩ ‑mɔ, 'na ‑gɩganamʋnyɔa, n 'clalɩɔ 'lɛ le n klalɩ maa, sa n ‑ya maasɔ ya Dɩnanɩa* 'la gbʋ nebhlo 'tɩtɔlʋ, maya Klemaan ɩya 'na ‑daa klalɩnyaa ‑tɛtɛa mala 'ŋlɩa ‑zieo 'lɛ jabhʋa 'la ‑afluwaa nɩkplaan na.
4A nʋ clɩɩa 'fɩan ‑pɔpʋɛ ‑Kwlenyɔ nɩkplaan, n nyɩtɩɩ ‑awlɛ, a nʋ ‑pɔpʋɛ. 5'Naa ncɛlɩa 'fɩan cibhlili lebhe ala gbɩ nanɩ. ‑Kwlenyɔ ya cɩmɛ. 6A 'la plea lʋʋ bhlogbɩɩ 'la pɔlɛ, ‑ma saa 'fɩan ɩ cɩ 'ka 'lɛ kʋkʋlʋ na, a bhibhie, a zɩzla, a bhɔlʋ Laagɔ ɩya a gba ɔ cibhlili ala lɩɩa a 'clalɩ 'lɛ na. 7‑Sa Laagɔ 'la pupuea, ‑ɛ zi 'lɛ dɩgalɩa ‑tɛtɛa 'kʋ na, cɩ 'ka 'lɛ ala pɔlɩa ɩya ala wɔɔgugwiea Zozii klisi nɩkplaan 'klʋlɩlɩ.
8Bholiecɩnyɩ, ɩmɩa ‑tɛtɛa ‑ɩ ‑glɩ 'lɛ ‑nʋawlɛ, ma cɩ 'lɛ zʋ, ‑ɩ 'nylugolu 'lɛ 'kʋ, ‑ɩ ‑kplɔ 'lɛ, ma cɩ 'lɛ wabha, ma cɩ 'lɛ 'ŋwleenfalɩ, wɔɔnanɩa ‑tɛtɛa, ɩmɩa ‑ɩya kaanvʋlɩɛ ‑fata 'lɛ na, ɩmɩ ‑na ‑tɛɛ 'plɩ ala nʋnʋgbɩ. 9Na, ɩmɩa n caa 'lɛ anyɩ, n 'nyɩ 'lɛ anyɩ, a 'nunuun 'lɛ neen, 'nyɩ a 'lɩlɩɩn 'lɛ nɩkplaan na, ɩmɩ ‑naa ‑tɛtɛa a 'plɩlɩɩ 'kʋ, ɩya Laagɔa ‑ɔ nyɩ 'lɛ pupue na, ɔ 'ka anyɩ cɩ kʋ.
Pɔlʋ bhɔlʋ Filipʋnyaa
10Pɔlɛ 'kʋ yaan mɛma ‑gbɔɔn ‑Kwlenyɔ nɩkplaan, saa a ya 'lɛ mino 'nyɩ a ya ‑awlɛ 'lɛ pala lebhe 'na wɔlɩ kalɩ ka anyɩ cɩɩn na: ‑Ghɛɛ, 'na wɔlɩ kalɩ anyɩ cɩɩn, ‑ma ‑jioli a 'ta ka kaa 'lɛ 'lɩ. 11‑N 'ta ‑mieli gba 'ta 'lɛ 'nyɩ n nyɩtɛ 'lɛ ‑sa, sa saa ‑tɛtɛa ɩ cɩ 'ka 'lɛ kʋkʋlʋ na, n ci ncɩ klasa. 12N ‑ci 'na 'mɩa 'pɩasa, 'nyɩ n ‑ci 'lɛ 'nanɩ lisa. Daa ‑tɛtɛa ɩya saa 'fɩan ɩ cɩ 'ka 'lɛ kʋkʋlʋ na, n ya ncɩ ŋaazɩ ɩya 'nanɩ nɩkplaan kʋlɩɛ ca. 13N mino ‑tɛtɛa 'fɩan, ɔmɔa ‑ɔ zʋʋn 'lɛ 'tɛtɩɩn na, 'la gbʋ. 14'Bhlɩmɔɔn, a ya 'nanɩ nʋ 'nyɩ a yaan 'na 'kwlɩbhɩɛa klalɩ.
15Filipʋnyanyɩ, anyɩ 'titi a ‑ci sɛɛ lebhe, daa n bhɔ 'lɛ Dɩnanɩa* 'la ‑salobholia, 'nyɩ n 'wlʋ 'lɛ Masedʋanɩbhlɩa 'kʋ na, ‑laagɔnɩkplaa 'la ncɛlɩa, bhlogbɩɩ 'ta 'dala ‑sa ɩya ɔ 'kaan klalɩ, ‑n 'ta le anyɩ bhloo na. 16Anyɩ, Tesalonikibhlɩ 'kʋ tooto, ‑ɔ tlɛlɩɩn 'lɛ dɩ ‑zlʋsaasa lɩɩa n ‑miea 'lɛ na. 17‑N 'ta le n 'ka vavalɩɩ 'matɩ. Ɩmɩa n 'matɩ 'lɛ na, ɩmɩ ‑ɩ ‑glɩ le ala ‑nvʋsʋɛa zʋlʋ 'kʋ. 18N ‑kanɩ lɩɩa ‑tɛtɛa n 'matɩ 'lɛ na, 'nyɩ ɩ plɩ cɩ. 'Nyɩ n 'tanɩ lʋʋ ‑ylɛylɛ ‑mie, ‑ofi lebhe n ya lɩɩa a 'nyɩnɩ 'lɛ Epafloditi na 'lɩ, 'nyɩ ɩ ‑glɩ 'ŋɔnɔpaasʋʋnbanyɩ, ‑teyiyilɩɛa ‑ɩ ‑ka 'lɛ Laagɔ 'tʋ 'nyɩ ɔ ya 'lɛ 'ma na. 19Na, 'na Laagɔa cɩ 'ka anyɩ lɩɩa ‑tɛtɛa a ‑mie 'lɛ na 'nyɩ, ɔla 'nanɩ 'kadɩa 'la 'sasʋʋn, Zozi Klisi 'la 'klʋagbaa nɩkplaan. 20Na, 'naa 'klʋagba ŋeni ‑a To Laagɔ 'lʋkʋlʋkʋ ɩya 'lʋkʋlʋkʋ. Ɩ kʋ sɛɛ!
‑Ayopalɩɛ
21A 'pa Zozi Klisi nɩkplaan 'la ‑kplɔkplɔnyaa ‑tɛtɛa ‑ayo. Bholiecɩa ‑ɔ ‑kʋʋn 'lɛ ‑wɔlʋ cɩ na, ma pa anyɩ ‑ayo. 22‑Klpɔkplɔnyaa 'fɩan pa anyɩ ‑ayo, Nyɩbhɛlʋ Sezalɩ 'la 'slea nɩkplaan ‑naanʋa pa anyɩ ‑ayo ‑gbɔɔn.
23'Naa ‑Kwlenyɔ Zozi Klisi 'la 'nyupalɩɛ kʋ anyɩ 'kʋ!
Currently Selected:
Filp 4: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.